Samuweli a Nenli 16:1-23
16 Davidi iira ovinre ene niinaano vasulu va mwaako, okathi aamonne awe Siba murumeyi a Mefiboxeti, yoowo aamulipelela, ni apuuru anli yaawo yaakunxe iphaawu 200, iboolu* 100 sa ewuuva yoowuuma, iboolu 100 sa efiiku ni murinki muulupale wa eviinyu.
2 Mwene aahimukoha Siba oriki: “Xeeni muhalaka oruuha itthu iya?” Siba aahaakhula wiira: “Apuuru ala kaaruhale wiira atthu a etthoko ya mwene yeettaneke, iphaawu iya ni ifiiku iya kiruuhale wiira atthu alyeeke, ni eviinyu ela kiruuhale wiira awuryeke atthu ale anrowa okhulumuwa moothakoni”.
3 Mwene aahimukoha wiira: “Ori vai mwaana* a pwiya anyu?” Siba aahimwaakhula mwene oriki: “Ohanle oYerusalemu, maana onihimya wiira: ‘Olelo etthoko ya Isarayeli enrowa okittikiherya omwene wa paapa aka’”.
4 Mwene aahimuhimeerya Siba wiira: “Itthu sootheene sa Mefiboxeti vano ti saawinyu”. Siba aahihimya wiira: “Miyo kinnikokhora ohoolo wanyu. Kiphwanye oreeriwa ohoolo wanyu, pwiyaka mwene”.
5 Okathi mwene Davidi aaphiyale awe oBahurimi, mulopwana mmosa a emusi ya Sawuli, aihaniwa Ximeyi, mwaana a Gera, aanimutakhaliha akhuwelaka okathi aamwaattamela awe.
6 Owo aaninvonya maluku mwene Davidi ni arumeyi awe ootheene, vamosa ni atthu ootheene, ni anakhotto ootupa yaari moono woolopwana ni moono woothiyana wa mwene.
7 Okathi aamutakhaliha awe, Ximeyi aanihimya wiira: “Mukhume-va, murooke, nyuwo nawiive ni mulopwana ohirina efaita!
8 Yehova onnoolivani mwaha wa owiiva atthu a etthoko ya Sawuli, ni okuxa omwene awe. Tivo, Yehova onvaha omwene owo mwaninyu Absalomi. Vano nyuwo muri mmaxakhani, mwaha woowi mwa nawiive!
9 Vano, Abixayi, mwaana a Seruwiya, aahimuhimeerya mwene wiira: “Xeeni mwalapwa ole ookhwa, onimutakhaliha awe pwiyaka mwene?” Xontte, mukihiye kimurowele kamwiikitthe muru.
10 Masi, mwene aahihimya wiira: “Nkimphavela, maana khahiyo muteko anyu nyuwo anamwane a Seruwiya. Mmuhiye okitakhaliheke, okhala wiira Yehova omuhimeerya oriki: ‘Mmutakhalihe Davidi!’ Nto tani okhanle oohimya wiira: ‘Xeeni munipaka anyu etthu eyo?’”
11 Davidi aahimuhimeerya Abixayi ni arumeyi awe otheene oriki: “Vakhala wiira mwanaka omuyanre aka, onniphavela okiiva, vaatepa-tho mutthu a nihimo na Beniyamini! Mmuhiye okitakhaliheke, okhala wiira Yehova omuhimeerya wiira opake eyo.
12 Woonasa wene, Yehova onooweha oxanka waka, nave Yehova onookireeliha hata kitakhalihiwe ene olelo”.
13 Davidi ni alopwana awe, yaaneetta attharaka estaraata. Vano Ximeyi aahithipelela omutakhaliha Davidi onvonyaka maluku ni mihaava sinceene Davidi ni alopwana awe.
14 Wanikisa waya, mwene ni atthu ootheene arina awe, yaahiphiya opuro yaarowa aya ekhulumunwe ene, anamumula weiwo.
15 Vano, Absalomi ni alopwana ootheene a Isarayeli yaahiphiya oYerusalemu, nave Ahitofeli aari hoothe nuuwo.
16 Okathi Huxayi, a wAriki, mpatthani awe Davidi aaphiyale awe wa Absalomi, aahimuhimeerya Absalomi wiira: “Mwene okhaleke mahiku ootheene! Mwene okhaleke mahiku ootheene!”
17 Absalomi aahimukoha Huxayi oriki: “Ti siiso munimooniherya anyu ophenta woororomeleya mpatthani anyu? Xeeni muhimutthanre anyu mpatthani anyu?
18 Huxayi aahimwaakhula Absalomi oriki: “Nkikhanle oopaka eyo, miyo kiri mpantta wa ole othanliwe ni Yehova, atthu ala ni alopwana ootheene a Isarayeli. Miyo kinrowa okhalaka nuuwo.
19 Ohiya-vo, tani kikhanle aka omurumeela ohikhanle mwaana a mpatthani aka? Ntoko siisaale kaamurumenle aka paapa anyu, nave-tho kinrowa woorumeelakani”.
20 Absalomi aahinvekela Ahitofeli oriki: “Mukivahe miruku. Exeeni nikhanle ahu oopaka?”
21 Ahitofeli aahimuhimeerya Absalomi wiira: “Murupe ni athiyana akina* a paapa anyu, yaawo aahiyale awe wiira akhapeleleke empa. Okathi atthu ootheene a Isarayeli anrowa aya wiiwa wiira paapa anyu onnoonyokhani, ale anookhaliheryani khanrowa ohiya wookhaliheryani”.
22 Siiso, yaaheemexa etenta* ya Absalomi vasulu va empa. Vano Absalomi aahirupa ni athiyana akina* a paapa awe, ooniwaka ni atthu ootheene a Isarayeli.
23 Mahiku ale, miruku Ahitofeli aavaha awe sooniwa ntoko moolumo a Muluku eekeekhai. Davidi ni Absalomi, yoonela siiso miruku sa Ahitofeli.
Inoota
^ Enihimmwa ewuuva yoowuma yoonyakattiwa, yeeyo yaalikana ni iboolu.
^ Aahiiso, “musulwaawe”.
^ Nwehe Moolumo Ootthokiheriwa ani: “Muthiyana Mukina”.
^ Aahiiso, “eheema”.
^ Nwehe Moolumo Ootthokiheriwa ani: “Muthiyana Mukina”.
