Mamwene a Nenli 5:1-27
5 Vano Naamaani xeefi a anakhotto a mwene a oSiiria, aari mulopwana oosuweliwa vanceene, ni aattittimihiwa ni pwiya awe, okhala wiira mwaha wa yoowo Yehova aahiwiiriha atthu a oSiiria oxintta. Owo aari nakhotto ootupa, nnaamwi aarina makokho.*
2 Ekwaha emosa yaaxinttale aya ekhotto, atthu a oSiiria yaahimukuxa mwaaruusi mmosa a elapo ya wIsarayeli, okhala murumeyi awe mwaarawe Naamaani.
3 Vano mwaaruusi owo aahimuleela pwiyamwene awe wiira: “Vaakhanle wiira pwiya aka aahimuxukurya profeta ori oSamariya, aamumpenuxa makokho awe”.
4 Owo* aahirowa omuleela pwiya awe itthu mwaaruusi ole a wIsarayeli aamulenle awe.
5 Vano mwene a atthu a oSiiria aahihimya wiira: “Murooke niinaano vaava! Miyo kinoomulepela ekarta mwene a wIsarayeli”. Nto Naamaani aahirowa, okunxe ene italento* 10 sa eparatha, musurukhu 6.000 wa eweero, ni ikuwo 10.
6 Mwene a oSiiria aahiroiha ekarta wa mwene a wIsarayeli, yeeyo yaahimya wiira: “Kinnooruhelani murumeyi aka Naamaani, yoowo oruuhale ekarta ela wiira mumpenuxe makokho awe”.
7 Nuumala mwene a wIsarayeli osoma ekarta ele, aahikhera ikuwo sawe onahimya wiira: “Kiireke miyo ka Muluku, kirina owerya woowiiva ni wowoopola okumi? Owo onkiruuhela mulopwana ola wiira kimpenuxe makokho awe! Mooneke moota onikaaverya awe mulattu”.
8 Nuumala Eliseyo, mulopwana a Muluku eekeekhai, wiiwa wiira mwene a wIsarayeli aahikhera ikuwo sawe, aahiruma orowa oleeliwa mwene owo wiira: “Xeeni muhalaka okhera ikuwo sanyu? Xontte, mmuhiye mulopwana owo orwe okumane ni miyo. Owo onoosuwela wiira wIsarayeli ookhala profeta”.
9 Vano Naamaani aahirowa ni ikhavalo sawe ni ikaaro sawe sa ekhotto, eemela vamukhora wa empa ya Eliseyo.
10 Masi Eliseyo aahimuruma mulopwana orowa omuleela wiira: “Murowe mwarape ikwaha 7 omuro Yordani, munoopenuwa, nave erutthu anyu enooreerihiwa”.
11 Nto Naamaani aahitikinihiwa onakhuma ohimyaka wiira: “Miyo kuupuwela wiira: ‘Owo aamukhuma, eemele ohoolo waka, ovekele mwa nsina na Yehova Muluku awe, oteexeryaka ntata nawe opuro kirina aka makokho, wiira okipenuxe’.
12 Kiireke Abana ni Farfari, miro sa oDamaasiko khahiyo sooloka ovikana miro sootheene sa wIsarayeli? Nkaakhanle oorapa miro seiyo wiira kipenuwe?” Nuumala-vo aahirukunuwa onarowa onanariwe ene.
13 Vano arumeyi awe yaahimwaattamela enamuhimeerya wiira: “Pwiya aka,* vaakhanle wiira profeta ohoorumani etthu yooxankiha, khimwaarowa opaka? Masi owo oohimenryeni paahi wiira: ‘Murape wiira mpenuwe’! Xeeni muhiniphavela anyu opaka eyo?”
14 Siiso, Naamaani aahirowa omuro Yordani, osama mmaasini ikwaha 7, moovarihana ni moolumo a mulopwana a Muluku eekeekhai. Moottharelana, erutthu awe yaahireerihiwa enalikana ni erutthu ya mwanamwane, openuwa.
15 Nuumala-vo, owo vamosa ni alopwana awe ootheene yaahirowa wa mulopwana a Muluku eekeekhai, yeemela ohoolo wawe enahimya wiira: “Vano koosuwela wiira khokhanle Muluku mukina valaponi, ohikhanle wIsarayeli. Nto, xontte, mwaakhelele yoovaha ya murumeyi anyu”.
16 Masi, Eliseyo aahihimya wiira: “Ntoko siisaale Yehova, yoowo kinimurumeela aka* onikhala awe, nkinaakhelela yoovaha ela”. Naamaani aahimuthipelela wiira aakhele, masi Eliseyo aahithipelela okhootta.
17 Wanikisa waya, Naamaani aahihimya wiira: “Okhala wiira khamuniphavela, xontte, mmweemererye murumeyi anyu ola ovahiwa etthaya ya elapo ela, eniphiyerya okuxiwa ni inama piili siniihaniwa muula, mwaha woowi murumeyi anyu ola khontthikela-tho waavaha mikuttho soopahiwa nnakhala mikuttho sikina amuluku akina, ohikhanle paahi Yehova.
18 Masi Yehova omulevelele murumeyi anyu mwaha wa etthu ela: Okathi pwiya aka mwene onkela awe empa ya Rimoni, onakokhora ohoolo wawe onnikivarela moono, nave miyo kinnikokhora mpaani* mwa Rimoni. Okathi kinkokhora aka mpaani mwa Rimoni, xontte, Yehova omulevelele murumeyi awe ola, mwaha wa etthu ela”.
19 Vano Eliseyo aahimuleela wiira: “Murooke ni murettele”. Nuumala okhuma, eettale ene vanceene,
20 Gehazi, murumeyi a Eliseyo, mulopwana a Muluku eekeekhai, ahuupuwela wiira: ‘Pwiya aka oomuhiya musiiria Naamaani, orowaka oheemerenrye itthu oruuhale awe. Ntoko siisaale Yehova onikhala awe, kinoomutthimakela, wiira akivahe etthu’.
21 Gehazi aahimutthimakela Naamaani. Okathi Naamaani anwehale awe mutthu omutthimakela aka, aahikhuruwa vakaaroni vawe ya ekhotto, wiira akumane nuuwo, onamukoha wiira: “Salaama?”
22 Owo ahaakhula oriki: “Aayo, salaama. Pwiya aka ookiruma oriki: ‘Aaphiya niinaano-va anamwane anli a anamwane a maprofeta, akhumaka muttetthe wa omiyaakoni wa wEfrayimi. Xontte, mwaavahe etalento emosa ya eparatha ni ikuwo piili’”.
23 Naamaani aahihimya wiira: “Mukuxeke italento piili”. Naamaani aahimuthipelela, okuxa italento piili sa eparatha, ikuwo piili, ohela mirupa miili, aavahererya arumeyi awe yaawo yaamukuxenrye Gehazi.
24 Okathi aaphiyale awe wOfeli,* owo aahikuxa mirupa iyo mmatatani mwa arumeyi ale, opweha mpaani. Nuumala-vo aahaaruma alopwana ale orowa. Okathi alopwana ale yaaronwe aya,
25 Gehazi aahivolowa mpaani, eemela ohoolo wa pwiya awe. Vano Eliseyo aahimukoha oriki: “Gehazi, munkhuma woowi?” Masi owo aahaakhula oriki: “Murumeyi anyu kheettale mukwaha”.
26 Eliseyo aahimukoha wiira: “Kiireke murima aka khiwaakhanle ni nyuwo okathi mulopwana ole aakhurunwe awe ekaaro awe ya ekhotto orowaka okumana ni nyuwo? Kiireke ola okathi woowaakhela eparatha, ikuwo, mihokorokho sa olivera, mihokorokho sa ewuuva, ipwittipwitthi, ipooyi, arumeyi axilopwana ni arumeyi axithiyana?
27 Vano makokho a Naamaani anrowa okhala ni nyuwo, vamosa ni osuulu anyu mahiku ootheene”. Moowaakuveya Gehazi aahikhuma ohoolo wa Eliseyo orina ene makokho, ottenle ene ntoko eneevi.
Inoota
^ Aahiiso, “makuttula; maretta”.
^ Woonasa wene onihimmwa Namaani.
^ Etalento emosa yaalemela ikiilu 34.2. Munwehe Apendise B14.
^ Eheeberi, “Paapa”.
^ Eheeberi, “kineemela aka ohoolo wawe”.
^ Aahiiso, “mutemplo”.
^ Opuro omosa wa oSamariya, woonasa wene mwaako aahiiso opuro woolipihiwa.
