Samuweli a Nenli 9:1-13
-
Davidi onnimooniherya ophenta woororomeleya Mefiboxeti (1-13)
9 Davidi aahikoha wiira: “Niireke oohala mutthu a etthoko ya Sawuli kikhanle aka oomooniherya ophenta woororomeleya mwaha wa Yonathani?”
2 Aahikhala murumeyi mmosa a etthoko ya Sawuli aihaniwa Siba. Owo aahiroihiwa wa Davidi, nto mwene aahimukoha wiira: “Nyuwo mwa Siba?” Owo aahaakhula wiira: “Miyo ka murumeyi anyu”.
3 Mwene aahikoha-tho wiira: “Niireke oohala mutthu a etthoko ya Sawuli kikhanle aka oomooniherya ophenta woororomeleya wa Muluku?” Siba aahimwaakhula mwene oriki: “Oohala mwaana a Yonathani, owo toorakala metto soomiili”.
4 Mwene aahimukoha wiira: “Ori vai?” Siba aahimwaakhula mwene oriki: “Ori oLo-Debari, owannyawe Makiri, mwaana a Amiyeli”.
5 Moowaakuveya, mwene Davidi aahiruma oroweliwa mwaana a Yonathani oLo-Debari, owannyawe Makiri, mwaana a Amiyeli.
6 Okathi Mefiboxeti mwaana a Yonathani, mwaana a Sawuli aaphiyale awe wa Davidi, aahikokhora, uuramaka mpakha vathi. Vano Davidi aahihimya wiira: “Mefiboxeti!” Owo aahaakhula oriki: “Miyo-va murumeyi anyu”.
7 Davidi aahimuhimeerya wiira: “Muhoove, okhala wiira mweekeekhai kinoowooniheryani ophenta woororomeleya mwaha wa paapa anyu, Yonathani. Kinimoottikiheryani imatta sootheene sa taata anyu, Sawuli, nave khula okathi munrowa olyaaka* vameesa vaka”.
8 Nto, owo aahikokhora onahimya wiira: “Miyo murumeyi anyu ka pani wiira mukithokorerye! Miyo kinlikana ni mwalapwa ookhwa”.
9 Vano, mwene aahiruma wiihaniwa Siba, murumeyi a Sawuli onamuhimeerya wiira: “Kinonvaha musulwaawe pwiya anyu, itthu sootheene saari sa Sawuli ni sa etthoko awe.
10 Nyuwo ni aniinyu ni arumeyi anyu munrowa othukumanyaka soolya wiira mwaavaheke amusi awe musulwaawe pwiya anyu. Masi, Mefiboxeti, musulwaawe pwiya anyu, okathi wootheene onrowa olyaaka vameesa vaka”.
Siba aarina anamwane 15 ni arumeyi 20.
11 Vano, Siba aahimuhimeerya mwene wiira: “Murumeyi anyu onoopaka sootheene mwene omurumme awe wiira opake”. Nto, Mefiboxeti aanilya vameesa va Davidi,* ntoko anamwane a mwene.
12 Mefiboxeti aahikhalana mwaana mwaamukhaani aihaniwa Mika. Vano atthu ootheene yaakhala owannyawe Siba, yaahikhala arumeyi a Mefiboxeti.
13 Mefiboxeti aakhala oYerusalemu, okhala wiira okathi wootheene aanilya vameesa va mwene. Owo aari oorakala metto soomiili.
