Samuweli a Nenli 4:1-12
4 Okathi Ixi-boxethi mwaana a Sawuli aiwale awe wiira Abineri aahiiviwa oHebroni, olipa murima waahimmalela,* nave aisarayeli ootheene yaahoova.
2 Yaahikhala alopwana anli yaari anamwane a Sawuli yaahoolela anakhotto: Mmosa aihaniwa Bayanahi, nave mukina aihaniwa Rekabi. Awo yaari anamwane a Rimoni a oBeerothi, a nihimo na Beniyamini. (OBeerothi waasuweliwa okhala muttetthe wa nihimo na Beniyamini.
3 Atthu a oBeerothi, yaahitthyawela oXitayimi, anakhala weiwo ntoko anamurwa mpakha olelo-va.)
4 Yonathani mwaana a Sawuli, aahikhalana mwanawe mwaamulopwana aarakanle metto soomiili. Mwaana owo aarina iyaakha thanu okathi saaruuhiwe aya ihapari saakhuma oYezireyeli saahimya wiira Sawuli ni Yonathani yaahikhwa. Vano ole aamukhapelela aahimukuxa moowaakuveya otthyawaka okathi oovaawe, nto mwaana owo aahimora orakala. Nsina nawe iihaniwa Mefiboxeti.
5 Anamwane a Rimoni a oBeerothi, Rekabi ni Bayanahi, yaahirowa owannyawe Ixi-Boxethi, nsuwa nluttunwe ene, okathi owo aaphumurya awe othana eriyari.
6 Awo yaahikela mpaani, anakhala wiira yaarowela etiriku. Nuumala-vo yaahimuhoma erukulu, nto Rekabi ni munnawe Bayanahi yaahitthyawa.
7 Okathi yaavolonwe aya mpaani, yaahimphwanya okwaartu wawe, ommaathale ene vakhaamani. Nto yaahimutuphela ni yaahimwiiva, nuumala-vo yaahiikittha muru awe. Awo yaahikuxa muru owo, yeetta ohiyu wootheene, attharaka estaraata ya wAraba.
8 Awo yaahikuxa muru, wa Ixi-Boxethi amuroihela mwene Davidi oHebroni anamuleela mwene ariki: “Ola muru wa Ixi-Boxethi mwaana a Sawuli nwanani anyu, yoowo aaphavela owiivani. Nihiku nla na olelo, Yehova oomweemererya pwiyaka mwene, omunlela ikuhu Sawuli ni osuulu awe”.
9 Masi Davidi aahimwaakhula Rekabi ni munnawe Bayanahi anamwane a Rimoni a oBeerothi, oriki: “Ntoko siisaale Yehova onikhala awe, yoowo okooponle mmaxakhani mootheene,
10 okathi mulopwana aarwaale awe okileela, oriki: ‘Sawuli ohookhwa’, uupuwelaka wiira aakiruuhela ihapari sooreera, miyo kaahinvara kimwiiva oSikilaki. Eyo ti etthu kaamulivenrye aka mulopwana ole aakiruuhenle ihapari iye!
11 Vaatepa-tho nyuwo atakhali mmwiivale mulopwana a xariya owannyawe, vakhaamani vawe! Miyo kinoowunlelani ikuhu mwaha wa mulopwana omwiivale anyu. Tthiri, nyuwo muhaana okhwa”.
12 Vano, Davidi aahaaruma alopwana awe wiira ewiive. Awo yaahiwiikitthasa matata ni metto, yaatthukwelela ntthiya na oHebroni. Masi, yaahikuxa muru wa Ixi-Boxethi, avitha oHebroni, mahiye a Abineri.
Inoota
^ Eheeberi, “matata awe yaahitteettheya”.
