Mamwene a Nenli 3:1-27
3 Yorami mwaana a Akhabi, aahikhala mwene a atthu a Isarayeli, oSamariya, eyaakha ya namuloko neethanu neeraru, ya mwene Yosafati a oYuda. Nave aahilamulela iyaakha 12.
2 Owo aanipaka itthu sootakhala vamaithoni va Yehova, masi khaatepana onvikana paapa awe ni maama awe, okhala wiira aahimala-maliha ipilaari sa Bayaali saakokhoreliwa, seiyo paapa awe aapanke awe.
3 Yorami aahipaka itampi simosa-ru sa Yerobowamu, mwaana a Nebathi, seiyo aawiirinhe awe aisarayeli ottheka. Owo khaahiyale opaka itampi iyo.
4 Mexa, mwene a oMowabi, aari mulipa aahuwa ipwittipwitthi, ni aanimuliva mpoosito mwene a wIsarayeli, ipwittipwitthi 100.000 saamukhaani ni ipwittipwitthi soolopwana soohimetthiwa 100.000.
5 Nuumala Akhabi okhwa, mwene a oMowabi aahimurukunuwela mwene a wIsarayeli.
6 Nihiku nle, mwene Yorami aahikhuma oSamariya aathukumanya aisarayeli ootheene.
7 Vano aahaaruma alopwana orowa omuleela mwene Yosafati a oYuda wiira: “Mwene a oMowabi ookirukunuwela. Kiireke munoorowa ni miyo otuphela oMowabi?” Owo aahaakhula wiira: “Aayo kinoorowa. Miyo kinrowa okhala ni nyuwo. Atthu aka anrowa okhala ni atthu anyu. Ikhavalo saka sinrowa okhala ni ikhavalo sanyu”.
8 Nuumala-vo, Yosafati aahimukoha oriki: “Ninrowa ephiro xeeni?” Yorami aahimwaakhula wiira: “Ninrowa ephiro ya woothakoni wa wEdomi”.
9 Vano mwene a wIsarayeli aahikhuma vamosa ni mwene a oYuda ni mwene a wEdomi. Nuumala mahiku 7 yeettaka, yaahaamalela maasi yaawurya aya anakhotto, ni maasi yaawuriwa ni inama yaakunxe aya.
10 Mwene a wIsarayeli aahihimya wiira: “Nootakhaliwa! Yehova ohaathukumanya mamwene ala mararu, iirelaka paahi waavahererya mmatatani mwa atthu a oMowabi!”
11 Yosafati aahikoha wiira: “Niireke khokhanle profeta a Yehova nikhanle ahu omukoha Yehova nimurumeelaka yoowo?” Mmosa a arumeyi a mwene a wIsarayeli aahaakhula oriki: “Ookhala Eliseyo, mwaana a Xafati, yoowo aari murumeyi a Eliya”.
12 Yosafati aahihimya wiira: “Yehova onnilavula omurumeelaka yena”. Nto mwene a wIsarayeli, Yosafati ni mwene a wEdomi yaahirowa opuro aari awe.
13 Eliseyo aahimukoha mwene a wIsarayeli oriki: “Exeeni kirina aka ni nyuwo? Murowe mwaakohe maprofeta a paapa anyu ni maprofeta a maama anyu”. Masi mwene a wIsarayeli aahihimya wiira: “Nnaari, maana Yehova ohaathukumanya mamwene ala mararu wiira aavahererye mmatatani mwa atthu a oMowabi”.
14 Eliseyo aahihimya wiira: “Ntoko siisaale Yehova a anakhotto yoowo kinimurumeela* aka onikhala awe, kahaamuthokorerya mwene Yosafati a oYuda, nkaarowa woowehani nnakhala woowiriyanani.
15 Vano mukiruuhele mulipa onimoopa viola”.* Nto okathi mulipa onimoopa viola aapacenrye awe omoopa, ikuru* sa Yehova saahimukhuruwela Eliseyo.
16 Nto Eliseyo aahihimya wiira: “Enihimya awe Yehova tiila: ‘Muthipe malitti okhatoni,*
17 maana enihimya awe Yehova tiila: “Khamunrowa oweha ettheku nnakhala epula. Ekhato ela enoosareya maasi munrowa anyu owurya, vamosa ni inama sanyu sa vate, ni inama sanyu sikina”’.
18 Masi, eyo khahiyo etthu vamaithoni va Yehova, okhala wiira onimwaavahererya mmatatani mwanyu atthu a oMowabi.
19 Mpwexakase ipooma saya sootheene soolipihiwa, ni ipooma saya sootheene sooloka, mwiikitthe miri sootheene sooloka, muttiyele ihime saya sootheene sa maasi ni mwiitthele maluku imatta saya wiira ahiwerye-tho olima”.
20 Voosiisu, okathi saavahiwa aya ipyo sa voosiisu, mootutuxerya yaahikhumelela maasi yaarwa mpantta wa wEdomi, nto ekhato ele yaahisareya maasi.
21 Atthu ootheene a oMowabi yaahisuwela wiira mamwene awo yaarwaale owana naawo, tivo yahaathukumanya alopwana ootheene yaawerya oteexa ikaruma sa ekhotto,* yaathata omukanoni.
22 Okathi yaavenyale aya voosiisu, nsuwa naanimwaleela mmaasini, vano atthu a oMowabi yaari mpantta mukina, anaweha maasi ooxeerya ntoko ephome.
23 Nto yaahihimya wiira: “Ela ephome ela! Mweekeekhai mamwene awo ahiivanana yaawo-ru ni espaata. Nyuwo atthu a oMowabi, nrowe nakuxe mireerelo saya!”
24 Okathi yaavolonwe aya opuro yaamanke aya atthu a Isarayeli, aisarayeli yaahaatuphela atthu a oMowabi enapacerya owiivakasa. Vano atthu awo a oMowabi yaahaatthyawa. Aisarayeli yaahikela muttetthe wa oMowabi, enawiivakasa atthu a oMowabi ewoomolaka.
25 Aisarayeli yaahipwexakasa ipooma, nave khula mutthu aahivonyerya maluku imatta sootheene sooreera, asarihaka maluku imatta iyo. Awo yaahittiyela ihime sootheene sa maasi ni yaahiikittha miri sootheene sooreera. Wanikisa waya, ixiri sa maluku paahi sa oKiri-Harexi ti saahanle, nto ale yaavonya afiska yaahirukurerya epooma eyo apwetexa.
26 Okathi mwene a oMowabi aawenhe awe wiira aahixinttiwa ekhotto ele, aahaakuxa alopwana 700 yaakunxe ispaata* wiira ahule ephiro mpakha wa mwene a wEdomi, masi khiyaawenrye.
27 Nto mwene a oMowabi, aahimukuxa mwanawe mwaamulopwana oopacerya oyariwa, yoowo aarowa olamulelaka nipuro nawe, onvaha ntoko mukuttho woopahiwa vaxirini. Okathi aisarayeli yaawenhe aya eyo yaahitikinihiwa vanceene, ahiya owana ekhotto anatthikela elapo aya.
Inoota
^ Eheeberi, “yoowo kineemela aka ohoolo wawe”.
^ Ekaruma ya isipo ya khalai, yeeyo enivirikana ni aviola a mahiku ala.
^ Eheeberi, “ntata”.
^ Aahiiso, “opuro woowaataleya”.
^ Aahiiso, “ootheene yaawara esintu”.
^ Aahiiso, “axoowa”.
