Mamwene a Nenli 11:1-21
11 Okathi Ataliya, maama awe Akhaziya, aawenhe awe wiira mwanawe aahikhwa, owo aahiwiiva atthu ootheene a nloko na mamwene.*
2 Vano, Yehoxeba, mwaana a mwene Yorami, murokorawe Akhaziya, aahimukuxa Yowasi mwaana a Akhaziya omukumiha eriyari ya anamwane a mwene yaarowa wiiviwa, omwiipithiha ekwaartu ya muhina ni murumeyi awe. Siiso yaahiwerya omwiipithiha mwaana owo wiira ohiiviwe ni Ataliya.
3 Mwaana owo aahikhala ni murumeyi owo iyaakha 6, iipithihiwe ene empa ya Yehova, okathi Ataliya aalamulela awe elapo eyo.
4 Eyaakha ya neethanu nenli, Yehoyada aahiruma wiihaniwa maxeefi yaahoolela makwarta Kariyana* 100 ni makwarta a opalaasio wiira arowe yakumane ni yena empa ya Yehova. Owo aahipaka nivarihano naawo ni aahiwiiriha olapha mpaani mwa Yehova. Nuumala-vo aahiwooniherya mwaana a mwene.
5 Owo aahaaleela wiira: “Etthu munrowa anyu opaka tiila: Munrowa okawana ikrupu tthaaru: ekrupu emosa enrowa ovaraka nihiku na esaabadu, nave enrowa owehawehaka oratteene empa ya mwene;
6 ekrupu ekina enrowa okhalaka Vamukhora wa Alisenso, nave ekrupu ya neeraru enrowa okhalaka ottuli wa makwarta a opalaasio. Nyuwo munrowa oranttelanaka nwehawehaka oratteene empa eyo.
7 Ikrupu piili sinrowa othanleliwa ovaraka esaabadu, sihaana owehawehaka oratteene empa ya Yehova wiira okhapeleliwe mwene.
8 Mmurukurerye mwene khula mpantta, khula mutthu okunxe ene ikaruma sawe sa ekhotto. Ole onrowa otupha mukano wa atoropa ohaana wiiviwa. Mukhaleke ni mwene khula opuro onrowa awe”.*
9 Maxeefi yaahoolela anakhotto 100 yaahiira siiso ntoko namukuttho Yehoyada aarumme awe. Khula mmosa aahaathukumanya alopwana awe, ale yaavara esaabadu ni ale yahaavara esaabadu, enarowa okumana ni namukuttho Yehoyada.
10 Vano namukuttho aahaavaha maxeefi awo a atoropa 100 mavaka ni iskuutu soovilikeya saari sa mwene Davidi, saapwehiwe mpaani mwa Yehova.
11 Makwarta a opalaasio yaaheemela opuro aya, khula mmosa okunxe ene ikaruma sa ekhotto, okhuma moono woolopwana wa empa mpakha moono woothiyana wa empa, ohoolo wa altaari ni ohoolo wa empa, ootheene aya amurukurenrye ene mwene.
12 Yehoyada aahimukumiherya ota mwaana a mwene, onwariha ekhara, onvahererya eroolu yaarina nlamulo na Muluku. Nuumala-vo, awo yaahimuthanla wiira okhale mwene. Nto yaahipacerya omana makuphi ahimyaka wiira: “Mwene okhaleke mahiku ootheene!”
13 Okathi Ataliya aiwale awe onyakula wa atthu yaatthimaka, moowakuveya aahirowa mpaani mwa Yehova, opuro yaari aya atthu awo.
14 Moottharelana, Ataliya aahimoona mwene eemenle ene waattamela epilaari, moovarihana ni yoolema. Maxeefi yaahoolela anakhotto 100 ni ale yoopa malope, yaari ni mwene. Vano atthu ootheene yaanitteeliwa murima ni yaanoopa malope. Siiso Ataliya aahikhera ikuwo sawe onakhuwela oriki: “Koorukunuweliwa! Koorukunuweliwa!”
15 Namukuttho Yehoyada, aahaaruma maxeefi yaahoolela anakhotto 100, yaawo yaathanliwe wiira yaahooleleke anakhotto, oriki: “Mmukumihe muthiyana ole eriyari ya atoropa, akhala mutthu onimutthara, mmwiive ni espaata!” Namukuttho owo aahihimya wiira: “Muhimwiive muthiyana owo mpaani mwa Yehova”.
16 Awo yaahinvara, nto okathi yaaphiyale aya vamukhora saakela aya ikhavalo empa ya mwene,* yaahimwiiva weiwo.
17 Yehoyada, aahimwiiriha mwene ni atthu opaka nivarihano ni Yehova, wiira atthu awo yaarowa okhalaka atthu a Yehova, nave aahimwiiriha mwene opaka nivarihano ni atthu.
18 Nuumala-vo atthu ootheene a elapo ele yaahirowa empa ya Bayaali, yaapwexakasa altaari, epwexakasa ilatarato sawe sootheene, amwiiva Matani, namukuttho a Bayaali ohoolo wa altaari.
Moottharelana, namukuttho aahaathanla atthu wiira awehaweheke empa ya Yehova.
19 Nave, Yehoyada aahaakuxa maxeefi yaahoolela anakhotto 100, makwarta Kariyana, makwaarta a opalaasio, ni atthu ootheene a elapo ele wiira amuhoole mwene okhuma empa ya Yehova arowaka empa ya mwene, aviraka ephiro ya mukhora ya makwaarta a opalaasio. Nuumala-vo mwene aahikilaathi veehiceni ya mamwene.
20 Siiso atthu ootheene a elapo ele yaahitteeliwa murima, nave epooma ele waahikhala murettele, okhala wiira Ataliya aahiiviwa ni espaata owannyawe mwene.
21 Yowasi aarina iyaakha 7 okathi akhalihiwe awe mwene.
Inoota
^ Eheeberi, “osuulu wootheene wa mamwene”.
^ Ekrupu ya atoropa yaavara muteko ntoko makwarta a mwene.
^ Eheeberi, “okathi onkhuma awe ni okathi onkela awe”.
^ Aahiiso, “epalaasio”.
