Mamwene a Nenli 17:1-41
17 Eyaakha ya namuloko ni piili ya mwene Akhazi a oYuda, Hoxeya mwaana a Elahi, aahikhala mwene a atthu a Isarayeli, oSamariya. Owo aahilamulela iyaakha 9.
2 Hoxeya aanipaka itthu sootakhala vamaithoni va Yehova, masi khaatepana waavikana mamwene a wIsarayeli yaawo aaranttenle awe.
3 Mwene Salmanaseri a wAsiiria, aahirowa owana ni Hoxeya. Vano Hoxeya aahikhala murumeyi a mwene a wAsiiria, onapacerya omuliva mpoosito.
4 Masi mwene a wAsiiria aahisuwela wiira Hoxeya aaphavela omurukunuwela, okhala wiira aahaaruma alopwana orowa wa mwene So a wExiitu, nave khaamulinve mpoosito mwene a wAsiiria ntoko iyaakha saavinre. Tivo mwene a wAsiiria aahinvara Hoxeya, omutthukwela mukhatteya.
5 Mwene a wAsiiria aahituphela elapo ele yootheene, ophiya oSamariya orukurerya iyaakha tthaaru.
6 Eyaakha ya neethanu neexexe ya Hoxeya, mwene a wAsiiria aahikuxa oSamariya. Owo aahaakuxa atthu a Isarayeli ntoko ipottha aaroiha wAsiiria, aahiya ekhalaka oHala ni oHabori waattamela muro Gozani, ni ipooma sa oMedia.
7 Eyo yaahiiraneya mwaha woowi atthu a Isarayeli yaahimutthekela Yehova, Muluku aya, yoowo aakuminhe elapo ya wExiitu, mmatatani mwa Farawo, mwene a wExiitu. Awo yaahaakokhorela* amuluku akina,
8 yaahitthara soolema sa maloko Yehova oomonle awe ohoolo wa atthu a Isarayeli, ni soolema saakumiheriwe ni mwene a wIsarayeli.
9 Aisarayeli yaaniphavela itthu soohiloka seiyo saari sootakhala vamaithoni va Yehova Muluku aya. Nave yaanipaka mapuro oorakamela osulu yaawo yaakokhoreliwa amuluku ipooma saya, okhuma empa yoorakamela osulu ya alipa-oowehaweha mpakha epooma yoolipihiwa.*
10 Awo yaahiipakela ipilaari saakokhoreliwa ni mwiri, mapuro ootheene oorakamela osulu, ni vathi va miri sootheene suulupale.*
11 Nave awo yaanivaha mwiixi wa mukuttho woopahiwa mapuro ootheene oorakamela osulu yaakokhoreliwa amuluku eethiru, ntoko yiirale aya maloko Yehova oomonle awe ohoolo waya. Nave yaanipaka itthu iyo sootakhala wiira anveehe Yehova.
12 Awo yaanithipelela orumeela ilatarato soohiirya,* seiyo Yehova aalenle awe wiira: “Muhipake etthu ela!”
13 Yehova aahithipelela waalopola atthu a Isarayeli ni a oYuda aarumeelaka maprofeta ootheene ni ootheene ale yaasuwela otaphulela sowoonihiwa, oriki: “Muhiye iphiro sanyu sootakhala! Mweetteleke sooruma saka ni ikano saka, ni muttharaka malamulo ootheene kaarumme aka amuhavinre anyu, ni kooruuhenlyaakani kaarumeelaka arumeyi aka, maprofeta”.
14 Masi awo khiyaawiriyanne, nave yaahithipelela wuumiha mirima saya ntoko amuhavinre aya, yaawo yahoonihenrye omwaamini Yehova, Muluku aya.
15 Awo yaanithipelela okhootta malakiheryo awe, nivarihano nenlo aapanke awe ni amuhavinre aya, ni soolopola sawe aavanhe awe wiira aalopole. Nave, yaanikokhorela ilatarato sihirina efaita, yiikhalihaka atthu ahirina efaita. Siiso, yanaatakiha atthu a maloko yaattamanne aya, yaawo Yehova akhoottihenrye awe wiira ahaatakihe.
16 Awo yaahihiya sooruma sootheene sa Yehova, Muluku aya, yaahipaka ilatarato piili sa eyuuma, saalikana ni ipooyi ni yaahipaka mwiri waakokhereliwa.* Nave yaanikokhorela itheneeri sootheene sa osulu, ni yaanimurumeela Bayaali.
17 Nave-tho, yaanaapaha anaaya axilopwana ni axithiyana vamooroni, yaanaaxerya ehako, yaaniphavela osuwela ithoonyeryo sa ohoolo, ni yaahilakela opaka itthu sootakhala vamaithoni va Yehova, wiira anveehe.
18 Nto Yehova aahinanariwa vanceene ni atthu a Isarayeli, owoomola ohoolo wawe. Owo aahiwoomola atthu ootheene, aahiya paahi atthu a nihimo na Yuda.
19 Hata atthu a oYuda, khiyaatthara sooruma sa Yehova, Muluku aya. Nave-tho awo yaahitthara soolema atthu a Isarayeli yaatthara aya.
20 Yehova aahaakhootta atthu ootheene a osuulu wa Isarayeli, owuulihiha muru ni aavahererya mmatatani mwa alavilavi, mpakha owoomola ohoolo wawe.
21 Owo aahaakumiha atthu a Isarayeli etthoko ya Davidi, nto awo yaahimukhaliha mwene Yerobowamu, mwaana a Nebathi. Masi Yerobowamu aahiwiiriha atthu a Isarayeli ohiya omutthara Yehova, nave aahiwiiriha opaka etampi yuulupale.
22 Nto, atthu a Isarayeli yaanipaka itampi sootheene Yerobowamu aapanke awe. Awo khiyaahiyale opaka itampi iyo,
23 mpakha Yehova owoomola atthu a Isarayeli ohoolo wawe, ntoko aahimmye awe aarumeelaka arumeyi awe ootheene, maprofeta. Siiso, atthu a Isarayeli yaahikuxiwa elapo aya ntoko ipottha, aroihiwaka elapo ya wAsiiria, weiwo onikhala aya mpakha olelo-va.
24 Moottharelana, mwene a wAsiiria aahaakuxa atthu a oBabilonia, a oKuthi, a wAwa, a oHamati, ni a oSefarvayimi, aaroiha ipooma sa oSamariya aaranttelihaka ni aisarayeli. Awo yaahikuxa ipooma sa oSamariya, anakhala memmo.
25 Okathi yaapacenrye aya okhala mpooma-mmo, khiyaamoova* Yehova. Vano, Yehova aahaaruma akharamu eriyari aya, awiiva atthu akina a yaawo.
26 Mwene a wAsiiria aahileeliwa wiira: “Atthu mwaakunxe anyu ntoko ipottha mwaaroihaka ipooma sa oSamariya, khanisuwela moota woomukokhorela Muluku a elapo ele. Tivo, Muluku owo onnaaruma akharamu eriyari aya, yaawo aniwiiva atthu awo, okhala wiira khanisuwela moota woomukokhorela Muluku a elapo ele”.
27 Vano, mwene a wAsiiria aahiruma wiira: “Mmuttikiherye namukuttho mmosa mmukunxe anyu ntoko epottha, wiira akhaleke weiwo ni owiixuttiheke atthu moota woomukokhorela Muluku a elapo eyo”.
28 Nto namukuttho mmosa, yoowo aakuxiwe oSamariya ntoko epottha, aahittikihiwa wiira akhaleke oBeteli. Vano, owo aahipacerya owiixuttiha atthu, moota woomukokhorela* Yehova.
29 Masi, atthu a khula nloko yaahaapaka amuluku aya, yaawo yaapwenhe aya ipa saakokhoreliwa, saari mapuro oorakamela osulu yaakokhoreliwa amuluku eethiru, saatekiwe ni atthu a oSamariya. Atthu a khula nloko yaahipaka eyo ipooma saakhala aya.
30 Atthu a oBabilonia yaahipaka elatarato ya Sukoti-Benothi, atthu a oKuthi yaahipaka elatarato ya Nergali, atthu a oHamati yaahipaka elatarato ya Axima,
31 nave atthu a wAwa yaahipaka ilatarato sa Nibihazi ni Taritaki. Atthu a oSefarvayimi yaanaapaha anaaya axilopwana vamooroni, anvahaka Adrameleki ni Anameleki, amuluku a oSefarvayimi.
32 Nnaamwi yaamoova Yehova, yaahaathanla anamukuttho eriyari ya atthu wiira avareke muteko mapuro oorakamela osulu yaakokhereliwa amuluku eethiru. Anamukuttho awo, yaanaavarela muteko atthu awo ipa saakokhoreliwa, saari mapuro oorakamela osulu yaakokhoreliwa amuluku eethiru.
33 Awo yaanimoova Yehova, masi yaakokhorela amuluku aya, attharaka soolema sa itiini sa maloko yaakhumme aya.
34 Mpakha olelo-va, awo anitthara soolema sa itiini saya sa khalai. Nto, khuuvo a yaawo onimukokhorela Yehova, nave khuuvo onitthara ikano sawe, ophukela wawe, nlamulo nawe, ni yooruma ya Yehova aavanhe awe anamwane a Yakobe, yoowo aaturunke nsina nawe wiira iihaniweke Isarayeli.
35 Okathi Yehova aapanke awe nivarihano naawo, aahaaleela wiira: “Muhaakokhoreleke amuluku akina, muhuurameke ohoolo waya aahiiso muhaarumeele nnakhala waavaha mikuttho.
36 Masi, mmukokhoreleke Yehova, yoowo ookuminheni elapo ya wExiitu ni owerya wawe wuulupale, ni moono awe woowerya. Muurameke ohoolo wawe ni munvaheke mukuttho yoowo.
37 Nave okathi wootheene mutthareke malakiheryo, ophukela, nlamulo, ni yooruma oolepenlyaaweni, ni muhaakokhoreleke amuluku akina.
38 Muhiliyale nivarihano kipanke aka ni nyuwo, nave muhaakokhoreleke amuluku akina.
39 Masi, mmukokhoreleke Yehova Muluku anyu, yoowo onrowa owoopolani mmatatani mwa awanani anyu ootheene”.
40 Masi awo khiyaiwelenle ni yaahitthara soolema sa itiini saya sa khalai.
41 Vano, maloko awo yaanimoova Yehova, masi-tho yaanirumeela ilatarato saya soopatthiwa. Anaaya ni axisulwaaya, anipaka itthu yaapaka aya amuhavinre aya, mpakha olelo-va.
Inoota
^ Eheeberi, “yaahiwoova”.
^ Eyo piiyo, mapuro ootheene, akhale mapuro ooyeva atthu aahiiso mapuro oowaatta atthu.
^ Nwehe Moolumo Ootthokiheriwa.
^ Nuulumo na eheeberi, woonasa wene ninvarihana ni nuulumo noowi “eturumu”, nenlo ninrumeeliwa ephavelaka ohimmwa etthu yoohiirya.
^ Nwehe Moolumo Ootthokiheriwa.
^ Aahiiso, “ khiyaamukokhorela”.
^ Eheeberi, “woomoova”.
