Mamwene a Nenli 21:1-26
21 Manase aarina iyaakha 12 okathi aakhanle awe mwene, nave aahilamulela iyaakha 55 oYerusalemu. Maama awe aihaniwa Hefeziba.
2 Owo aahipaka itthu soohiloka vamaithoni va Yehova, ottharaka soolema soohiloka, sa maloko yaawo Yehova oomonle awe ohoolo wa atthu a Isarayeli.
3 Manase aahiteka-tho mapuro oorakamela osulu yaakokhoreliwa amuluku eethiru, yaawo paapa awe, Ezekiya aapwexakanse awe, nave aahaateka altaari a Bayaali, ni aahipaka mwiri waakokhoreliwa,* ntoko iirale awe Akhabi, mwene a wIsarayeli. Nave aanikokhorela itheneeri sootheene sa osulu, ni aanuuramela seiyo.
4 Owo aahaateka-tho altaari mpaani mwa Yehova, memmo Yehova aahimmye awe wiira: “Nsina naka ninrowa okhalaka oYerusalemu”.
5 Nave aahaateka-tho altaari a itheneeri sootheene sa osulu, nivate na muhina ni nivate na ota wa empa ya Yehova.
6 Manase aahimpaha mwanawe vamooroni, aahipaka maxintta, aaniphavela osuwela itthu saarowa wiiraneya muhoolo ni aahaathanla anahako ni atthu yaavekela malaikha ootakhala. Nave aahipaka itthu sootepa otakhala vamaithoni va Yehova wiira onveehe.
7 Owo aahipaka elatarato yoopatthiwa ya mwiri waakokhoreliwa,* opweha empa Yehova aamulenle awe Davidi ni mwanawe Salomoni wiira: “Eriyari ya mahimo ootheene a wIsarayeli, miyo koothanla empa ela ni oYerusalemu, wiira nsina naka nikhaleke memmo mahiku ootheene.
8 Nkinrowa-tho owoomola atthu a Isarayeli elapo kaavanhe aka amuhavinre aya, yaiwelela-ru oratteene itthu sootheene kaarumme aka, eyo piiyo, Nlamulo nootheene murumeyi aka Moise aarumme awe wiira yeetteleke”.
9 Masi awo khiyaiwelenle, nave Manase aanithipelela waahapuxa, owiirihaka opaka itthu sootepa otakhala ovikana iye saapakiwa ni maloko Yehova aamala-malinhe awe ohoolo wa aisarayeli.
10 Yehova nlelo aanilavula aarumeelaka arumeyi awe maprofeta, oriki:
11 “Manase, mwene a oYuda oopaka itthu iya sootheene sootakhala. Owo oopaka itthu sootepa otakhala waavikana atthu a wAmori yaakhanle ohinatthi yena, orumeelaka ilatarato soohiirya* oowiiriha atthu a oYuda ottheka.
12 Tivo, enihimya awe Yehova, Muluku a Isarayeli tiila: ‘Kinookumiherya ehasara oYerusalemu ni oYuda, khula mutthu onrowa wiiwa ehasara eyo onootikinihiwa.
13 Kinimwaahukhumu atthu a oYerusalemu, ntoko kaahukhummu aka atthu a oSamariya ni atthu a etthoko ya Akhabi, nave kinoolimpari oYerusalemu, ntoko siisaale sinlimpariwa aya etixela, enarapihiwa ni enapopheiwa.
14 Kinimwaanyanyala atthu aka yaawo ari ntoko yoohiyeriwa aka, nave kinimwaavahererya mmatatani mwa awanani aya. Nto, awo anookuxiwa ntoko ipottha, nave mireerelo saya animwaakhiwa ni awanani aya ootheene,
15 okhala wiira aapaka itthu sootakhala vamaithoni vaka ni annithipelela okiveeha, okhuma nihiku amuhavinre aya yaakhumme aya elapo ya wExiitu mpakha olelo-va’”.
16 Nave-tho Manase aahimwarexa ephome yinceene ya atthu oohittheka. Aahiwiiva atthu okhuma mpantta mmosa wa oYerusalemu mpakha mpantta mukina. Ohiya-vo, aahipaka etampi ya owiiriha atthu a oYuda ottheka ni opaka itthu sootakhala vamaithoni va Yehova.
17 Itthu sikina siiraneyale ni Manase, itthu sootheene aapanke awe ni itampi aapanke awe, soolempwa muliivuruni mwa soowiiraneya sa okathi wa mamwene a oYuda.
18 Nuumala-vo, Manase aahirowa omumula vamosa ni amuhavinre awe, ovithiwa exarti ya owannyawe, eyo piiyo, exarti ya Uza. Vano mwanawe, Amoni, aahikhala mwene nipuro nawe.
19 Amoni aarina iyaakha 22 okathi aakhanle awe mwene, nave aahilamulela iyaakha piili oYerusalemu. Maama awe aihaniwa Mexulemethi, mwaana mwaamuthiyana a Harusi a oYoteba.
20 Owo aanipaka itthu sootakhala vamaithoni va Yehova, ntoko iira awe paapa awe, Manase.
21 Amoni aanitthara iphiro sootheene paapa awe aatthara awe, nave aanirumeela ni okokhorela ilatarato soohiirya seiyo paapa awe aarumeela awe.
22 Siiso owo aahimunyanyala Yehova, Muluku a amuhavinre awe, nave, khaatthara ephiro ya Yehova.
23 Muhoolo mwaya, arumeyi a Amoni yaahimurukunuwela mwene Amoni, amwiiva owannyawe.
24 Masi, atthu a elapo ele, yaahiwiiva atthu ootheene yaamurukunuwenle mwene Amoni. Nto yaahimukhaliha mwene, Yosiya, mwaana a Amoni, nipuro nawe.
25 Itthu sikina siiraneyale ni Amoni, itthu aapanke awe, soolempwa muliivuruni mwa soowiiraneya sa okathi wa mamwene a oYuda.
26 Vano, Amoni aahivithiwa mahiye awe yaari oxarti ya Uza. Nto mwanawe, Yosiya, aahikhala mwene nipuro nawe.
Inoota
^ Nwehe Moolumo Ootthokiheriwa.
^ Nwehe Moolumo Ootthokiheriwa.
^ Nuulumo na eheeberi ninvarihana ni nuulumo ninrumeeliwa ehimmwaka “eturumu”, nave ninnirumeeliwa mwa enamuna yoonyohola.
