Samuweli a Nenli 11:1-27
11 Woopaceryani wa eyaakha,* okathi mamwene yaarowa aya okhottoni, Davidi aahimuruma Yowabi, ni arumeyi awe, ni anakhotto ootheene a Isarayeli wiira yaapwetexe atthu a wAmoni. Nto awo yaahirowa arukurerya oRaba, vano Davidi aahanle oYerusalemu.
2 Nihiku nimosa makaaripi,* Davidi aahivenya vakhaamani vawe, onarowa weettakasa vasulu va empa ya mwene.* Ori ene vasulu vaavo, aahimoona muthiyana orapaka. Muthiyana owo aari ooreera vanceene.
3 Davidi aahiruma okohereriwa muthiyana ole, nto aahileeliwa wiira: “Muthiyana ole Bati-Xeba, mwaana a Eliyami, mwaarawe Uriya, muhiti”.
4 Moottharelana, Davidi aahiruma wiira oruuheliwe muthiyana ole. Nto muthiyana owo aahirwa, Davidi orupana. (Eyo yiiraneyale okathi muthiyana owo aireeriha awe mwaha wa mwiikho* aarina awe.) Nuumala-vo, muthiyana owo aahitthikela owannyawe.
5 Muthiyana owo aahirupala, nto aahiruma oleeliwa Davidi wiira: “Koorupala”.
6 Nuumala-vo Davidi aahiruma oleeliwa Yowabi wiira: “Mukiruuhele Uriya, muhiti”. Nto Yowabi aahimuroihela Uriya Davidi.
7 Okathi Uriya aaphiyale awe, Davidi aahimukoha ihaali sa Yowabi, ihaali sa atoropa, ni moota itthu seetta aya okhottoni.
8 Davidi aahimuleela Uriya wiira: “Murooke owannyu mwaphumuryeke”.* Okathi Uriya aakhuma awe etthoko ya mwene, aahiroiheliwa yoovaha ya mwene.*
9 Masi Uriya khaaronwe owannyawe. Uriya aarumpe vamukhora va empa ya mwene, ni arumeyi ootheene a pwiya awe.
10 Davidi aahileeliwa wiira: “Uriya khoronwe owannyawe”. Nuumala-vo Davidi aahimukoha Uriya oriki: “Khamutthinke mukwaha niinaano? Xeeni muhironwe anyu owaani?”
11 Uriya aahimwakhula Davidi oriki: “Nivuku na nivarihano niri mutentani, nave anakhotto a Isarayeli ni a oYuda ari mutentani, nave xeefi aka Yowabi ni arumeyi a pwiya aka, ari mmathalani. Nto kaarowa owerya sai orowa owannyaka wiira kalye ni owurya ni orupa ni amwaaraka? Ntoko siisaale munikhala anyu, ni muri anyu mukumi, miyo nkinipaka etthu eyo!”
12 Davidi aahimuleela Uriya wiira: “Mukhale vaava olelo, meelo kinimoohiyani wiira murooke”. Uriya aahikhala oYerusalemu nihiku nle, ni nihiku naattharelana.
13 Vano Davidi aahimwiihaniha Uriya wiira olye ni owurye ni yena, nto Davidi aahimuhapaliha Uriya. Masi Uriya khaaphavenle orowa owannyawe. Ohiyu aahikhuma orowaka orupa vakhaamani vawe ni arumeyi a pwiya awe.
14 Voosiisu ene, Davidi aahilepa ekarta onvahererya Uriya wiira anvahe Yowabi.
15 Davidi aahilepa mukartani-mmo oriki: “Mmuroihe Uriya ohoolo weiwo ekhotto ehireere aya oviha. Nuumala-vo, mmuhiye mekhawe wiira otupheliwe ni iiviwe”.
16 Yowabi aahiwehaweha oratteene epooma ele, ni aahimuhiya Uriya opuro aasuwela awe wiira yaahikhala anakhotto ootupa.
17 Okathi alopwana a epooma ele yaakhumme aya, anawana ni Yowabi, arumeyi akina a Davidi yaahikhwa, nave Uriya, muhiti, aari ekrupu ya atthu yaale yaakhwiiye.
18 Vano Yowabi aahimuleela Davidi ihapari sootheene siiraneyale okhottoni.
19 Owo aahimuleela mulopwana mmosa wiira: “Okathi munrowa anyu omaliha omuleela itthu sootheene mwene sikhumelenle okhottoni,
20 woonasa wene mwene onoonanariwa ni onookoha wiira: ‘Xeeni muhalaka orowa owana waattamela epooma? Khimwaasuwela wiira yaamoolathani ni mattheere ari ene vasulu va ixiri?
21 Tani omwiivale Abimeleki mwaana a Yerubeseti? Khahiyo aari muthiyana mmosa aavonnye nluku na nxilo ori ene osulu wa ixiri, omwiiva oTebesi? Xeeni nyuwo muhalaka waattamela ixiri?’ Nuumala-vo, mwahimye wiira: ‘Murumeyi anyu Uriya, muhiti, nave ohookhwa’”.
22 Nto mulopwana ole aahirowa omuleela Davidi itthu sootheene Yowabi aamulenle awe.
23 Mulopwana owo aahimuleela Davidi wiira: “Awanani ahu yaari ootupa onivikana hiyo, nto okathi yaakhumme aya arwaaka owana ni hiyo omathalani, hiyo naahiwoomola mpakha vamukhora wa epooma.
24 Alopwana yaavonya mattheere ari ene vasulu va ixiri, yaahaahoma arumeyi anyu, nto arumeyi akina a mwene ahookhwa. Nave-tho murumeyi anyu Uriya, muhiti ohookhwa”.
25 Davidi aahimuleela mulopwana owo oriki: “Mwamulele Yowabi wiira: ‘Muhixanke mwaha wa yeeyo, okhala wiira espaata khemmuthanla mutthu, nvihihe ekhotto epooma eyo ni mukuxe’. Ohiya-vo, mwamulipihe”.
26 Okathi mwaara awe Uriya aasuwenle awe wiira iyawe aahikhwa, aahipacerya omunlela.
27 Moowaakuveya, waamanle aya okathi woowunla, Davidi aahiruma wiira oruuheliwe owannyawe mwaarawe Uriya, nto aahimuthela ni ahiyareliwa mwaana. Masi itthu Davidi aapanke awe, khisaamusivenle* Yehova.
Inoota
^ Eyo piiyo, nuuvira okathi wooriirya. Eyo yiiraneya mweeri wa março aahiiso abril. Munwehe Apendise B15.
^ Aahiiso, “oxekuwa”.
^ Aahiiso, “epalaasio”.
^ Woonasa wene onihimmwa mwiikho muthiyana onikhalana awe khula mweeri.
^ Eheeberi, “mwarapihe inawu sanyu”.
^ Eyo piiyo, yoovaha ya mwaneene etthoko oninvahawe muletto oottittimiheya.
^ Eheeberi, “saari soohiloka ohoolo wa”.
