Mamwene a Nenli 2:1-25
2 Okathi Yehova aaphavela awe omukuxa Eliya ni epheyo omuroihaka wiirimu,* Eliya ni Eliseyo yaahikhuma oXiligali.
2 Eliya aahimuhimeerya Eliseyo wiira: “Xontte, muhale vaava, okhala wiira Yehova okirumme oBeteli”. Eliseyo aahimwaakhula wiira: “Ntoko siisaale Yehova onikhala awe, ni nyuwo munikhala anyu, nkinoohiyani”. Nto awo yaahirowasa oBeteli.
3 Vano, anamwane a maprofeta* a oBeteli yaahirowa okumana ni Eliseyo enamukoha wiira: “Moosuwela wiira olelo,Yehova onoomukuxa pwiya anyu, yoowo ori muhooleli anyu?” Eliseyo aahaakhula wiira: “Aayo, koosuwela. Mmaalele vaavo”.
4 Eliya aahimuhimeerya Eliseyo wiira: “Eliseyo, xontte muhale vaava, okhala wiira Yehova okirumme oYeriko”. Masi Eliseyo aahimwaakhula wiira: “Ntoko siisaale Yehova onikhala awe, ni nyuwo munikhala anyu, nkinoohiyani”. Nto awo yaahirowasa oYeriko.
5 Anamwane a maprofeta yaari oYeriko, yaahimwaattamela Eliseyo enamukoha wiira: “Moosuwela wiira olelo, Yehova onoomukuxa pwiya anyu, yoowo ori muhooleli anyu?” Eliseyo aahaakhula wiira: “Aayo, koosuwela. Mmaalele vaavo”.
6 Eliya aahimuhimeerya-tho Eliseyo wiira: “Xontte, muhale vaava, okhala wiira Yehova okirumme oYordani”. Masi Eliseyo aahihimya wiira: “Ntoko siisaale Yehova onikhala awe, ni nyuwo munikhala anyu, nkinoohiyani”. Siiso, oowanli aya yaahirowasa.
7 Nave anamwane 50 a maprofeta yahaatthara, yeemela anaaweha ottaiwene okathi oowanli aya yeemenle aya waattamela muro Yordani.
8 Moottharelana, Eliya aahikuxa nlaya nawe na oprofeta, uupaanya, omanela mmaasini, vano maasi awo yaahikawanyeya, makina yeemela mpantta woolopwana makina mpantta woothiyana, nto oowanli aya yaahilapuwa muro owo eviraka etthaya yoowuuma.
9 Nuumala olapuwa, Eliya aahimuhimeerya Eliseyo wiira: “Mukivekele etthu muniphavela anyu, wiira kiwiireleni kihinatthi okuxiwa”. Eliseyo aahihimya wiira: “Xontte, niireke vanooweryaneya waakhela ipantta piili sa munepa woowaarya murina anyu?”
10 Eliya aahaakhula wiira: “Etthu nvekenle anyu ti yooxankiha. Vakhala wiira munookiweha okathi kinrowa aka okuxiwa, ele evekenle anyu enimwiiraneya. Masi mwaahikiwehe, ele evekenle anyu kheniiraneya”.
11 Okathi yeetta aya evaanelaka, mootutuxerya yaahikhumelela ekaaro ya mooro ni ikhavalo sa mooro, seiyo saavalannye oowanli aya. Nto Eliya aahiwela wiirimu okuxiwaka ni epheyo.
12 Okathi aawenhe awe eyo, Eliseyo aahikhuwela oriki: “Paapa, paapa! Mooneke, ekaaro ya Isarayeli ni anakhavalo aya!” Okathi ahaawerya awe onweha Eliya, aahikuxa malaya awe, okhera okawanyaka ipantte piili.
13 Nuumala-vo, aahittotta nlaya na oprofeta nenlo nammonre Eliya, otthikela ottuli, eemela mukerekhere mwa muro Yordani.
14 Orumeelaka nlaya* nammonre Eliya, Eliseyo aahimanela mmaasini, onahimya wiira: “Ori woowi Yehova, Muluku a Eliya?” Okathi aamanne awe mmaasini, maasi awo yaahikawanyeya, makina yeemela moono woolopwana, makina moono woothiyana, nuumala-vo Eliseyo aahilapuwa.
15 Okathi anamwane a maprofeta a oYeriko yanwenhe aya Eliseyo ori ene ottaiwene, yaahihimya wiira: “Munepa woowaarya wa Eliya, vano ori ni Eliseyo”. Nto awo yaahirowa vaari awe, akokhora, yuurama mpakha vathi ohoolo wawe.
16 Awo yaahimuhimeerya wiira: “Aakhala vaava alopwana 50 oowerya, vamosa ni arumeyi anyu. Xontte, mwaahiye, wiira yamphavelase pwiya anyu. Woonasa wene munepa* wa Yehova waamukunxe omurihenle omwaako, aahiiso okhatoni”. Eliseyo aahihimya wiira: “Nnaari, muhaarume”.
17 Masi awo yaahimukhanyererya mpakha onyoonyiheya, onahimya wiira: “Weeso mwaarumeke”. Siiso, awo yaahaaruma alopwana 50, yaawo yamphavenle mahiku mararu, masi khiyamphwannye.
18 Okathi yaatthinke aya, Eliseyo iira ori ene oYeriko. Nto Eliseyo aahaakoha oriki: “Miyo nkoolenleni wiira muhirowe?”
19 Nuuvira okathi, alopwana a epooma yaahimuhimeerya Eliseyo wiira: “Pwiyaka, nwehe wiira epooma ela eri opuro wookhalela. Vano maasi toohiloka, nave elapo khenruwerya”.
20 Eliseyo aahihimya wiira: “Muhele maakha mutixelani esya yaamukhaani, mukiruuhele”. Nto awo yaahimuroihela.
21 Moottharelana, owo aahirowa opuro oniphattuwa muro, iitthela maakha, onahimya wiira: “Enihimya awe Yehova tiila: ‘Kinnireeriha maasi ala. Khanrowa-tho wiiva, nnakhala owiiriha atthu ohiyara’”.*
22 Maasi awo tooreera mpakha olelo-va, ntoko Eliseyo aahimmye awe.
23 Nuumala-vo, Eliseyo aahirowa oBeteli. Okathi eetta awe mphironi, amiravo akina yaahikhuma mpooma, enapacerya onveeha ariki: “Murooke, nantari! Murooke nantari!”
24 Wanikisa waya, Eliseyo aahirukunuwa, onaaweha amiravo ale aatakhaliha ni nsina na Yehova. Nto inama piili suulupale soothiyana siniihaniwa ursu, saahikhuma mutakhwani siwiiva anamwane ale 42.
25 Moottharelana, owo aahirowa omwaako Karmelo, nuumala-vo aahitthikela oSamariya.
Inoota
^ Eyo piiyo, osulu, opuro onivava aya axipalame.
^ “Anamwane a maprofeta”, vanikhala wiira enihimmwa exikola yiixuttihiwa aya maprofeta, aahiiso mutthenkeso mmosa wa maprofeta.
^ Aahiiso, “nlaya na profeta”.
^ Aahiiso, “epheyo”.
^ Aahiiso, woonasa wene: “omwarexa irukulu”.
