Mamwene a Nenli 1:1-18
-
Eliya onnihimya okhwa wa Akhaziya (1-18)
1 Nuumala Akhabi okhwa, atthu a oMowabi yaahaarukunuwela aisarayeli.
2 Nihiku nimosa, Akhaziya aahimora vaxanelani, ekwartu awe ya osulu oSamariya, ovulala. Tivo, aahaaruma alopwana oriki: “Murowe, mwamukohe Bayali-Zebubi, muluku a wEkironi, wiira kisuwele vakhala wiira kinoopenuwa makhwatta aka ala”.
3 Masi nlaikha na Yehova naahimuleela Eliya* a oTiixibi wiira: “Nvenye, murowe mwakumane ni alopwana arummwale ni mwene a oSamariya, mwaakohe wiira: ‘Niireke wIsarayeli khokhanle Muluku, munrowa anyu omukohererya Bayali-Zebubi, muluku a wEkironi?
4 Tivo, enihimya awe Yehova tiila: “Nyuwo khamunrowa okhuma vakhaamani vanyu mumpaathale anyu, okhala wiira munimookhwa”’”. Nuumala-vo, Eliya aahirowa.
5 Okathi alopwana ale yaatthikenle aya wa Akhaziya, moowaakuveya owo aahaakoha oriki: “Mutthikenle-ni?”
6 Awo yaahimwaakhula wiira: “Ookhala mulopwana orwaale okumana ni hiyo, onanileela wiira: “Mutthike, mwamuleele mwene oorummeni wiira: “Enihimya awe Yehova tiila: ‘Niireke wIsarayeli khokhanle Muluku, munruma anyu wiira akohiwe Bayali-Zebubi, muluku a wEkironi? Nyuwo khamunrowa okhuma vakhaamani vanyu mumpaathale anyu, okhala wiira munimookhwa’”””.
7 Owo aahaakoha wiira: “Mulopwana owo aarwaale okumana ni nyuwo, onooleelani moolumo awo, aari sai?”
8 Awo yaahimwaakhula wiira: “Mulopwana owo aawanre nlaya na manri ni esintu ya esapala* muyuununi mwawe”. Moowaakuveya Akhaziya aahihimya wiira: “Mulopwana owo Eliya a oTiixibi”.
9 Moottharelana, mwene aahimuruma xeefi a anakhotto 50 ni anakhotto awe 50. Okathi owo aamurowenle awe Eliya, Eliya iira okilanthi ene vasulu va mwaako. Owo aahimuleela wiira: “Nyuwo mulopwana a Muluku eekeekhai, mwene onihimya wiira: ‘Mukhuruwe’”.
10 Masi Eliya aahimwaakhula xeefi aanakhotto 50 oriki: “Vakhala wiira miyo ka mulopwana a Muluku, okhuruwe mooro wiirimu, woopaheeni nyuwo ni anakhotto anyu 50”. Nto mooro waahikhuruwa wiirimu, ompaha xeefi owo, vamosa ni anakhotto awe 50.
11 Mwene aahimuruma-tho xeefi mukina a anakhotto 50 ni anakhotto awe 50. Owo aahimurowela Eliya onamuleela wiira: “Nyuwo mulopwana a Muluku eekeekhai, mwene onihimya wiira: ‘Mwaakuveke mukhuruwe’”.
12 Masi Eliya aahaakhula oriki: “Vakhala wiira miyo ka mulopwana a Muluku eekeekhai, okhuruwe mooro wiirimu, woopaheeni nyuwo ni anakhotto anyu 50”. Nto mooro wa Muluku waahikhuruwa wiirimu, ompaha xeefi owo, vamosa ni anakhotto awe.
13 Vano ekwaha ya neeraru, mwene aahimuruma xeefi mukina a anakhotto 50 ni anakhotto awe 50. Masi xeefi a neeraru, aahirowa, owela vamwaako, okokhora ohoolo wa Eliya, onamuxonttela oriki: “Nyuwo mulopwana a Muluku eekeekhai, xontte, okumi aka ni okumi wa arumeyi anyu ala 50, okhalane efaita vamaithoni vanyu.
14 Mooro wookhuruwa wiirimu waapaha maxeefi manli aanakhotto 50, ni ikrupu saya sa anakhotto 50, xontte, vano okumi aka okhalane efaita vamaithoni vanyu”.
15 Vano nlaikha na Yehova naahimuleela Eliya niiraka: “Mmutthareke, muhimoove”. Vano Eliya aahivenya, onarowa wa mwene vamosa ni mulopwana owo.
16 Eliya aahimuleela mwene wiira: “Enihimya awe Yehova tiila: ‘Nyuwo muhaaruma alopwana orowa omukoha Bayali-Zebubi, muluku a wEkironi. Niireke wIsarayeli khokhanle Muluku? Xeeni muhimukohaka? Mwekeekhai, nyuwo khamunrowa okhuma vakhaamani vanyu mumpaathale anyu, okhala wiira munimookhwa’”.
17 Siiso, Akhaziya aahikhwa, moovarihana ni moolumo a Yehova aamulenle awe Eliya. Vano okhala wiira Akhaziya aakhwiiye ohirina mwaana mwaamulopwana, Yorami* aahikhala mwene nipuro nawe, eyaakha ya nenli ya Yorami mwaana a Yosafati, mwene a oYuda.
18 Itthu sikina siiraneyale ni Akhaziya, itthu aapanke awe, soolempwa muliivuruni mwa soowiiraneya sa okathi wa mamwene a wIsarayeli.
Inoota
^ Nsina nintaphulela, “Muluku aka ti Yehova”.
^ Aahiiso, “exapala”.
^ Eyo piiyo, muhima awe Akhaziya.
