Samuweli a Nenli 8:1-18
8 Nuuvira okathi vakhaani, Davidi aahiwana ni afilisti, ni aahaaxintta. Nto Davidi aahiwaakha afilisti epooma ya oMetegi-Ama.
2 Owo aahaawerya atthu a oMowabi, ni aahaaruma wummaathi vathi, aakawanya ipantta tthaaru:* Ipantta piili wiira yiiviwe, ni epantta emosa wiira ahale ari ene akumi. Nto atthu a oMowabi yaahikhala arumeyi a Davidi, nave yaanimuliva mpoosito.
3 Davidi aahimuxintta-tho Hadadezeri, mwaana a Rehobi, mwene a oSoba, okathi aarowa awe muttetthe wa muro Eufrate wiira atthikele olamulela.
4 Davidi aahaavara anakhavalo 1.700 a Hadadezeri, ni anakhotto 20.000 yeetta mwentto. Nto, Davidi aahiikittha mitika* sa ikhavalo seettiha ikaaro sa ekhotto, ohiya ikhavalo 100.
5 Okathi atthu a oSiiria a oDamaasiko yaarwaale aya wiira amukhaliherye mwene Hadadezeri a oSoba, Davidi aahiwiiva atthu a oSiiria 22.000.
6 Davidi aahaakhaliha atoropa oSiiria wa oDamaasiko, nave atthu a oSiiria yaahikhala arumeyi a Davidi, ni yaanimuliva mpoosito. Yehova aanimwiiriha Davidi oxintta* khula opuro aarowa awe.
7 Ohiya-vo, Davidi aahikuxa iskuutu sa eweero,* sa arumeyi a Hadadezeri, oroiha oYerusalemu.
8 Nave mwene Davidi aahiruuha ekoopiri yinceene ya Hadadezeri, aakunxe awe epooma ya oBeta ni oBerotayi.
9 Mwene Toyi a oHamati, aahiiwa wiira Davidi aahaaxintta anakhotto ootheene a Hadadezeri.
10 Toyi aahimuruma mwanawe Yorami orowa wa mwene Davidi, wiira amukohe ihaali ni amuxukhurele mwaha woomuxintta Hadadezeri (okhala wiira Hadadezeri aamakela owana ni Toyi). Nto owo aahimuroihela Davidi itthu sa eparatha, sa eweero ni sa ekoopiri.
11 Mwene Davidi aahinvaha* Yehova itthu iye, ntoko anvanhe awe eparatha ni eweero aawaakhale awe atthu a maloko ootheene aaxinttale awe:
12 okhuma oSiiria ni oMowabi, atthu a wAmoni, afilisti, atthu a wAmaleki ni itthu aamwaakhale awe Hadadezeri, mwaana a Rehobi, mwene a oSoba.
13 Davidi aahitepa ovuwa nuumala owiiva atthu a wEdomi 18.000 okhatoni wa Maakha.
14 Davidi aahaahiya atoropa wEdomi. WEdomi wootheene aahikhalana atoropa, nave atthu ootheene a wEdomi yaahikhala arumeyi a Davidi. Yehova aanimwiiriha Davidi oxintta* mapuro ootheene aarowa awe.
15 Davidi anaalamulela aisarayeli ootheene, nave Davidi aanaaphukela atthu ootheene mwa xariya.
16 Yowabi, mwaana a Seruwiya, aari xeefi a anakhotto, vano Yosafati, mwaana a Ahiludi, aari mulipa-oolepa.
17 Sadoki mwaana a Ahitubi, ni Ahimeleki mwaana a Abiyatari yaari anamukuttho, nave Seraya aari sekretaario.
18 Benaya mwaana a Yehoyada, taahoolela akereti ni apeleti. Vano anamwane a Davidi, yaari makhulupale.*
Inoota
^ Aahiiso, “aaphima ni mukhoyi”. Wira opake eyo aaphimme ni mukhoyi wira osuwele atthu akavi yaarowa wiiviwa ni atthu akavi yaarowa ohala ari ene akumi.
^ Aahiiso, “misiphe”.
^ Aahiiso, “woopowa”.
^ Aahiiso, “makula a eweero”.
^ Eheeberi, “aahireeriha”.
^ Aahiiso, “woopowa”.
^ Eheeberi, “yaari anamukuttho”.
