Samuweli a Nenli 3:1-39
3 Ekhotto yaawaniwa ni atthu a etthoko ya Sawuli ni atthu a etthoko ya Davidi khiyaamala. Davidi aanilipa, nto atthu a etthoko ya Sawuli yaanikhulumuwa.
2 Davidi aahiyareliwa anamwane oHebroni. Mwanawe oopacerya, aihaniwa Aminoni, aayareliwe awe ni Ahinowami a oYezireyeli.
3 Mwaana a nenli aihaniwa Kileyabi, aayareliwe awe ni Abigayili, naamukhweli a Nabali a oKarmelo; a neeraru aihaniwa Absalomi aayareliwe awe ni Maaka, mwaana mwaamuthiyana a Talimayi, mwene a oXesuri.
4 Mwaana a neexexe aihaniwa Adoniya, aayareliwe awe ni Hagithi, a neethanu aihaniwa Xefatiya, aayareliwe awe ni Abitali.
5 A neethanu namosa aihaniwa Itireyami, Davidi aamuyanre awe ni mwaarawe aihaniwa Egla. Ala anamwane Davidi aayanre awe oHebroni.
6 Okathi ekhotto yaawaniwa ni atthu a etthoko ya Sawuli ni atthu a etthoko ya Davidi yaatepa aya, Abineri aaniilipiha owaakihaka atthu a etthoko ya Sawuli.
7 Sawuli aahikhalana muthiyana mukina* aihaniwa Rispa, mwaana mwaamuthiyana a Aiya. Muhoolo mwaya, Ixi-Boxethi aahimukoha Abineri oriki: “Xeeni muhalaka orupa ni muthiyana mukina a paapa aka?”
8 Abineri aahinanariwa vanceene mwaha wa moolumo Ixi-Boxethi aahimmye awe, onamuleela wiira: “Munkoona mwa mwalapwa oneetta pure a oYuda? Mpakha olelo-va, kinniwooniherya ophenta woororomeleya atthu a etthoko ya paapa anyu Sawuli, ni axinninyu, ni apatthani anyu, nave nkoovaherenryeni mmatatani mwa Davidi, masi nyuwo olelo munnikiphukela mwaha wa etthu yoohiloka kipanke aka ni muthiyana ole.
9 Muluku okitakhalihe, ni otepe okitakhaliha kaahimwiirele Davidi ele Yehova omulaphenle awe oriki:
10 Kinoothaamiha omwene etthoko ya Sawuli ni kinootikitherya ehice ya Davidi eriyari ya Isarayeli ni Yuda, okhuma oDani mpakha oBeri-Xeba”.
11 Ixi-Boxethi khaamwaakhunle etthu Abineri, okhala wiira aanimoova.
12 Moowaakuveya, Abineri aahaaruma alopwana orowa omukoha Davidi wiira: “Elapo ela khahiyo yawaka?” Ni aahincererya oriki: “Mpake nivarihano ni miyo, nto miyo kinoopaka sootheene* wiira olamulelo wa Isarayeli okhale wawinyu”.
13 Davidi aahaakhula oriki: “Vaareera! Kinoopaka nivarihano ni nyuwo. Masi kinoovekelani etthu emosa: Okathi munrwa anyu okiweha mmuruuhe Mikali, mwaana mwaamuthiyana a Sawuli”.
14 Vano Davidi aahaaruma alopwana orowa omuleela Ixi-Boxethi, mwaana a Sawuli wiira: “Mukivahe mwaaraka Mikali, yoowo kaamunoivanri aka ni etthu yooniherya* wiira kaahiwiiva afilisti 100”.
15 Nto, Ixi-Boxethi, aahaaruma atthu omurowela Mikali, wa iyawe Palitiyeli, mwaana a Layixi.
16 Iyawe aahimutthara, inlaka mpakha oBahurimi. Moottharelana, Abineri aahimuhimeerya wiira: “Mutthike!” Nto owo aahitthika.
17 Nuuvira okathi, Abineri aahiruma oleeliwa makhulupale a wIsarayeli, oriki: “Woovira okathi munceene mphavelaka wiira Davidi okhale mwene anyu.
18 Vano, Yehova oomuleela Davidi oriki: ‘Kimurumeelaka murumeyi aka Davidi, kinoowoopola atthu aka aisarayeli mmatatani mwa afilisti, ni mmatatani mwa awanani aya ootheene’”.
19 Abineri aahilavula ni atthu a nihimo na Beniyamini. Muhoolo mwaya, moohisuweliwa, Abineri aahirowa olavula ni Davidi oHebroni, omuleelaka itthu sootheene aisarayeli ni atthu ootheene a etthoko ya Beniyamini yaiwananne aya.
20 Okathi Abineri aaphiyale awe wa Davidi oHebroni ni alopwana 20, Davidi aahimpakela efesta Abineri ni alopwana aarina awe.
21 Abineri aahimuleela Davidi oriki: “Mukihiye kirowe kamuthukumanyerye pwiyaka mwene, atthu ootheene a Isarayeli. Nto atthu awo anoopaka nivarihano ni nyuwo, nave nyuwo munookhala mwene a atthu ootheene munaaphavela anyu”. Siiso Davidi aahimuhiya Abineri orowaka, nto owo aahirowa ni murettele.
22 Okathi ene yoole, arumeyi a Davidi ni Yowabi yiira atthikaka okhottoni, nave yaahiruuha itthu sinceene yaakunxe aya. Abineri iira ohentte mukwaha okhuma okathi Davidi aamuhiyale awe orowaka ni murettele.
23 Okathi Yowabi ni anakhotto ootheene yaaphiyale aya, Yowabi aahileeliwa wiira: “Abineri mwaana a Neri, aahirwa okumana ni mwene, nto mwene oomuhiya Abineri orowaka ni murettele”.
24 Yowabi aahirowa wa mwene onamukoha oriki: “Mpanke-ni? Abineri aahirwa. Xeeni mmuhiyale anyu orowaka? Vano ootthyawa.
25 Nyuwo moomusuwela Abineri mwaana a Neri! Owo aarwiiye owootothani, wiira osuwele miteko sanyu sootheene, ni itthu sootheene munivara anyu”.
26 Vano Yowabi aahikhuma ohoolo wa Davidi, ni aahaaruma alopwana omutthimakela Abineri, wiira amuttikiherye ottuli. Alopwana awo, yamphwannye ehime ya oSira, masi Davidi khaasuwela etthu.
27 Okathi Abineri aatthikenle awe oHebroni, Yowabi aahimuroiha wiiphiini, waattamela mukhora muulupale wa epooma. Vano Yowabi aahimuhoma erukulu Abineri, nto owo okhwa. Aahipaka eyo mwaha woomwiiva* muhima awe Asaheli.
28 Muhoolo mwaya, okathi Davidi aiwale awe eyo, aahihimya wiira: “Yehova onnisuwela wiira miyo ni omwene aka, khanrina nthowa mwaha wa wiiviwa Abineri mwaana a Neri.
29 Yowabi ni atthu ootheene a etthoko ya paapa awe tarina mulattu. Tivo, vatthokoni va Yowabi ahimaleke alopwana aniwereiwa, arina makokho,* aahiiso alopwana oorakala. Nave-tho ahimaleke alopwana aniiviwa ni espaata,* wala anivoliwa etala!”
30 Yowabi ni munnawe Abixayi, yaahimwiiva Abineri mwaha woowi owo, aahimwiiva munnaya Asaheli, okhottoni oXibeyoni.
31 Davidi aahimuhimeerya Yowabi ni alopwana ootheene aarina awe wiira: “Mukhere ikuwo sanyu, nware isaakho ni mmunlele Abineri”. Mwene Davidi aanitthara ekaxau.
32 Abineri aahivithiwa oHebroni, nto mwene aahinla vanceene vamahiye wa Abineri. Nave atthu ootheene yaahinla.
33 Vano mwene aahimwiipela Abineri nsipo na masikho, oriki:
“Xeeni Abineri ohalaka okhwa ntoko anikhwa aya alolo?
34 Matata anyu khiyaatthukiwe,Inawu sanyu khisaatthukiwe ni ekwirinti.*
Nyuwo muronwe ntoko sinrowa aya atakhali”.*
Atthu ootheene yaahitthikela-tho omunlela Abineri.
35 Muhoolo mwaya, atthu ootheene yaahimuroihela iphaawu Davidi wiira yammaalihe vahinatthi wiila, masi owo aahilapha oriki: “Muluku okitakhalihe, ni otepe okitakhaliha vakhala wiira kinookhuura iphaawu wala olya etthu ekina nsuwa nihikenle!”
36 Atthu ootheene yaahiweha eyo, ni yaahaasivela, ntoko siisaale itthu sootheene mwene aapanka awe.
37 Vano alopwana ootheene a Davidi ni aisarayeli ootheene, yaahisuwela nihiku nenle wiira mwene khaarina nthowa mwaha woowiiviwa Abineri mwaana a Neri.
38 Nto, mwene aahaakoha arumeyi awe wiira: “Nyuwo khamunsuwela wiira olelo ohookhwa xeefi, mulopwana muulupale wIsarayeli?
39 Olelo, miyo nkirina ikuru nnaamwi kithanliwe ene okhala mwene, nave alopwana ala, anamwane a Seruwiya, tootepa otakhala. Yehova owunlele ikuhu atakhali mwaha wootakhala waya”.
Inoota
^ Nwehe Moolumo Ootthokiheriwa ani: “Muthiyana Mukina”.
^ Eheeberi, “ntata naka nri ni nyuwo”.
^ Eheeberi, “nrapala na elopwana ya afilisti”.
^ Eheeberi, “mwaha wa ephome ya”.
^ Aahiiso, “makuttula; maretta”.
^ Aahiiso, “xoowa”.
^ Eheeberi, “ekoopiri”.
^ Eheeberi, “anamwane oohixariya”.
