Samuweli a Nenli 13:1-39
13 Absalomi, mwaana a Davidi, aahikhalana murokora awe ooreera aihaniwa Tamari. Aminoni mwaana a Davidi, aahisiveliwa vanceene ni muthiyana owo.
2 Aminoni aahixanka vanceene mpakha opacerya owereiwa mwaha wa murokora awe Tamari, okhala wiira Tamari khaatonko orupa ni mulopwana. Nto Aminoni uupuwela wiira khaawerya omwiiriha etthu.
3 Aminoni aahikhalana mpatthani awe aihaniwa Yonadabi, mwaana a Ximeya, munnawe Davidi. Yonadabi aari mutthu a miruku.
4 Siiso, Yonadabi aahimukoha Aminoni oriki: “Xeeni nyuwo mwaana a mwene, munimakela anyu oriipiwa murima khula nihiku? Xeeni muhikileelaka?” Aminoni aahimwaakhula oriki: “Tamari, murokorawe munnaka Absalomi, orookisivela”.
5 Yonadabi aahimuhimeerya wiira: “Mwampaathi vakhaamani vanyu mukhaleke ntoko munoowereiwa. Okathi paapa anyu onrwa awe wooxukuryani, mmuhimeerye wiira: ‘Xontte, mmuleele murokoraka Tamari wiira orwe okivaheke yoolya.* Okathi onrowa awe olokiherya yoolya kinwehaka, kinimoolya mmatatani mwawe’”.
6 Vano, Aminoni aahimmaathi onakhala ntoko onoowereiwa, nto mwene aahirowa omuxukurya. Aminoni aahimuhimeerya mwene wiira: “Xontte, mmuleele murokoraka Tamari wiira orwe, ooxe iboolu piili sinlikana ni murima kinwehaka, wiira kilye mmatatani mwawe”.
7 Davidi aahaaruma atthu orowa owannyawe Tamari omuleela wiira: “Xontte, murowe owannyawe murokorinyu Aminoni mwalokiherye yoolya wiira olye”.
8 Siiso, Tamari aahirowa owannyawe murokorawe, Aminoni, weiwo ammaathale awe. Tamari aahikuxa otthu,* eetheya murokorawe onwehaka, ooxa iboolu.
9 Moottharelana, Tamari aahikuxa iboolu onvaha Aminoni. Masi Aminoni aahikhootta olya, onaahimeerya atthu ootheene wiira: “Mukhumase-va!” Nto atthu ootheene yaahikhuma.
10 Aminoni aahimuhimeerya Tamari wiira: “Mukiruuhele yoolya eyo okwaartu nno, wiira kilye mmatatani mwanyu”. Siiso, Tamari aahikuxa iboolu aapanke awe saalikana ni murima, omuroihela murokorawe Aminoni, okwaartu.
11 Okathi Tamari aamuroihenle awe yoolya, Aminoni aahinvara onahimya wiira: “Murokoraka, murwe nno murupe ni miyo”.
12 Masi, Tamari aahimuhimeerya wiira: “Nnaari, murokoraka! Muhikuulihihe muru, okhala wiira wIsarayeli khenipakiwa etthu ntoko eyo. Muhipake etthu eyo yoowuuliha muru.
13 Kinrowa owerya sai okhala ni etthu ela yoowuuliha muru? Nave nyuwo munrowa othokoreriwaka ntoko mulopwana oohiloka wIsarayeli. Xontte mulavule ni mwene, okhala wiira owo khonrowa wookhoottiheryani okithela”.
14 Masi Aminoni khaaphavenle onwiriyana, nto aahimutuphela Tamari omuulihiha muru omurupihaka.
15 Moottharelana, Aminoni aahipacerya omunyokha vanceene Tamari, nto omunyokha wawe waari wuulupale ovikana moota amphenta awe. Aminoni aahimuhimeerya Tamari wiira: “Nvenye-va, muroweke!”
16 Tamari aahimuhimeerya Aminoni wiira: “Nnaari, murokoraka, okoomola onrowa okhala wootepa otakhala ovikana etthu mukiirinhe anyu!” Masi Aminoni aahikhootta onwiriyana Tamari.
17 Siiso Aminoni aahimwiihana murumeyi awe, omuhimeerya wiira: “Mmukumihe mutthu ola ohoolo waka, ni nwale mukhora owo”.
18 (Tamari aawanre ikuwo sooreera seiyo saawariwa ni anamwane axithiyana a mwene yahaatonko orupa ni mulopwana.) Nto murumeyi awe Aminoni aahimukumiherya ota Tamari, owala mukhora.
19 Moottharelana Tamari aahiihela ettuurwa vamuru, okhera ikuwo sooreera aawanre awe. Owo aahiireya miyoono,* onanla eettaka.
20 Vano Absalomi aahimukoha murokorawe, Tamari, wiira: “Owiirinheni etthu ela murokorinyu Aminoni? Mmaale siiso, murokoraka, okhala wiira ole murokorinyu. Muhixanke mwaha wa etthu ela”. Vano Tamari aahikhala owannyawe Absalomi, murokorawe, ohooniwaka ni atthu akina.
21 Okathi mwene Davidi aiwale awe itthu iya sootheene, aahinanariwa vanceene, masi khaaphavela omuriipiha murima Aminoni, okhala wiira aanimphenta, ni mwaha woowi aari mwanawe oopacerya omuyara.
22 Absalomi khaamuhimenrye etthu Aminoni, nnakhala yootakhala aahiiso yooreera. Masi Absalomi aanimunyokha Aminoni mwaha woomulihiha muru murokorawe, Tamari.
23 Nuuvira iyaakha piili, alipa-oomettha ipwittipwitthi sa Absalomi yaari oBayali-Hasori, waattamela wEfrayimi. Nto Absalomi aahaalattula anamwane ootheene a mwene wiira arowe weiwo.
24 Siiso Absalomi aahirowa wa mwene onamuhimeerya wiira: “Ipwittipwitthi sa murumeyi anyu sinoometthiwa. Xontte, kinveka wiira mwene ni arumeyi awe arowe ni miyo”.
25 Masi mwene aahimuhimeerya Absalomi wiira: “Nnaari, mwanaka. Ootheene ahu narowa nnimoovahani muteko muulupale”. Nnaamwi Absalomi aamuthipelenle mwene, owo khaaphavenle orowa, masi aahimureeliha.
26 Absalomi aahihimya wiira: “Mwaahiphaveleke orowa, xontte mmuhiye munnaka Aminoni, orowe ni hiyo”. Nto mwene aahimukoha wiira: “Xeeni owo okhanle awe oorowa ni nyuwo?”
27 Masi Absalomi aahimuthipelela mwene, nto owo aahimuruma Aminoni ni anamwane ootheene orowa ni yena.
28 Moottharelana, Absalomi aahaaruma arumeyi awe oriki: “Mwiiwe, okathi Aminoni onrowa awe otteeliwa murima mwaha wa eviinyu, kinimoohimeeryani wiira mmwiive Aminoni. Nto nyuwo muhaana omwiiva. Muhoove etthu. Kiira ti miyo kinoorumani? Mwiilipihe ni mulipe murima”.
29 Arumeyi a Absalomi yaahimwiiriha Aminoni siisaale ene yaarummwale aya ni Absalomi. Nuumala-vo, anamwane ootheene a mwene yaahivenya, khula mmosa onwela mwaamunama awe oniihaniwa muula onatthyawa.
30 Okathi anamwane awo yaatthyawa aya, Davidi aahiiwa ihapari saahimya wiira: “Absalomi oowiiva anamwane ootheene a mwene, nave khuuvo ooponwe”.
31 Vano mwene aahivenya, okhera ikuwo sawe, ompaathi vathi. Nave arumeyi ootheene aarina awe yaahikhera ikuwo saya.
32 Masi Yonadabi, mwaana a Ximeya, munnawe Davidi, aahihimya wiira: “Nyuwo pwiyaka muhuupuwele wiira anamwane ootheene a mwene ahiiviwa, okhala wiira okhwiiye paahi ti Aminoni. Eyo ehiiraneya mwaha woowi Absalomi aahilakela opaka eyo, okhuma nihiku Aminoni aamuulihinhe awe muru murokorawe, Tamari.
33 Vano, pwiyaka mwene muhiwiriyane* ihapari iyo sinihimya wiira, ‘Anamwane ootheene a mwene ahiiviwa’. Okhwiiye paahi ti Aminoni”.
34 Nto, Absalomi aahitthyawa. Muhoolo mwaya, mulipa-oowehaweha aahiwoona atthu anceene erwaaka ottuli wawe akhumaka ephiro yaavira waattamela omwaako.
35 Vano Yonadabi aahimuleela mwene wiira: “Mooneke! Anamwane a mwene aatthika. Tthiri, ehiiraneya ntoko murumeyi anyu aahimmye awe”.
36 Omalaka-ru olavula, anamwane a mwene yaahiphiya, yinlaka vanceene. Nave-tho, mwene ni arumeyi awe ootheene yaahinla vanceene.
37 Masi Absalomi aahitthyawa, orowa owannyawe Talimayi mwaana a Amihudi, mwene a oXesuri. Davidi aahiviriha mahiku manceene omunlelaka mwanawe aakhwiiye.
38 Nuumala Absalomi otthyawela oXesuri, aahikhala weiwo iyaakha tthaaru.
39 Vano, mwene Davidi aaniphavela orowa onweha Absalomi, okhala wiira aahimaaleleya ni okhwa wa mwanawe Aminoni.
Inoota
^ Eyo piiyo, yoolya para muretta.
^ Aahiiso, “ephepa”.
^ Aahiiso, “aahipwexerya miyoono vamuru”.
^ Eheeberi, “muhihele vamurimani”.
