Samuweli a Nenli 15:1-37
15 Nuumala itthu iya sootheene, Absalomi aahikhalana ekaaro yaapuruliwa ni inama, ikhavalo ni alopwana 50 yeetta ohoolo wawe.
2 Absalomi aanivenya voosiisu, oneemela waattamela estaraata yaarowa vamukhora wa epooma. Khula okathi anweha awe mutthu orowaka wa mwene orowa ohimya mulattu awe, Absalomi aanimwiihana onamukoha wiira: “Nyuwo munikhuma epooma xeeni?” Owo anaakhula oriki: “Murumeyi anyu ta nihimo nimosa na Isarayeli”.
3 Absalomi aanihimya wiira: “Mulattu anyu ti weekeekhai ni ti wa xariya. Masi khuuvo mutthu a mwene okhanle oothokorerya mwaha anyu”.
4 Absalomi aanihimya wiira: “Kaathanliwe okhala mulipa-oophuka a elapo ela, khula mutthu orina mulattu awe, aarowa orwaaka wa miyo, nto miyo kaamuthokoreryaka mulattu awe mwa xariya”.
5 Okathi mutthu aamwaattamela awe wiira okokhore ohoolo wawe, Absalomi aanookola moono awe, onanvarela ni onanvaha epeexo.
6 Absalomi aanipaka eyo ni aisarayeli ootheene yaarowa wa mwene wiira siphukiwe milattu saya. Siiso, Absalomi aanihapuxa mirima sa atthu a Isarayeli.
7 Nuuvira iyaakha xexe,* Absalomi aahimuhimeerya mwene wiira: “Xontte, mukeemererye wiira kirowe oHebroni, kammaliherye natiri kimmanenle aka Yehova.
8 Okathi murumeyi anyu aakhala awe oXesuri wa oSiiria, aahimmana natiri oriki: ‘Yehova akeemiherya otthikela oYerusalemu, kinoomurumeela Yehova’”.
9 Mwene aahimuhimeerya wiira: “Murooke ni murettele”. Siiso, Absalomi aahivenya onarowa oHebroni.
10 Absalomi aahaaruma alopwana awo orowa wa mahimo ootheene a Isarayeli iiraka: “Okathi munrowa anyu wiiwa oruma wa nlope, mulaleye wiira: ‘Absalomi ookhalihiwa mwene oHebroni!’”
11 Vano, alopwana 200 a oYerusalemu yaahirowa weiwo ni Absalomi. Awo, yaaroolattuliwa, ni yaahirowa ahaanyiheryaka, nnakhala ahisuwelaka etthu yiiraneya.
12 Nuumala ovaha mukuttho, Absalomi aahaaruma atthu orowa epooma ya oXilo, wiira yamwiihane Ahitofeli namavaha miruku a Davidi yoowo aari a oXilo. Atthu yaamurukunuwela mwene yaanaatta, nave nummeru na atthu yaamukhaliherya Absalomi naanincerereya.
13 Nuuvira okathi, aahirwa mutthu mmosa onamuleela Davidi wiira: “Atthu a Isarayeli, annimukhaliherya Absalomi”.
14 Moowaakuveya, Davidi aahaaleela arumeyi awe ootheene yaakhala oYerusalemu wiira: “Nrowe nitthyawe, okhala wiira khuuvo onrowa woopowa mmatatani mwa Absalomi! Mwaakuveke, wiira owo ohiniphwanye, ni wiira ohinikumiherye ehasara aapwetexaka atthu ootheene a epooma ela ni espaata!”*
15 Vano arumeyi a mwene yaahihimya wiira: “Ele pwiya ahu mwene enrowa awe othanla, arumeyi awe anoopaka yeeyo”.
16 Nto mwene aahikhuma vamosa ni atthu ootheene a etthoko awe, masi aahaahiya athiyana awe akina* 10, wiira akhapeleleke enupa.*
17 Nto mwene aahithipelela orowa ni atthu ootheene, awo yaaheemela oBethi-Meraki.
18 Arumeyi ootheene a mwene, ni akereti, apeleti, atthu a oGathi, ni alopwana 600 yaamutthara mwene okhuma oGathi, yaanivira emuttharaka mwene.
19 Mwene aahimukoha Itayi a oGathi wiira: “Xeeni munnitthara anyu? Mutthike, mwakhaleke ni mwene a niinaano, okhala wiira nyuwo mwa muletto mutthyanwe elapo anyu.
20 Nyuwo mphiyale niinaano, vano mumphavela weetteettaka ni hiyo murowaka opuro onrowa ahu? Mutthike, mwaakuxe axinninyu, nave Yehova okathi wootheene owooniheryeni ophenta woororomeleya”.
21 Masi Itayi aahimwaakhula mwene wiira: “Ntoko siisaale Yehova onikhala awe, ni ntoko siisaale pwiyaka mwene onikhala awe, khula opuro pwiyaka mwene onrowa awe okhala, hata orowaka okhwa, wala okhala mukumi, ni miyo kinrowa weiwo!”
22 Nto Davidi aahimuleela Itayi wiira: “Nrowe, nilapuwe ekhato”. Siiso, Itayi a oGathi, aahilapuwa, vamosa ni alopwana awe ootheene, ni imusi saya.
23 Atthu yaakhala elapo ele yaaninla vanceene, okathi atthu ootheene yaalapuwa aya opuro woowaataleya. Nto mwene aarimweemela opuro woowaataleya* wa oKeduroni. Vano atthu ootheene yaanilapuwa attharaka estaraata yaarowa woothakoni.
24 Sadoki ni alevi ootheene yaari opuro yoole, akunxe ene nivuku na nivarihano na Muluku eekeekhai. Nto alevi awo yaahipweha vathi nivuku na nivarihano na Muluku eekeekhai. Okathi atthu ootheene yaakhuma aya opooma, alapuwaka opuro woowaataleya, Abiyatari aahiphiya.
25 Masi mwene aahimuleela Sadoki wiira: “Mukuxe nivuku na nivarihano na Muluku eekeekhai, muttikiherye opooma. Vakhala wiira Yehova onookireerela murima onookeemererya otthika, ni kinooweha-tho nivuku nlo na nivarihano, opuro onikhala aya.
26 Masi owo ahimya wiira: ‘Nkinsiveliwa-tho ni nyuwo’, weeso, mukiiriheke ele enrowa awe woona oreerela”.
27 Vano mwene aahimuleela namukuttho Sadoki wiira: “Nyuwo khamuhiyo mulipa onisuwela otaphulela itthu ooniheriwe awe ni Muluku? Mutthikele opooma ni murettele. Nave mwaakuxe aniinyu: mwaninyu Ahimaasi, ni Yonathani mwaana a Abiyatari.
28 Kinrowa woolipelelakani mapuro anilapuwa aya atthu, waattamela moothakoni, mpakha okileela etthu”.
29 Nto Sadoki ni Abiyatari, yaahikuxa nivuku na nivarihano na Muluku eekeekhai attikiherya oYerusalemu, nnakhala weiwo.
30 Okathi Davidi aawela awe mwaako Olivera, aaninla, okathi eetta awe ohiwanre ixapattho, ni aahikhuneela muru awe. Atthu ootheene yaamutthara yaahikhuneela miru saya, ni yaaninla okathi yaawela aya mwaako.
31 Davidi aahileeliwa wiira: “Ahitofeli ori ni atthu animukhaliherya Absalomi”. Vano Davidi aahihimya wiira: “Khoo Yehova, xontte, mwiirihe miruku sa Ahitofeli okhala sa elolo!”
32 Okathi Davidi aaphiyale awe vasulu va mwaako, opuro yoowo atthu yaamukokhorela aya Muluku, Huxayi, a wAriki, aanaalipelela nlaya nawe nikhereyale ene ni osareyale ene ntthupi mmuruni.
33 Davidi aahihimya wiira: “Mwarowa ni miyo, munookivaha muteko.
34 Masi mwahokolowela opooma ni omuleela Absalomi wiira, ‘khoo amwene miyo ka murumeyi anyu. Khalai kaari murumeyi a paapa anyu, masi vano ka murumeyi anyu’, munookikhaliherya ohonona miruku sa Ahitofeli.
35 Anamukuttho Sadoki ni Abiyatari anrowa okhala wuuwu ni nyuwo. Mmuhimeerye Sadoki ni Abiyatari itthu sootheene munrowa anyu wiiwa etthoko ya mwene.
36 Awosa ni anaaya anli Ahimaasi mwaana a Sadoki, ni Yonathani mwaana a Abiyatari arisa oYerusalemu. Sootheene munrowa anyu wiiwa, pooti waaleela yaawo wiira arwe akihimeerye”.
37 Okathi Huxayi mpatthani awe Davidi aaphiyale awe oYerusalemu, Absalomi iira ovolowaka epooma ele.
Inoota
^ Aahiiso, woonasa wene, “iyaakha 40”.
^ Aahiiso, “xoowa”.
^ Nwehe Moolumo Ootthokiheriwa ani: “Muthiyana Mukina”.
^ Aahiiso, “epalaasio”.
^ Aahiiso, “okhatoni”.
