Samuweli a Nenli 21:1-22
21 Mahiku a Davidi, yaahikhumelela etala iyaakha tthaaru. Nto Davidi aahimukoha Yehova, vano Yehova aahimwaakhula oriki: “Sawuli ni atthu a etthoko awe tarina mulattu, okhala wiira oowiiva atthu a oXibeyoni”.
2 Mwene aahiwiihana atthu a oXibeyoni, ni aahivaanela naawo. (Atthu a oXibeyoni khahiyo yaari aisarayeli, masi yaari atthu a wAmori yaahanle. Atthu a Isarayeli yaahimmana natiri wiira khiyaarowa owiiva atthu a oXibeyoni. Masi, mwaha wookhalela wawe nthiti owaakiha atthu a Isarayeli ni a Yuda, Sawuli aahilakela waamala-maliha atthu a oXibeyoni.)
3 Davidi aahaakoha atthu a oXibeyoni oriki: “Kiwiireleni exeeni? Kimalihe sai etampi ela, wiira mwaareelihe atthu a Yehova?”
4 Atthu a oXibeyoni yaahimwaakhula Davidi ariki: “Hiyo khanimphavela eparatha nnakhala eweero, mwaha wa etthu Sawuli ni atthu a etthoko awe eniirenle aya. Nave khaninrowa omwiiva mutthu wIsarayeli”. Nto Davidi aahihimya wiira: “Kinimwiira khula etthu enrowa anyu okivekela”.
5 Awo yaahimuhimeerya mwene wiira: “Mulopwana ole aaphavela onimala-maliha, ni ahaaphavela wiira nikhale muttetthe wa atthu a Isarayeli,
6 munivahererye anaawe axilopwana 7. Nto hiyo ninrowa othomeya mirutthu saya* ohoolo wa Yehova, oXibeya wa Sawuli, yoowo aathanliwe ni Yehova”. Nto mwene aahihimya wiira: “Kinimoovahereryani”.
7 Vano mwene aahimmorela ikharari Mefiboxeti, mwaana a Yonathani, mwaana a Sawuli, mwaha wa natiri, Davidi ni Yonathani mwaana a Sawuli yammanne aya ohoolo wa Yehova.
8 Mwene aahimukuxa Arimoni ni Mefiboxeti, anamwane oowanli a Rispa, mwaana mwaamuthiyana a Aiya, aamuyarenle awe Sawuli. Nave-tho, aahaakuxa-tho anamwane athanu a Mikali, mwaana mwaamuthiyana a Sawuli, aamuyarenle awe Adriyeli, mwaana a Barizilayi, a oMehola.
9 Mwene aahaavahererya anamwane ale atthu a oXibeyoni, nto awo yaahithomeya mirutthu saya, omwaako ohoolo wa Yehova. Siiso, anamwane ale 7 yaahikhwa okathi omosa-ru. Anamwane awo yaakhwiiye okathi woopacerya ohepha, eyo piiyo, okathi waapacerya aya ohemphwa esevaata.*
10 Vano Rispa, mwaana a Aiya, aahikuxa esaakho aatala vamwala, okhuma okathi woopacerya ohepha, mpakha nihiku mirutthu iye saarupeliwe aya epula. Othana, owo aaniwoomolela axipalame a musulu, nave ohiyu aanoomolela inama sa mutakhwani wiira sihaattamele mirutthu iye.
11 Davidi aahileeliwa etthu aapanke awe mwaara mukina* a Sawuli, aihaniwa Rispa, mwaana mwaamuthiyana a Aiya.
12 Vano Davidi aahirowela makhuva a Sawuli ni a mwanawe Sawuli, Yonathani, wa ahooleli a oYabexi-Xileyadi. Ahooleli* awo yaahiiya mirutthu iyo opuro waavira-viriwa oBethi-Xani, weiwo afilisti yaathomenye aya, nihiku yaamwiivale aya Sawuli oXilbowa.
13 Davidi aahiruuha makhuva a Sawuli ni a mwanawe Sawuli, Yonathani. Nave aahitakaaherya makhuva awo ni makhuva a alopwana yaiviwe.*
14 Moottharelana, aahivitha makhuva a Sawuli, ni a mwanawe Sawuli, Yonathani, elapo ya Beniyamini, oSela, mahiye a paapa awe, Kiixi. Nuumala opaka itthu sootheene mwene aarumme awe, Muluku aahiwiriyana ovekelela waya elapo ele.
15 Yaahikhumelela-tho ekhotto, afilisti ni atthu a Isarayeli. Vano Davidi ni arumeyi awe yaahirowa owana ni afilisti, masi Davidi aahikhulumuwa.
16 Mutthu mmosa a osuulu wa arefayimi, aihaniwa Ixibi-Benobi, yoowo nivaka nawe naalemela ixeekele 300* ni aakunxe espaata* esya, aahanle vakhaani omwiiva Davidi.
17 Moowaakuveya, Abixayi mwaana a Seruwiya aahirwa omukhaliheya Davidi, omwiiva nfilisti ole. Nuumala-vo, alopwana a Davidi yaahilapha amuleelaka Davidi wiira: “Nyuwo khamunitthikela orowa ni hiyo okhottoni, wiira muhittipihe muthuko wa atthu a Isarayeli!”
18 Nuumala-vo, yaahiwana-tho ekhotto ni afilisti oGobi. Okathi ene yoowo, Sibekayi muhuxati, aahimwiiva Safi, a osuulu wa arefayimi.
19 Yaahiwaniwa-tho ekhotto ni afilisti oGobi, nto Elihanani mwaana a Yaare-Oregimi, a oBetelehemu, aahimwiiva Goliyati mugathi, yoowo ewiha* ya nivaka nawe yaalikana ni mwiri wa alipa-oottottha.
20 Yaahiwaniwa-tho ekhotto oGathi, weiwo aakhumelenle awe mulopwana muulupale, yoowo aarina ikatha 6 khula ntata ni ilipwi 6 khula nnawu; otakaaherya sootheene saari 24. Nave-tho mulopwana owo aari a osuulu wa arefayimi.
21 Owo aanaaveeha atthu a Isarayeli. Tivo Yonathani, mwaana a Ximeyi, munnawe Davidi, aahimwiiva.
22 Alopwana ala axexe a osuulu wa arefayimi a oGathi, yaahiiviwa ni Davidi, vamosa ni arumeyi awe.
Inoota
^ Eheeberi, “ninrowa waathomeya”. Eyo piiyo, yintakasiwe ene metto ni miyoono.
^ Eyo piiyo, epyo eniihaniwa esevaata.
^ Nwehe Moolumo Ootthokiheriwa ani: “Muthiyana Mukina”.
^ Aahiiso, woonasa wene: “axineene elapo”.
^ Eheeberi, “yaathomeiwale”.
^ Eyo piiyo, ikiilu 3.42. Exeekele emosa yaalemela ikarama 11.4. Munwehe Apendise B14.
^ Aahiiso, “xoowa”.
^ Aahiiso, “ettuutta”. Mpantta onivareliwa aya nivaka.
