Samuweli a Nenli 1:1-27
1 Nuumala Sawuli okhwa, Davidi aahihokolowa vaaronwe awe owana ni atthu a wAmaleki, okhala mahiku manli oSikilaki.
2 Nihiku na neeraru, aahirwa mulopwana mmosa aakhuma okhottoni aawana awe Sawuli, ikuwo sawe sikhereyale ene ni osareyale ene ntthupi mmuruni. Okathi aamwaattamenle awe Davidi, aahikokhora uuramaka mpakha vathi.
3 Vano Davidi aahimukoha wiira: “Munikhuma vai?” Owo aahaakhula oriki: “Kitthyanwe okhottoni, opuro aisarayeli aniwana aya”.
4 Davidi aahimukoha-tho wiira: “Exeeni ekhumelenle? Xontte mukileele”. Owo aahaakhula oriki: “Anakhotto aatthyawa okhottoni, nave anceene aavulala ni ahookhwa. Hata Sawuli ni mwanawe, Yonathani, ahookhwa”.
5 Davidi aahimukoha mulopwana ole aaruuhale ihapari iye oriki: “Musuwenle sai wiira Sawuli ni mwanawe, Yonathani, ahookhwa?”
6 Mulopwana owo aahaakhula oriki: “Kaari omwaako Xilbowa, ni kaahimoona Sawuli iimorihenle ene vasulu va nivaka nawe, ikaaro sa ekhotto ni anakhavalo yaanimwaattamela.
7 Okathi aarukununwe awe aahikoona, okiihana, nto miyo kaahaakhula wiira: ‘Miyo kiri-va!’
8 Sawuli aahikikoha wiira: ‘Nyuwo mwa pani?’ Miyo kaahimwaakhula wiira: ‘Miyo ka mutthu a wAmaleki’.
9 Owo aahihimya wiira: ‘Xontte murwe mukiive,* okhala wiira nkireere woona owereya, masi nlelo kinnimumula’.
10 Vano, kaahirowa kimwiiva, okhala wiira kaahisuwela wiira khaarowa okhala mukumi, maana khaareere ovulalihiwa. Nto kaahimurula ekhara ya omwene ni epulseera yaari mmoononi mwawe, tiiya kiruuhale aka wa pwiya aka”.
11 Nuumala-vo, Davidi aahikhera soowara sawe ni alopwana ootheene yaarina awe, yaahipaka etthu emosa-ru.
12 Awo yaahikhupanyerya, yaahinla ni yaahitthukwa mpakha ohiyu, mwaha wa Sawuli, Yonathani, atthu a Yehova ni atthu a etthoko ya Isarayeli okhala wiira yaiviwe ni espaata.
13 Davidi aahimukoha mmiravo ole aaruuhale ihapari oriki: “Munikhuma vai?” Owo aahaakhula wiira: “Miyo ka mwaana a mutthu a wAmaleki, onikhala wIsarayeli”.
14 Davidi aahimukoha oriki: “Xeeni muhoovale anyu omwiiva mutthu aathanliwe ni Yehova?”
15 Vano, Davidi aahimwiihana mmiravo awe mmosa, onamuhimeerya wiira: “Mweemele-va, mmwiive mulopwana ola”. Nto mmiravo owo aahimutuphela, omwiiva.
16 Davidi aahimuhimeerya wiira: “Nyuwo mookhalana mulattu mwaha wa okhwa wanyu, maana eyano anyu yoovaha onamoona eriki: ‘Miyo koomwiiva ole othanliwe ni Yehova’”.
17 Davidi aahiipa nsipo na masikho mwaha wa Sawuli ni mwanawe, Yonathani,
18 ni aahihimya wiira naahaana wiixuttihiwa atthu a oYuda. Nsipo nno, nniihaniwa “Nsipo na Muura”, nlempwale eliivuru ya Yaxari, nnihimya wiira:
19 “Oreera wanyu, khoo Isarayeli, woomalamalela omwaako.
Mooweha moota atthu a ikuru yaiviwe aya okhottoni!
20 Muhilaleye etthu ela oGathi;Aahiiso muhilaleye istaraata sa wAxikeloni,Wiira anamwane axithiyana a afilisti ahitthape,Aahiiso wiira anamwane axithiyana a alopwana oohinnuwihiwa ahiivuwihe.
21 Nyuwo miyaako sa oXilibowa,Muhiimeke okame, nnakhala muhirupeliwe epula,Hata imatta sihiimeke mihokorokho sinivahiwa Muluku,Okhala wiira ti vaavo eskuutu ya alipa a ikuru yahaattittimihiwe aya,Nave eskuutu ya Sawuli khettikittheliwe-tho makhura.
22 Muura wa Yonathani ni espaata ya Sawuli,Yaanisareya ephome ya awanani anyu,Ni yaanikela mukortuurani* mwa anakhotto, awo khiyaafalyari.
23 Sawuli ni Yonathani yaaniphentiwa vanceene okathi yaari aya akumi,Ni wookhwaani khavalaanyiwe.
Awo yaari ootepa otthyawa waavikana axaaka,Ni yaari a ikuru waavikana akharamu.
24 Khoo anamwane axithiyana a Isarayeli, mmunlele Sawuli,Yoowo oowarihani ikuwo sooxeerya ni ooreerihani,Yoowo aareeriha ikuwo sanyu ni eweero.
25 Okhottoni khareere okhwa atthu ootupa!
Yonathani ohookhwa omwaako!
26 Kooriipiwa murima vanceene mwaha wa nyuwo, munnaka Yonathani;Nyuwo mwaanikiphenta vanceene.
Okiphenta wanyu waari wuulupale ovikana ophenta wa athiyana.
27 Khareere okhwa ootupa,Ni ikaruma sa ekhotto soopwetexiwa!”
