Mamwene a Nenli 24:1-20
24 Mahiku a Yoyakimi, Nabukodonosori mwene a oBabilonia aahimutuphela. Vano Yoyakimi aahikhala murumeyi awe iyaakha tthaaru. Nto, Yoyakimi aahimurukunuwela Nabukodonosori ohinamwiiwelela.
2 Vano Yehova aahipacerya omuroihela Yoyakimi ekrupu ya alavilavi yaakhuma oKhaldeya, oSiiria, oMowabi ni wAmoni. Owo aanaaroihela alavilavi awo wiira apwetexe oYuda, moovarihana ni moolumo a Yehova, aalavunle awe aarumeelaka arumeyi awe, maprofeta.
3 Tthiri, Yehova taarumme eyo okhumelela oYuda, wiira owoomole ohoolo wawe, mwaha wa itampi sootheene Manase aapanke awe,
4 ni mwaha woowiiva atthu oohittheka, okhala wiira aahisariha oYerusalemu ephome ya atthu oohittheka. Nto Yehova khaaphavela olevelela.
5 Itthu sikina siiraneyale ni Yoyakimi, itthu sootheene aapanke awe, soolempwa muliivuruni mwa soowiiraneya sa okathi wa mamwene a oYuda.
6 Vano Yoyakimi aahirowa omumula vamosa ni amuhavinre awe, nto mwanawe, Yoyakini aahikhala mwene nipuro nawe.
7 Mwene a wExiitu khaaphavenle-tho okhuma elapo awe, okhala wiira mwene a oBabilonia aahikuxa itthu sootheene saari sa mwene wa wExiitu, okhuma muro mwaamukhaani a wExiitu mpakha muro Eufrate.
8 Yoyakini aarina iyaakha 18 okathi aakhanle awe mwene, nave aahilamulela miyeeri miraru oYerusalemu. Maama awe aihaniwa Nehuxita, mwaana mwaamuthiyana a Elinataani, a oYerusalemu.
9 Owo khaahiyale opaka itthu sootakhala vamaithoni va Yehova, ottharaka itthu sootheene paapa awe aapanke awe.
10 Okathi ole, arumeyi a mwene Nabukodonosori a oBabilonia, yaahirowa otuphela oYerusalemu, vano epooma eyo yaahirukureriwa.
11 Mwene Nabukodonosori a oBabilonia aahirowa epooma eyo, nlelo arumeyi awe arukurenrye ene epooma eyo.
12 Yoyakini mwene a oYuda, aahiivahererya wa mwene a oBabilonia, vamosa ni maama awe, arumeyi awe, atthu awe aalupale a epooma vamosa ni mukhulupale awe. Nto, eyaakha ya neethanu neeraru ya olamulelo ya mwene a oBabilonia, aahaakuxa atthu awo ntoko ipottha.
13 Vano, owo aahikuxa mihakhu sootheene sa empa ya Yehova, ni mihakhu sa empa* ya mwene. Nave aahiikittha ipetaasu sene mireerelo sootheene sa eweero, Salomoni mwene a wIsarayeli aapanke awe wiira sirumeeliweke mutemplo mwa Yehova. Eyo yahiiraneya ntoko Yehova aahimyale awe khalai.
14 Owo aahaaroiha weepotthani atthu ootheene a oYerusalemu, eyo piiyo, atthu ootheene aalupale, anakhotto ootheene ootupa, ni atthu ootheene yaapaka itthu sa matera ni sa eyuuma.* Owo aahaaroiha weepotthani atthu 10.000. Atthu ootepexa ohaawa paahi a elapo ele ti yaahanle.
15 Siiso, aahimukuxa Yoyakini omuroihaka weepotthani oBabilonia. Nave-tho, aahaakuxa ntoko ipottha maama awe mwene, axaarawe mwene, mukhulupale awe, ni alopwana oovuwa a elapo ele, aakumihaka oYerusalemu aaroihaka oBabilonia.
16 Nave-tho, mwene a oBabilonia aahaaroiha weepotthani oBabilonia, anakhotto ootheene 7.000, vamosa ni alopwana 1.000 yaapaka itthu sa matera ni sa eyuuma,* ootheene aya yaari alopwana ootupa ni oosuwela owana ekhotto.
17 Mwene a oBabilonia aahimuthanla Mataniyahi, tiiyu awe Yoyakimi, wiira okhale mwene nipuro na Yoyakini. Nave aahituruka nsina nawe wiira iihaniweke Sedekiya.
18 Sedekiya aarina iyaakha 21 okathi aakhanle awe mwene, nave aahilamulela iyaakha 11 oYerusalemu. Maama awe aihaniwa Hamutali, mwaana mwaamuthiyana a Yeremiya, a oLibina.
19 Owo khaahiyale opaka itthu sootakhala vamaithoni va Yehova, ottharaka itthu sootheene Yoyakimi aapanke awe.
20 Itthu iya saahaakhumelela atthu a oYerusalemu ni a oYuda, mwaha wa onanariwa wa Yehova, mpakha owoomola atthu awo ohoolo wawe. Vano Sedekiya aahimurukunuwela mwene a oBabilonia.
Inoota
^ Aahiiso, “epalaasio”.
^ Aahiiso, woonasa wene: “yaateka itthu soolipihiwa”.
^ Aahiiso, woonasa wene: “yaateka itthu soolipihiwa”.
