Mamwene a Nenli 20:1-21
20 Mahiku ale, Ezekiya aahiwereiwa onahala okhwa. Profeta Yesaya, mwaana a Amozi, aahirwa onamuleela wiira: “Enihimya awe Yehova tiila: ‘Mwaavahe malakiheryo atthu a etthoko anyu, okhala wiira khamunrowa openuwa; munimookhwa’”.
2 Siiso, Ezekiya aahirukunuwela oxirini, onapacerya onvekela Yehova oriki:
3 “Khoo Yehova, kinnooxonttelani, muupuweleke wiira kiheetta voororomeleya ohoolo wanyu ni murima aka wootheene, nave koopaka itthu sooloka vamaithoni vanyu”. Nto Ezekiya aahipacerya wunla vanceene.
4 Yesaya iira ohinatthi ophiya eriyari ya nivate, okathi Yehova aamuhimenrye awe wiira:
5 “Mutthike, mwamuleele Ezekiya muhooleli a atthu aka wiira: ‘Enihimya awe Yehova Muluku a muhavinre anyu Davidi tiila: “Kihiiwa ovekela wanyu. Nave kihoona wunla wanyu. Miyo kinimoopenuxani. Nihiku na neeraru munoorowa empa ya Yehova.
6 Kinimuncererya iyaakha 15 sa okumi anyu,* nave kinoowoopolani ni kinimoopola epooma ela mmatatani mwa mwene a wAsiiria. Nave kinimwaakiha epooma ela mwaha wa miyo ni mwaha wa murumeyi aka, Davidi”’”.
7 Vano Yesaya aahihimya wiira: “Kiruuheliwe ifiiku soonyakattiwa, soowuuma”. Nto saahiruuhiwa, siheliwa ethuku yuulupale ya mwene, nuumala-vo, aahipacerya openuwa vakhaani-vakhaani.
8 Ezekiya aahimukoha Yesaya wiira: “Esinaale xeeni enooniherya wiira Yehova onookipenuxa, nave nihiku na neeraru kinoorowa empa ya Yehova?”
9 Yesaya aahimwaakhula wiira: “Esinaale ya Yehova, enooniherya wiira Yehova onoomaleliha moolumo olavunle awe tiila: Muniphavela wiira muuttutthi ori vaskattani* orowe ohoolo mavalo 10, aahiiso otthikele ottuli mavalo 10?”
10 Vano Ezekiya aahihimya wiira: “Ti vookhweya muuttutthi orowa ohoolo mavalo 10, ohiya otthikela ottuli mavalo 10”.
11 Profeta Yesaya aahinvekela Yehova, nto Owo ahiiriha muuttutthi waakhurunwe eskatta ya Akhazi otthikela ottuli mavalo 10.
12 Okathi ole, mwene a oBabilonia, Berodaki-Baladani, mwaana a Baladani, aahimulepela ikarta ni aahimuroihela yoovaha Ezekiya, okhala wiira aahiiwa wiira Ezekiya anwereiwa.
13 Ezekiya aahiwaakhela,* owooniherya mihakhu sootheene sa empa awe, eyo piiyo, eparatha, eweero, makhura a baalsamu, ni mihakhu sikina sooreerexa ni mapuro makina saapwehiwa aya ikaruma sa ekhotto, ni itthu sootheene saaphwanyaneya opuro waasukiwa mihakhu sawe. Nto khiivo etthu Ezekiya ahaawoonihenrye awe vatthokoni vawe, ni moomweneni mwawe mootheene.
14 Nuumala-vo, profeta Yesaya aahirowa wa mwene Ezekiya onamukoha wiira: “Alopwana ale ahimmyeni, nave anikhuma woowi?” Ezekiya ahaakhula wiira: “Awo anikhuma elapo yoottaiwene, oBabilonia”.
15 Moottharelana, profeta Yesaya aahimukoha wiira: “Awo yoonaleni vatthokoni vanyu?” Vano Ezekiya ahaakhula wiira: “Awo ahoona itthu sootheene vatthokoni* vaka. Khiivo etthu kihiwoonihenrye aka opuro sinisukiwa mihakhu saka”.
16 Yesaya aahimuhimeerya Ezekiya wiira: “Nwiriyane moolumo a Yehova:
17 ‘Anoophiya mahiku, itthu sootheene siri vatthokoni vanyu, ni itthu sootheene amuhavinre anyu asunke aya mpakha olelo-va, sinrowa aya okuxiwa siroihiwaka oBabilonia, khiivo etthu enrowa ohala’, Yehova tonihimya.
18 ‘Nave aniinyu akina yaawo munrowa anyu oyareliwa, anookuxiwa ni anrowa okhala makhulupale opalaasio wa mwene a oBabilonia’”.
19 Ezekiya aahimuleela Yesaya wiira: “Moolumo a Yehova mulavunle anyu tooreera”. Nave Ezekiya aahincererya oriki: “Vanooreera okhala wiira onookhala murettele ni ovareleleya nlelo kiri ene mukumi”.
20 Itthu sikina siiraneyale ni Ezekiya, miteko sawe sootheene soowerya, moota aapanke awe ehime, moota aahapunxe awe maasi, ni moota aaruuhale awe maasi opooma, soolempwa muliivuruni mwa soowiiraneya sa okathi wa mamwene a oYuda.
21 Vano Ezekiya aahirowa omumula ni amuhavinre awe, nto mwanawe, Manase, aahikhala mwene nipuro nawe.
Inoota
^ Eheeberi, “mahiku anyu”.
^ Woonasa wene, iskatta iyo saarumeeliwa wiira okontariwe okathi, ntoko iroroce sa nsuwa.
^ Aahiiso, “aahaawiriyana”.
^ Aahiiso, “opalaasio waka”.
