Wahala a Nenli 15:1-19
-
Asa aahilokiherya itthu (1-19)
15 Vano, munepa wa Muluku waahimukhuruwela Azariya mwaana a Odedi.
2 Siiso, owo aahirowa okumana ni Asa onamuhimeerya wiira: “Khoo nyuwo Asa ni atthu ootheene a oYuda ni a oBeniyamini, mukiwiriyane! Yehova onookhala ni nyuwo vakhala wiira khamunrowa omuhiya, nave mwamphavela, owo onimweemererya wiira mumphwanye, masi mwamunyanyala, owo onimoonyanyalani.
3 Woovira okathi* munceene, atthu a Isarayeli ahirina Muluku eekeekhai, ahikhalanne namukuttho oniwiixuttiha ni ahirina nlamulo.
4 Masi, okathi yaaxankale aya amutthikela Yehova, Muluku a atthu a Isarayeli, amphavela yoowo, aaheemererya wiira amphwanye.
5 Okathi ole, khuuvo aawerya weetta mukwaha ni murettele, okhala wiira atthu a ilapo sootheene khiyaarina murettele.
6 Nloko nimosa naanipwetexa nloko nikina, nave epooma emosa yaanipwetexa epooma ekina, okhala wiira Muluku aahaakumiherya ohiiwanana ni mixankiho sa khula enamuna.
7 Masi nyuwo, mwiilipihe ni muhikhulumuwe,* okhala wiira munootthuveliwa mwaha wa miteko sanyu”.
8 Nuumala Asa wiiwa moolumo ala, ni eprofesia ya profeta Odedi, owo aahilipa murima ni aahimala-maliha ilatarato soohiirya elapo yootheene ya oYuda ni oBeniyamini ni ipooma aakunxe awe, muttetthe wa omiyaakoni wa wEfrayimi, nave aahaalokiherya altaari a Yehova, yaawo yaari ohoolo wa mukhora wa Yehova.
9 Aahaathukumanya atthu ootheene a oYuda ni a oBeniyamini, anamurwa ootheene yaakhala eriyari aya, okhuma nihimo na Efrayimi, na Manase, ni na Simeyoni, okhala wiira anceene a yaawo yaahikhuma wIsarayeli arowaka omukhaliherya Asa nuumala oweha wiira Yehova Muluku awe, aari ni yena.
10 Nto, awo yaahithukumana oYerusalemu, mweeri wa neeraru wa eyaakha ya namuloko ni thanu ya olamulelo wa Asa.
11 Nihiku nle, awo yaahinvaha mukuttho Yehova ipooyi 700 ni ipwittipwitthi 7.000 seiyo yaawaakhale aya awanani aya.
12 Nave-tho awo yaahipaka nivarihano na omphavela Yehova, Muluku a amuhavinre aya ni murima aya wootheene ni okumi aya wootheene.
13 Ole ahamphavela Yehova Muluku a Isarayeli, aahaana wiiviwa, okhale mwaamukhaani aahiiso muulupale, okhale mulopwana wala muthiyana.
14 Awo yaahimulaphela Yehova ni nsu noowiiwanyeya, akhuwelaka vootteeliwa murima, yoopaka malope.*
15 Atthu ootheene a oYuda yaahitteeliwa murima mwaha wa etthu yaalamphe aya, okhala wiira yaahilapha ni murima aya wootheene ni yaahimphavela Muluku ni murima aya wootheene, nave owo aahiweemererya wiira amphwanye. Nto Yehova khaahiyale waavaha murettele ni awanani aya ootheene yaarukurenrye.
16 Mwene Asa aahimwaakha piipi awe, Maaka, opwiyamwene, okhala wiira piipi awe aahipaka elatarato yoowuuliha muru ya mwiri waakokhoreliwa.* Nave Asa aahiikittha elatarato eyo yoowuuliha muru piipi awe aapanke awe, aahikawanya ni aahipaha okhatoni wa oKeduroni.
17 Masi mapuro oorakamela osulu yaakokhoreliwa amuluku eethiru khiyaamala-malihiwe wIsarayeli. Vano, Asa aanimurumeela Muluku ni murima awe wootheene mahiku ootheene a okumi awe.
18 Owo aahiroiha empa ya Muluku eekeekhai itthu seiyo owo ni paapa awe yaakhalinhe aya soowaarya ntoko: eparatha, eweero, ni mireerelo sikina.
19 Mpakha eyaakha ya namiloko miraru ni thanu ya olamulelo wa Asa, khiyaawaniwa ekhotto.
Inoota
^ Eheeberi, “mahiku manceene”.
^ Eheeberi, “muhikuruxe matata anyu”.
^ Eheeberi, “manyaka ni malope a inama”. Nwehe Moolumo Ootthokiheriwa ani: “Nnyaka”.
^ Nwehe Moolumo Ootthokiheriwa.
