Samuweli a Nenli 14:1-33
14 Vano Yowabi mwaana a Seruwiya aahisuwela wiira mwene aahinkheliwa ni Absalomi.
2 Yowabi aahiruma oroweliwa muthiyana a miruku oTekowa, omuhimeerya wiira: “Xontte, moothererye wiira mookhweliwa, nave nware ikuwo sinooniherya wiira mookhweliwa, ni muhootte makhura. Mukhaleke ntoko muthiyana onimunlela mutthu okhwiiye khalai.
3 Vano murowe wa mwene mwamuhimeerye itthu kinrowa aka wooleelani”. Siiso Yowabi aahimuleela muthiyana owo etthu yoohimya.
4 Muthiyana ole a oTekowa aahirowa wa mwene okokhora, uurama mpakha vathi onamuhimeerya wiira: “Khoo mwene, mukikhaliherye!”
5 Mwene aahimukoha muthiyana owo oriki: “Exeeni enooxankihani?” Nto muthiyana owo aahaakhula oriki: “Miyo ka naamukhweli. Iyaka orimookhwa.
6 Nave miyo, murumeyi anyu, kaahikhalana anamwane anli axilopwana, nto oowanli aya yaanwana omatta. Khuuvo aawerya owaakiha, vano mmosa aahimwiiva mukhwaawe.
7 Vano amusi ootheene aakirukunuwela miyo, murumeyi anyu, anahimya wiira: ‘Munivahererye ole omwiivale munnawe, wiira nimwiive mwaha woomwiiva munna awe, hata ohirowaka ohala mutthu onrowa waakhela itthu sa paapa awe!’ Awo amphavela omala-maliha ororomela waka wookiserya, nave-tho nsina na iyaka ninrowa okhwela-khwela, nihihalane nloko naya vathi-va”.
8 Mwene aahimuleela muthiyana ole wiira: “Murooke owannyinyu, kinimwaaruma atthu ophuka mwaha anyu”.
9 Siiso muthiyana owo a oTekowa aahimuleela mwene wiira: “Khoo pwiyaka mwene, mulattu ola okhale wawaka ni wa atthu a etthoko ya paapa aka, mwene ni ehice awe ahikhalane mulattu”.
10 Mwene aahaakhula wiira: “Akhala mutthu onrowa otthikela olavula mwaha owo ni nyuwo, mukiruuhele, khonrowa otthikela wooxankihani”.
11 Masi muthiyana owo aahihimya wiira: “Xontte, mwene aka, mmuupuwele Yehova Muluku anyu, wiira mulipa-oowunla ikuhu ohimwiirihe etthu yootakhala ni omwiive mwanaka”. Siiso mwene aahihimya wiira: “Ntoko siisaale Yehova onikhala awe, khiivo ekharari ya mmuru ya mwaninyu enrowa omorela vathi”.
12 Muthiyana owo aahihimya wiira: “Xontte mmweemererye murumeyi anyu ola, ooleeleni etthu emosa nyuwo pwiyaka mwene”. Nto mwene aahaakhula oriki: “Mulavuleke!”
13 Muthiyana owo aahihimya wiira: “Vakhala wiira ti siiso, xeeni munuupuwela anyu owiirela etthu emosa-ru atthu a Muluku? Mwene aalavulaka siiso onniilamula mmansawe okhala wiira oomoomola mwanawe ni khoniphavela wiira otthike.
14 Kinnikupali wiira hiyo nnimookhwa, ntoko siisaale vahinweryaneya aya ottottela maasi yiittheliwe vathi. Masi Muluku khoniphavela wiira nnakhala mutthu mmosa okhwe. Ohiya-vo, owo onnuupuwelela etthu wiira aattikihe ale yoomoliwe.
15 Kihoorwa olavula ni pwiyaka mwene okhala wiira kinniwoova atthu. Nto murumeyi anyu ohuupuwela so: ‘Kalavule ni mwene, woonasa wene mwene onimweemererya yooveka ya murumeyi awe.
16 Waanyiheryasa mwene onookiwiriyana nave onoomoopola murumeyi awe mmatatani mwa mutthu omphavela okiiva, ni oniphavela omwiiva mwanaka mmosa ene wiira nihaakhele etthu Muluku onivanhe awe’.
17 Nto murumeyi anyu aahihimya wiira: ‘Woonasa wene moolumo a pwiyaka mwene anookikurunuxa murima’. Okhala wiira pwiyaka mwene onlikana ni nlaikha na Muluku eekeekhai, maana onnihiyaniha etthu yooloka ni yoohiloka. Yehova Muluku anyu okhale ni nyuwo”.
18 Mwene aahimwaakhula muthiyana owo wiira: “Muhikikhuwe nnakhala etthu emosa kinrowa aka wookohani”. Muthiyana owo ahaakhula oriki: “Xontte mulavuleke pwiyaka mwene”.
19 Nto mwene aahimukoha wiira: “Yowabi toolenleni itthu iya sootheene?” Muthiyana owo aahaakhula wiira: “Khoo pwiyaka mwene, ntoko siisaale munikhala anyu, ekeekhai wiira murumeyi anyu Yowabi tokirumme ni tomulenle itthu iya sootheene murumeyi anyu.
20 Murumeyi anyu Yowabi oopaka eyo wiira oturuke itthu moota siri aya, masi pwiya ookhalana ankhili anlikana ni ankhili a nlaikha na Muluku eekeekhai, nave onnisuwela itthu sootheene siniiraneya mulaponi”.
21 Nto mwene aahimuleela Yowabi wiira: “Vaareera, kinimwiira siiso. Murowe, mwamwiihane mmiravo owo Absalomi”.
22 Siiso Yowabi aahikokhora, uurama mpakha vathi onamuttottopela mwene. Yowabi aahihimya wiira: “Khoo pwiyaka mwene, olelo murumeyi anyu oosuwela wiira onnimusiveliha mwene, okhala wiira mwene oheemererya yooveka ya murumeyi awe”.
23 Moottharelana, Yowabi aahimurowela Absalomi oXesuri, omuroiha oYerusalemu.
24 Masi, mwene aahihimya wiira: “Mmuhiye otthikeleke owannyawe, miyo nkiniphavela onweha”. Siiso Absalomi aahitthikela owannyawe, nave mwene khanwenhe.
25 Nto, wIsarayeli wootheene Absalomi taari ootepa oreera waavikana alopwana ootheene. Okhuma vamuru mpakha inawu sawe aari ooreera, khaarina etthu yoonanara.
26 Okathi aamettha awe ikharari sa mmuruni mwawe, saanilemela ixeekele 200* orumeeliwaka mphimo wa nluku waarumeeliwa vatthokoni va mwene.* (Owo aamettha ikharari sawe wuumalani wa mwaakha okhala wiira saanimulemela.)
27 Absalomi aahaayara anamwane axilopwana araru ni muthiyana mmosa yoowo aavanhe nsina noowi Tamari. Tamari owo aari muthiyana ooreera vanceene.
28 Absalomi aahikhala oYerusalemu iyaakha piili, masi nlelo khaatonko onweha mwene.
29 Absalomi aahiruma wiihaniwa Yowabi wiira orowe wa mwene, masi Yowabi aahikhootta orwa. Owo aahiruma-tho wiihaniwa ekwaha ya nenli , masi nlelo Yowabi khaaphavenle orwa.
30 Nuumala-vo, Absalomi aahaahimeerya arumeyi awe wiira: “Ematta ya Yowabi erimwaattamana ni ematta aka, nto owo ohaalamo esevaata memmo. Murowe mwapahe ematta eyo”. Vano arumeyi awe Absalomi yaahirowa opaha ematta ya Yowabi.
31 Nto Yowabi aahivenya orowaka owannyawe Absalomi onamukoha wiira: “Xeeni arumeyi anyu ahalaka opaha ematta aka?”
32 Absalomi aahimwaakhula Yowabi oriki: “Miyo kahaaruma atthu woohimeeryani wiira: “Murwe koorumeeni wiira mwamukohe mwene wiira: “Mukiihanenleni oXesuri? Fataari kaahanle wuuwu. Vano kiniphavela onweha mwene, vakhala wiira kookhalana mulattu weeso mukiiveke”’”.
33 Siiso Yowabi aahirowa wa mwene, omuleela etthu eyo. Vano mwene aahimwiihaniha Absalomi. Nto Absalomi aahirwa, okokhora, uurama mpakha vathi ohoolo wa mwene. Moottharelana mwene aahinvaha epeexo Absalomi.
Inoota
^ Etthu yoowiiraka ikuulu 2.3. Munwehe Apendise B14.
^ Ola waari mphimo waarumeeliwa opalasio wa mwene aahiiso exeekele ya vatthokoni wa “mwene” yeeyo yaavirikana ni ixeekele sikina.
