Samuweli a Nenli 18:1-33
18 Vano Davidi aahaakontari alopwana aarina awe, aathanla maxeefi wiira yaahooleleke alopwana 1.000, ni maxeefi wiira yaahooleleke alopwana 100.
2 Davidi aahaakawanya alopwana arina awe ikrupu tthaaru, aaruma. Ekrupu yoopacerya, yaahooleliwa ni Yowabi, ekrupu ya nenli yaahooleliwa ni munnawe Yowabi, Abixayi, mwaana a Seruwiya, ekrupu ya neeraru yaahooleliwa ni Itayi, a oGathi. Vano mwene aahaaleela atthu ale wiira: “Nave miyo kinoorowa ni nyuwo”.
3 Masi awo yaahihimya wiira: “Nnaari muhirowe, okhala wiira hiyo natthyawa, awo khanrowa onithokorerya, nave nimeya na anakhotto ahu yakhwa, awo khanrowa onithokorerya, okhala wiira nyuwo munlikana ni anakhotto 10.000. Tivonto, vanooreera nyuwo ohala opooma, munikhaliheryeke muri ene wenno”.
4 Mwene aahiwaakhula wiira: “Miyo kinoopaka ele munrowa anyu woona oreerela”. Nto mwene aahihala eemenle ene waattamela va mukhora wa epooma, nave alopwana ootheene yaahikhuma, ikrupu sa 100 ni ikrupu sa 1.000.
5 Vano mwene aahinvaha yooruma ela Yowabi, Abixayi ni Itayi oriki: “Mmureerele murima mmiravo Absalomi, mwaha wa miyo”. Okathi mwene aavanhe awe yooruma ela maxeefi ootheene, omuhimyaka Absalomi, alopwana ootheene yaahiiwa.
6 Nto alopwana ale yaahirowa omathalani, wiira yakumane ni atthu a Isarayeli, nave yaahiwaniwa ekhotto, etakhwa ya wEfrayimi.
7 Atthu a Isarayeli, yaahiweriwa ni arumeyi a Davidi. Nave nihiku nle, yaahikhwa atthu anceene, eyo piiyo, alopwana oowiiraka 20.000.
8 Ekhotto yaahimwara-mwareya muttetthe wootheene. Nihiku nle, atthu yaakhwiiye mutakhwani yaari oowaatta waavikana atthu yaiviwe ni espaata.*
9 Muhoolo mwaya, Absalomi aahikumana ni arumeyi a Davidi. Nuumala woona eyo, aahitthyawa, masi mwaamunama oniihaniwa muula anwenle awe, aahivira mmukhitte wa iritta sa mwiri muulupale, nto muru wa Absalomi waahiphara mmwirini-mme. Siiso Absalomi aahikhala osulu-sulu nlelo mwaamunama awe oniihaniwa muula otthyawaka.
10 Mutthu mmosa aahiweha etthu ele, omuleela Yowabi wiira: “Koomoona Absalomi ophanre ene mmwirini”.
11 Yowabi aahimwaakhula mulopwana owo oriki: “Vakhala wiira nyuwo mooweha eyo, xeeni mwahaamwiiva anyu vaavo? Miyo kaamuhakalala woovahani ixeekele* 10 sa eparatha ni esintu emosa”.
12 Masi mulopwana owo aahimwaakhula Yowabi wiira: “Hata mwaakivanhe ixeekele 1.000 sa eparatha, miyo nkaamwiiriha etthu yootakhala mwaana a mwene, okhala wiira hiyo nihiiwa mwene oorumakani nyuwo, Abixayi ni Itayi oriki: ‘Muhimuhiye mutthu omwiirihaka etthu yootakhala mmiravo Absalomi’.
13 Nto vaakhanle wiira nkaiwelenle, kimwiiva, mwene aamwiiwa, nave nyuwo khimwaarowa okaakiha”.
14 Vano Yowabi aahimwaakhula wiira: “Kinhonona okathi aka mahala ene ni nyuwo! Nto Yowabi aahikuxa mattheere mararu, orowa aari awe Absalomi, nlelo ori ene mukumi, olenleyaka mmwirini. Yowabi aahivonya mattheere, omuhoma Absalomi vamurimani”.
15 Arumeyi muloko yaamukhaliherya Yowabi oteexa ikaruma sawe sa ekhotto, yaahirwa, amwaattamela Absalomi amwiiva ni ikaruma saya sa ekhotto.
16 Vano Yowabi, aahoopa nlope wiira aatthikihe atthu yaawoomola aisarayeli. Nto Yowabi aahaahiiha atthu.
17 Atthu yaahikuxa murutthu wa Absalomi erihela nlitti nuulupale naari mutakhwani, attiyela ni maluku maalupale oowaatta. Nuumala-vo, atthu ootheene a Isarayeli yaahitthyawa arowaka owannyeya.
18 Absalomi ohinatthi okhwa, aahipaka epilaari opuro woowataleya wa mwene, okhala wiira aanihimya wiira: “Nkirina mwaana onrowa ohalana nsina naka wiira kuupuweleliweke”. Nto epilaari eyo aahivaha nsina noowi Absalomi. Tivo, epilaari eyo eniihaniwa aya monumentu a Absalomi mpakha olelo-va.
19 Ahimaasi mwaana a Sadoki aahihimya wiira: “Xontte, mukihiye kitthimake, kamuleele ihapari iya mwene, okhala wiira Yehova oomwiirela exariya omoopolaka mmatatani mwa awanani awe”.
20 Yowabi aahimuleela wiira: “Olelo khamunroiha ihapari, munaamuroiha nihiku nikina, ohiya olelo, okhala wiira mwaana a mwene tokhwiiye.
21 Yowabi aahimuhimeerya mutthu mmosa a oKuxi wiira: “Murowe, mwamuhimeerye mwene itthu moonale anyu”. Siiso mutthu ole a oKuxi, aahuurama ohoolo wa Yowabi nuumala-vo onarowa otthimakaka.
22 Ahimaasi mwaana a Sadoki aahitthikela-tho omuhimeerya Yowabi wiira: “Xontte, enkhala tenkhala, mukeemiherye wiira kimutthare mulopwana ole a oKuxi”. Vano, Yowabi aahimukoha wiira: “Mwanaka, xeeni muniphavela anyu omutthara, muhirina ihapari soohimya?”
23 Ahimaasi aahithipelela oriki: “Enkhala tenkhala, miyo kinoorowa”. Siiso, Yowabi aahimuhimeerya wiira: “Murooke!” Vano Ahimaasi aahitthimaka ottharaka ephiro ya edistritu ya oYordani. Ohoolo waya, aahinvikana mutthu ole a oKuxi.
24 Vano Davidi iira okilanthe ene eriyari ya mikhora miili sa epooma, nave mulipa-oowehaweha aahiwela vasulu va mikhora oviraka vamuuruni. Owo aahimoona mulopwana otthimakaka mekhawe.
25 Vano mulipa-oowehaweha aahikhuwela omuleelaka mwene. Nto mwene aahihimya wiira: “Vakhala wiira onirwa mekhawe, yookhala etthu oniphavela awe okileela”. Okathi mulopwana owo aattamela awe,
26 mulipa-oowehaweha aahimoona mulopwana mukina otthimakaka. Moottharelana, mulipa-oowehaweha aahimukhuwelela kwaarta vamukhora oriki: “Ookhala mulopwana mukina onirwa otthimakaka!” Mwene aahimuhimeerya wiira: “Nave owo onruuha ihapari”.
27 Mulipa-oowehaweha aahihimya wiira: “Mulopwana oopacerya moota ontthimaka awe onkhala mwa Ahimaasi, mwaana a Sadoki”. Nto mwene aahihimya wiira: “Owo mulopwana ooreera murima, onkiruuhela ihapari sooreera”.
28 Ahimaasi aahimukhuwelela mwene oriki: “Itthu sootheene sinneetta saana!” Nuumala-vo, Ahimaasi aahikokhora ohoolo wa mwene, uuramaka mpakha vathi, onahimya wiira: “Ottottopeliwe Yehova, Muluku anyu, yoowo aavaherenrye alopwana yaamurukunuwenle pwiyaka mwene!”
29 Mwene aahimukoha wiira: “Mmiravo Absalomi mukumi?” Ahimaasi aahaakhula wiira: “Kaahiweha ohiiwanana wuulupale, okathi Yowabi aamurumme awe murumeyi a mwene ni miyo murumeyi anyu, masi nkaasuwenle yiiraneya”.
30 Mwene aahihimya wiira: “Muxoverye-vo, mulipeleleke”. Siiso, Ahimaasi aahixoverya mpantta mukina, onalipelela.
31 Moottharelana, mutthu ole a oKuxi aahiphiya onahimya wiira: “Xontte, pwiyaka mwene, mwiiwe ihapari kinrowa aka wooleelani: Olelo, Yehova oowiirelani exariya, owoopolakani mmatatani mwa atthu ootheene yoorukunuwenleni”.
32 Masi, mwene aahimukoha mutthu ole a oKuxi wiira: “Mmiravo Absalomi mukumi? Mutthu ole a oKuxi aahaakhula wiira: “Awanani ootheene a pwiyaka mwene, ni atthu ootheene yoorukunuwenleni wiira awiireleni etthu yootakhala, ewiiraneele etthu emosa-ru emwiiranenle mmiravo owo!
33 Ihapari iye saahimuriipiha murima mwene, onawela ekwaartu awe ya osulu, yaakhala vasulu va mukhora. Okathi eetta awe aaninla ohimyaka wiira: “Mwanaka Absalomi, mwanaka, mwanaka Absalomi! Fataari kaakhwiiye miyo nipuro nanyu, mwanaka Absalomi, mwanaka!”
