Samuweli a Nenli 10:1-19
-
Oxinttiwa wa atthu a wAmoni ni a oSiiria (1-19)
10 Nuuvira okathi, mwene a wAmoni aahikhwa, nto mwanawe aihaniwa Hanuni aahikhala mwene nipuro nawe.
2 Nto Davidi aahihimya wiira: “Kinoomooniherya ophenta woororomeleya Hanuni, mwaana a Nahaxi ntoko paapa awe aakoonihenrye awe ophenta woororomeleya”. Tivo Davidi aahaaruma arumeyi awe orowa ommaaliha Hanuni mwaha wookhweliwa paapa awe. Masi okathi arumeyi a Davidi yaaphiyale aya elapo ya wAmoni,
3 makhulupale a wAmoni yaahimuleela Hanuni pwiya aya ariki: “Munuupuwela wiira Davidi onimoottittimihani ohalaka waaruma atthu wiira arwe yoomaaliheni? Davidi ohaaruma arumeyi awe wiira arwe awehawehe epooma, ahottele ni apwetexe”.
4 Hanuni aahaavara arumeyi a Davidi, aamettha mpantta mmosa wa ereru aya, othikila malaya aya mpakha muyuununi, nuumala-vo owoomola.
5 Okathi Davidi aaleeliwa awe aahaaruma alopwana orowa okumana ni arumeyi awe, okhala wiira khiyaareere wuulihihiwa muru. Nto mwene aahaaleela wiira: “Muhale oYeriko mpakha ereru anyu wunnuwa, nuumala-vo mutthikeke”.
6 Nuuvira okathi, atthu a wAmoni yaahiweha wiira Davidi aahinanariwa. Nto atthu a wAmoni yaahiruma wiihaniwa anakhotto 20.000 yeetta mwentto a oSiiria wa oBethi-Rehobi ni oSiiria wa oSoba. Nave-tho yaahimwiihana mwene a oMaaka ni alopwana 1.000, ni alopwana 12.000 a wIxitobi.*
7 Okathi Davidi aiwale awe eyo, aahimuruma Yowabi ni anakhotto awe ootheene, waahela muhina anakhotto awe ootupa.
8 Atthu a wAmoni yaahikhuma mpooma ni yaahiilokiherya wiira awane ekhotto vamukhora wa epooma. Atthu a oSiiria wa oSoba, ni a oRehobi, vamosa ni atthu a wIxitobi* ni a oMaaka, yaahiilokiherya yeemela opuro woowaataleya.
9 Okathi Yowabi oonale awe wiira anakhotto yaanimurweela ohoolo ni ottuli, aahaathanla atoropa oosuwela owana ekhotto a wIsarayeli, aalokiherya wiira yawane ekhotto ni atthu a oSiiria.
10 Owo aahaahiya anakhotto akina ahooleliwaka* ni munnawe aihaniwa Abixayi, wiira aalokiherye owana ekhotto ni atthu a wAmoni.
11 Vano, Yowabi aahihimya wiira: “Vakhala wiira atthu a oSiiria anrowa okhala ootupa okivikana miyo, murwe mukaakihe. Masi, vakhala wiira atthu a wAmoni anrowa okhala ootupa woovikanani nyuwo, kinimoorwa owaakihani.
12 Niilipihe, niwaneke moolipa murima niwaakihaka atthu ahu ni ipooma sa Muluku ahu. Nto Yehova onoopaka ele onoona awe oreerela vamaithoni vawe”.
13 Nto Yowabi ni alopwana awe yaahirowa owana ni atthu a oSiiria, vano atthu awo yaahimutthyawa.
14 Okathi atthu a wAmoni yoonale aya wiira atthu a oSiriia yaahitthyawa, nave awo yaahimutthyawa Abixayi, akela mpooma. Nuumala Yowabi owana ekhotto ni atthu a wAmoni, yaahitthikela oYerusalemu.
15 Okathi atthu a oSiiria yoonale aya wiira yaahiweriwa ni atthu a Isarayeli, yaahithukumana-tho.
16 Moottharelana, Hadadezeri aahiruma wiihaniwa atthu a oSiiria yaakhala muttetthe wa muro Eufrate, nto awo yaahirwa oHelami, ahooleliwaka ni Xobaki, xeefi a anakhotto a Hadadezeri.
17 Okathi Davidi aaleeliwa awe, mowaakuveya aahaathukumanya atthu ootheene a Isarayeli, olapuwela ekhopela ekina ya muro Yordani, ophiya oHelami. Vano, atthu a oSiiria yaahiilokiherya ni yaahiwana ekhotto ni Davidi.
18 Masi atthu a oSiiria yaahaatthyawa atthu a Isarayeli. Vano Davidi aahiwiiva anakhotto 700 yeettiha ikaaro sa ekhotto ni anakhavalo 40.000 a oSiiria, nave aahinvulaliha Xobaki, xeefi a anakhotto aya, yoowo aakhwenle weiwo.
19 Okathi mamwene ootheene, yaawo yaamurumeela Hadadezeri, yoonale aya wiira yaahiweriwa ni atthu a Isarayeli, yaahikumiherya murettele ni atthu a Isarayeli, anawiiwelela yaawo. Nto mwaha wowoova, atthu a oSiiria yaahihiya waakhaliherya atthu a wAmoni.
