Wahala a Nenli 17:1-19
17 Vano mwanawe, Yosafati, aahikhala mwene nipuro nawe. Nave aahikhalana owerya wuulupale wIsarayeli.
2 Owo aahaapweha atoropa ipooma sootheene soolipihiwa sa oYuda, nave aahipweha ikurupu sa anakhotto elapo ya oYuda ni ipooma sa wEfrayimi, seiyo paapa awe, Asa, aakunxe awe.
3 Yehova aanikhala ni Yosafati, okhala wiira owo aneettela iphiro sa muhavinre awe Davidi, nave khaaphavela amuluku a Bayaali.
4 Owo aanimphavela Muluku a paapa awe, nave aaneettela sooruma sawe, ohiya itthu yaapaka aya aisarayeli.
5 Yehova aahimukhaliherya Yosafati wiira omwene awe okhale woolipa, nave atthu ootheene a oYuda yaanimuruuhela soovaha. Siiso Yosafati aahikhalana mihakhu sinceene, nave atthu yaanimuttittimiha vanceene.
6 Owo aahikhala oolipa murima ottharaka iphiro sa Yehova, ni aahimala-maliha mapuro oorakamela osulu yaakokhoreliwa amuluku eethiru ni miri saakokhoreliwa* oYuda.
7 Eyaakha ya neeraru ya olamulelo awe, Yosafati aahaaruma makhulupale awe, Beni-Hayili, Obadiya, Zakariya, Netaneli ni Mikaya, orowa owiixuttiha atthu ipooma sa oYuda.
8 Nave, yaahikhala alevi akina yaaronwe naawo, Xemaya, Netaniya, Zebadiya, Asaheli, Xemiramothi, Yehonathani, Adoniya, Tobiya ni Tobi-Adoniya. Nave-tho, yaahirowa naawo anamukuttho Elixama ni Yorami.
9 Awo yaahipacerya owiixuttiha atthu a oYuda, akunxe ene eliivuru ya Nlamulo na Yehova. Nave yaaheetteetta ipooma sootheene sa oYuda ewiixuttihaka atthu.
10 Mamwene ootheene a ilapo saarukurenrye oYuda yaahimoova Yehova, nto khiyaawanne ni Yosafati.
11 Afilisti yaanimuruuhela Yosafati soovaha ni musurukhu wiira amulive mpoosito. Atthu a wArabia yaahimuruuhela ipwittipwitthi 7.700 ni ipuri soolopwana 7.700 sa munikotoni mwaya.
12 Yosafati aanitepa olipa, nave aahithipelela oteka mapuro oolipihiwa ni ipooma sa arumasiya oYuda.
13 Owo aahivara miteko sinceene ipooma sa oYuda, nave aahikhalana anakhotto ni anakhotto ootupa oYerusalemu.
14 Awo yaakawanyiwe moovarihana ni imusi saya: atthu a oYuda, yaahikhala maxeefi 1.000. Nave aahikhala xeefi Adinahi, yoowo aarina anakhotto ootupa 300.000.
15 Owo aanimuhoolela xeefi Yehohanani, yoowo aarina alopwana 280.000.
16 Nave aanimuhoolela Amasiya, mwaana a Ziikiri, yoowo aivaherenrye wiira onvareleke muteko Yehova. Owo aahikhalana anakhotto ootupa 200.000.
17 Atthu a nihimo na Beniyamini, aahikhala nakhotto ootupa Eliyada, yoowo aarina alopwana 200.000 yaakunxe muura ni eskuutu.
18 Owo aanimuhoolela Yehozabadi, yoowo aarina alopwana 180.000 yaari oolikana ene owana ekhotto.
19 Ala ti yanvarela muteko mwene, ohaakontari ale mwene aapwenhe awe ipooma sootheene soolipihiwa sa oYuda.
Inoota
^ Nwehe Moolumo Ootthokiheriwa.
