Samuweli a Nenli 23:1-39
23 Ala moolumo ookiserya a Davidi:
“Moolumo a Davidi mwaana a Yese,Moolumo a mulopwana aavuwihiwe,Aathanliwe ni Muluku a Yakobe,Mulipa-oowiipa oratteene masipo a atthu a Isarayeli.
2 Munepa wa Yehova waahilavula okirumeelaka miyo;Moolumo awe yaari mwaano mwaka.
3 Muluku, a atthu a Isarayeli aahilavula;
Mwala a atthu a Isarayeli aahikileela wiira:
‘Vakhala wiira ole onaalamulela apinaatamu ta exariya,Onilamulela omoovaka Muluku,
4 Olamulelo awe onlikana ni waarya wa voosiisu okathi onoopa aya nsuwa,Voosiisu ohirina meeku.
Onlikana ni okokola onikhumelela yamwarya epula,Onimeliha munyepu’.
5 Kiira empa aka eri siisa ohoolo wa Muluku?
Owo oopaka nivarihano na mahiku ootheene ni miyo,Oolokiherya itthu sootheene ni oolipiherya.
Tthiri eyo entaphulela woopowa waka woomalela ni otteeliwa waka murima wootheene,Mweekeekhai owo onimwiiriha emusi aka wunnuwa.
6 Masi alopwana ootheene ootakhala anlikana ni miiwa siniriheliwa ota,Okhala wiira khasinkuxiwa mmatatani.
7 Okathi mutthu onivara awe miiwa iyo,Ohaana wiiwariha ikaruma sa iyuuma ni okuxa ewiha* ya nivaka,Siiso miiwa iyo sinoopahiwa voomalela opuro aya”.
8 Masina a anakhotto ootupa a Davidi taala: Yoxebi-Basebeti a oHakimoni, xeefi a anakhotto ootupa araru. Ekwaha emosa, owo aahiwiiva anakhotto 800 ni nivaka nawe.
9 Aamutthara Yoxebi-Basebeti, aari Eleyazari, mwaana a Dodo, mwaana a Ahohi. Owo aari mmosa a anakhotto ale ootupa araru yaari ni Davidi okathi yaaronwe aya owana ni afilisti. Awo yaahithukumana wiira awane ekhotto, nto okathi atthu a Isarayeli yaatthikenle aya ottuli,
10 owo, aaheemela opuro awe ni aahiwiiva afilisti mpakha moono awe ookhulumuwa ni ntata nawe omuuma mwaha woovarela espaata* okathi munceene. Nihiku nle Yehova aahiwiiriha oxintta vaalupale. Nto atthu yaatthyanwe yaahitthika wiira akuxe mireerelo sa atthu ale yaiviwe.
11 Aamutthara Eleyazari, aari Xama mwaana a Age, a oHarari. Afilisti yaahithukumana oLehi, weiwo yaari aya ematta ya lentiilya.* Nto anakhotto* yaahitthyawa mwaha wa afilisti.
12 Masi Xama aaheemela eriyari ya ematta eyo, aakiherya, owiivaka afilisti. Siiso, Yehova aahiwiiriha oxintta vaalupale.
13 Eriyari ya maxeefi 30, araru yaahirowa okumana ni Davidi okhukuni wa wAdulami okathi woohepha. Ekrupu emosa ya anakhotto afilisti, yaamanke opuro woowaataleya wa oRefayimi.
14 Davidi aari opuro woolipihiwa, nave ekrupu ya anakhotto a afilisti yaari oBetelehemu.
15 Nto, Davidi aahihimya etthu aaphavela awe oriki: “Kaawunrye maasi a mweehimeni eri waattamela mukhora wa oBetelehemu!”
16 Siiso anakhotto araru ootupa yaahikela opuro yaamanke aya afilisti, arika maasi mweehimeni yaari waattamela mukhora wa oBetelehemu, amuruuhela Davidi. Masi Davidi aahikhootta owurya maasi awo, nave aahiitthela vathi onvahaka Yehova.
17 Owo aahihimya wiira: “Khoo Yehova, miyo nkinkhala-khala kipakaka etthu eyo! Kinwerya sai owurya ephome ya alopwana ala alenve ikumi saya?” Siiso owo khaaphavenle owurya. Ela ti etthu anakhotto ale araru ootupa a Davidi yaapanke aya.
18 Abixayi, munnawe Yowabi, mwaana a Seruwiya, aari xeefi a ekrupu ekina ya anakhotto araru. Owo aahiwiiva alopwana 300 ni nivaka nawe, nave aari oovuwa ntoko anakhotto ale araru ootupa oopacerya.
19 Hata aari ootepa ovuwa eriyari ya ekrupu ele ya anakhotto araru ootupa ni aari xeefi aya, owo khaalikana ni anakhotto ale araru ootupa oopacerya.
20 Benaya mwaana a Yehoyada aari mulopwana oolipa murima, yoowo aavanre miteko sinceene sootikiniha oKabaseyeli. Owo aahiwiiva anamwane anli a Ariyeli a oMowabi. Nihiku nimosa naamora aya eneevi aahirowa weehimeni, nave aahimwiiva kharamu.
21 Nave, owo aahimwiiva nakhotto mmosa a wExiitu oorakamexa. Hata mulopwana owo a wExiitu aakunxe nivaka, Benaya aahiwanana okunxe ene ekopo. Nto aahimwaakha nivaka mwexiitu owo, omwiivela nivaka nawe nenlo.
22 Iya ti itthu Benaya mwaana a Yehoyada aapanke awe. Owo aari oovuwa ntoko anakhotto ale ootupa araru.
23 Hata owo aari oovuwa waavikana anakhotto ale ootupa 30, owo khaalikana ni anakhotto ale ootupa araru. Masi, Davidi aahimuthanla wiira okhale kwaarta awe.
24 Asaheli, munnawe Yowabi, aari mmosa a anakhotto ala 30 ootupa: Elihanani mwaana a Dodo a oBetelehemu,
25 Xama a oHarodi; Elika a oHarodi;
26 Helesi a oBethi; Ira mwaana a Ikexi; a oTekowa;
27 Abiyezeri a wAnatothi; Mebunayi a oHuxati;
28 Salimoni a wAhohi; Mahirayi a oNetofa;
29 Helebi mwaana a Bayanahi, a oNetofa; Itayi mwaana a Ribayi, a oXibeya wa oBeniyamini;
30 Benaya a oPiratoni; Hidayi aakhala okhatoni wa oGaaxi;
31 Abiyaliboni a wAraba; Azimavethi a oBahurimi;
32 Eliyaba a oXaalabimi; anamwane a Yaxeni; Yonathani;
33 Xama a oHarari; Ahiyami mwaana a Xarari a oHarari;
34 Elifeleti mwaana a Ahasibayi, mwaana a mmaakati; Eliyami mwaana a Ahitofeli a oXilo;
35 Hesiro a oKarmelo; Paarayi a wArabia;
36 Igali mwaana a Natani a oSoba; Bani a oGadi;
37 Seleki a wAmoni; Nahirayi a oBeerothi, yoowo aamukhaliherya oteexa eskuutu Yowabi mwaana a Seruwiya;
38 Ira a oYitiri; Garebi a oYitiri;
39 ni Uriya muhiti. Waatakaaha ootheene yaari 37.
Inoota
^ Aahiiso, “ettuutta”. Mpantta onivareliwa aya nivaka.
^ Aahiiso, “xoowa”.
^ Lentiilya, muthinto mmosa mwaamukhaani wa fexawu onlikana ni epwiri.
^ Aahiiso, “atthu”.
