Mamwene a Nenli 19:1-37
19 Nuumala mwene Ezekiya wiiwa moolumo ala, aahikhera ikuwo sawe, owara isaakho, onarowa mpaani mwa Yehova.
2 Moottharelana, owo aahimuruma Eliyakimi yoowo aaweherya etthoko ya mwene, sekretaario Xebena, ni makhulupale a anamukuttho, wiira aware isaakho ni arowe wa profeta Yesaya, mwaana a Amozi.
3 Awo yaahirowa wa Yesaya anamuleela wiira: “Enihimya awe Ezekiya tiila: ‘Nla nihiku nooxanka, nooruwaniwa ni noowuuliha muru, ntoko nihiku onihala awe oyariwa mwaana, masi maama awe ohinakhalana ikuru wiira omuyare.
4 Woonasa wene, Yehova Muluku anyu onoowiriyana moolumo ootheene a Rabisake, yaawo orummwale awe ni pwiya awe, mwene a wAsiiria wiira onveehe Muluku mukumi. Nto Yehova Muluku anyu, omuhukhumu mwaha wa moolumo yiiwale awe. Vano xontte, mwaavekeleleke ale ahanle ari akumi’”.
5 Nto arumeyi a mwene Ezekiya, yaahirowa wa Yesaya,
6 vano Yesaya aahaahimeerya wiira: “Murowe mwamuleele pwiya anyu wiira: ‘Enihimya awe Yehova tiila: “Muhoove mwaha wa moolumo mwiiwale anyu, moolumo yaawo alavuliwe ni arumeyi a mwene a wAsiiria okiveehaka miyo.
7 Kinoomwiiriha wuupuwela etthu, nave owo onimwiiwa ehapari enrowa omwiiriha otthikela elapo awe. Nto kinoomwiiriha wiiviwa ni espaata* elapo awe”’”.
8 Nuumala Rabisake wiiwa wiira mwene a wAsiiria aahikhuma oLakixi, aahitthika wiira akumane ni yena, omphwanya owanaka ni atthu a oLibina.
9 Mwene aahiiwa vahimmwaka wiira Tiraka, mwene a wEthiyopia, aanirwa wiira owane ni yena. Nto aahaaruma-tho alopwana orowa omuleela Ezekiya wiira:
10 “Mwamuleele mwene Ezekiya a oYuda wiira: ‘Muhiwokiwe ni Muluku anyu yoowo munimuroromela anyu oriki: “Yerusalemu khonrowa ovahereriwa mmatatani mwa mwene a wAsiiria”.
11 Nyuwo muhiiwa ele mamwene a wAsiiria yiirihale aya ilapo sootheene, apwetexaka ilapo seiyo. Nto niireke nyuwo paahi ti munrowa woopoliwa?
12 Niireke amuluku a maloko makina yaawo amuhavinre aka yaapwetenxe aya yaahiwoopola? Siri vai mittetthe sa oGozani, oHarani ni oRezefi? Nave ari woowi atthu a wEedeni, yaawo yaakhala oTeli-Hasari?
13 Ori vai mwene a oHamati, mwene a wArpadi, mwene a ipooma sa oSefarvayimi ni a oHena, ni a wIva?’”
14 Ezekiya aahikuxa ikarta iyo mmatatani mwa alopwana ale, onasoma. Nuumala-vo, Ezekiya aahirowa mpaani mwa Yehova, aatala ikarta iyo ohoolo wa Yehova.
15 Vano Ezekiya aahipacerya ovekela ohoolo wa Yehova oriki: “Khoo Yehova Muluku a Isarayeli, mukilanthi veehiceni vanyu, vasulu* va makerubi, nyuwo paahi muri Muluku eekeekhai a mamwene ootheene a valaponi. Nyuwo moopaka erimu ni elapo.
16 Khoo Yehova, mutheteye maaru anyu, nwiriyane! Khoo Yehova, mutthukule maitho anyu, mooneke! Nwiriyane moolumo Senakeribi orumme awe oveehiwa Muluku mukumi.
17 Khoo Yehova, ekeekhai wiira mamwene a wAsiiria aapwetexa maloko makina ni ilapo saya.
18 Nave awo yaahaarihela vaikho amuluku aya, okhala wiira khahiyo yaari amuluku eekeekhai masi yuupiwe ni matata a apinaatamu, yaari a matera ni a nluku. Tivo awo yaawenrye aya waapwetexa amuluku awo.
19 Masi vano, khoo Yehova Muluku ahu, xontte munoopole mmatatani mwa Senakeribi, wiira mamwene ootheene a mulaponi asuwele wiira nyuwo paahi, khoo Yehova, mukhanle Muluku”.
20 Yesaya mwaana a Amozi, aahiruma oleeliwa Ezekiya wiira: “Enihimya awe Yehova Muluku a Isarayeli tiila: ‘Miyo kihiiwa ovekela wanyu mwaha wa mwene Senakeribi a wAsiiria.
21 Moolumo Yehova olavunle awe omuhimyaka yena taala:
“Mwaana mwaamuthiyana a oSiyoni ohitonko orupa ni mulopwana onnoothanyani nyuwo, owo onnootheyani.
Mwaana mwaamuthiyana a oYerusalemu onnoottikinyeryani muru ohoolo wanyu.
22 Ti pani omuruwanne anyu ni onveeha?
Ti pani omulavulenle anyu ni onwehale anyu ni wiisoona?Ti Muluku Oowaarya a wIsarayeli!
23 Mwaarumeelaka arumeyi anyu nyuwo monveeha Yehova muriki:‘Kirumeelaka ikaaro saka sinceene sa ekhottoKinoowela vasulu va miyaako,Ni ipantta soorakamela sa oLiibano.
Kinimwiikittha miri saya sa eseeturu soorakama, ni miri saya sa xuniiperu soolokexa.
Kinookela mapuro aya oorakamela anitthyawela aya, ni itakhwa saya sootepexa oriipela.
24 Kinoothipa ihime ni kinoowurya maasi a elapo ya amalapo.Kinimuumiha miro sootheene sa wExiitu ni vathi va inawu saka’.
25 Niireke khamwiiwale? Miyo kaahilavula eyo okhuma khalai.
Okhuma okathi ovinre kaahilokiherya eyo,
Vano kinoopaka eyo.
Nyuwo munoopwetexa ipooma soolipihiwa ahale maluku oowuukeliwa.
26 Atthu aya khanrowa okhaliheriwa;Awo animoova ni animuulihihiwa muru.
Anrowa olikanaka ni malaxi a mutakhwani ni munyepu wooripelela,Anrowa olikanaka ni munyepu oninnuwa vasulu va empa yoowo onuumihiwa ni epheyo ya mpantta onikhuma nsuwa.
27 Masi miyo kinnisuwela oratteene okathi munikilaathi anyu,okathi munikhuma anyu, okathi munikela anyu,Ni okathi munnanariwa anyu ni miyo,
28 Okhala wiira kihiiwa onanariwa wanyu ni miyo ni onyakula wanyu.
Tivo kinimoohelani munela aka mphulani mwanyu ni mukhoyi* mwaano mwanyu,Nave kinimoottikiheryani ephiro mukhumme anyu”.
29 “‘Esinaale anyu* tiila: Eyaakha ela, munimoolya ipyo sinrowa omela mekhaya; nave eyaakha ya nenli, munimoolya ipyo sinrowa wiima memmo; masi eyaakha ya neeraru, munimwaala ni munoohepha, munimwaala miri sa ewuuva ni munimoolya mihokorokho saya.
30 Atthu a etthoko ya Yuda anrowa woopowa, yaawo anrowa ohala, anrowa olikanaka ni mwiri orina mitathaari saya ni oniima mihokorokho mweerittani mwaya.
31 Vano, oYerusalemu anookhuma ale anrowa ohala, nave omwaako Siyoni anookhuma ale anrowa woopowa. Tthiri, Yehova a anakhotto, yoowo ori Muluku a nthiti, tonrowa opaka eyo.
32 “‘Enihimya awe Yehova omuhimyaka mwene a wAsiiria tiila:
“Owo khonrowa okela epooma elaNnakhala khonrowa ovonyerya mattheereAahiiso khonrowa owana ni iskuutuWala khonrowa oteka etturuuru wiira otuphele epooma ela.
33 Owo onootthikela ephiro okhumme awe;Khonrowa okela epooma ela”, onihimya Yehova.
34 “Kinimwaakiha ni kinimoopola epooma ela mwaha wa miyo,Ni mwaha wa murumeyi aka Davidi”’”.
35 Ohiyu ene yoole, nlaikha na Yehova naahikhuma niwiiva alopwana 185.000 opuro yaamanke aya Asiiria. Okathi atthu yaavenyale aya voosiisu, yaahaaweha alopwana ootheene ookhwa ene.
36 Vano mwene Senakeribi a wAsiiria, aahikhuma otthikela oNiinive, onakhala weiwo.
37 Nihiku nimosa, okathi aari awe empa ya muluku awe Nisiroki omukokhorelaka, anaawe, Adrameleki ni Sareseri, yaahimwiiva ni espaata, nuumala-vo yaahitthyawela elapo ya wArarati. Nto mwanawe, Esari-Hadoni, aahikhala mwene nipuro nawe.
Inoota
^ Aahiiso, “xoowa”.
^ Aahiiso, woonasa wene: “eriyari ya”.
^ Nuulumo nirumeeliwe-va onihimmwa mukhoyi yoowo onirumeeliwa wiira yeettihiwe ekhavalo. Mukhoyi owo onitthukweleliwa eyuuma yaamukhaani yeeyo eniheliwa vayanoni va ekhavalo.
^ Eyo piiyo, Ezekiya.
