Wahala a Nenli 20:1-37
20 Nuuvira okathi, atthu a oMowabi, a wAmoni, vamosa ni atthu akina a wAmonimi,* yaahirwa wiira awane ekhotto ni Yosafati.
2 Yosafati aahileeliwa wiira: “Muttitthi muulupale wa atthu onnoorwa owana ni nyuwo okhumaka muttetthe wa ophareya,* wEdomi, awo aaphiya oHasasoni-Tamari, eyo piiyo, wEni-Gedi”.
3 Vano, Yosafati aahoova ni aahilakela omphavela Yehova, siiso aahaaruma atthu ootheene a oYuda, wiira atthukwe.
4 Atthu a oYuda yaahithukumana wiira amukohe Yehova, nto atthu a ipooma sootheene sa oYuda, yaahirwa wiira amukohe Yehova.
5 Nuumala-vo, Yosafati aaheemela ohoolo wa muloko wa ayuda ni wa oYerusalemu, empa ya Yehova, ohoolo wa nivate nisya,
6 onahimya wiira:
“Khoo Yehova, Muluku a amuhavinre ahu, nyuwo mwa Muluku a wiirimu. Nave kiira munnaawerya mamwene a maloko ootheene? Mmatatani mwanyu mookhalana ikuru ni owerya, nave khuuvo onwerya woovirikanyani.
7 Khoo Muluku ahu, kiira moowoomola atthu a elapo ela ohoolo wa atthu anyu aisarayeli, nave moovaha elapo ela ntoko etthu yoohiyeriwa wiira ekhale ya osuulu wa mpatthani anyu Abrahamu?
8 Nto awo aakela elapo ela ni aateka opuro woowaarya orina nsina nanyu, ariki:
9 ‘Yanikhumelela ehasara, ekhale ya espaata,* ophukeliwa moohixariya, ekwerere, aahiiso etala, hiyo nnimweemela ohoolo wa empa ela ni ohoolo wanyu (okhala wiira nsina nanyu niri empa ela) nave nnimoovekelani wiira munikhaliherye oxanka wahu, nto nyuwo munooniwiriyana ni munoonoopola’.
10 Vano alopwana a wAmoni, a oMowabi, a muttetthe wa omiyaakoni wa oSeyiri, yaawo mwahaaweemerenrye anyu atthu a Isarayeli waapwetexa, okathi yaakhumme aya elapo ya wExiitu, ari vaava. Atthu a Isarayeli, yaahaahapuwa nave khiyaapwetenxe.
11 Vano awo anniniliva aphavelaka onoomola elapo anyu, yeeyo enivanhe anyu ntoko etthu yoohiyeriwa.
12 Khoo Muluku ahu, niireke khamunrowa waaphukela atthu awo? Hiyo khanrina owerya ohoolo wa muttitthi ola muulupale onnirweela. Khaninsuwela etthu nikhanle ahu oopaka, masi maitho ahu anoowehexexani nyuwo”.
13 Okathi owo, atthu ootheene a oYuda, ni axaaraya, anaaya acikhaani ni aalupale, yiira yeemenle ene ohoolo wa Yehova.
14 Vano, eriyari ya muloko ole, munepa wa Yehova waahimukhuruwela Yahaziyeli, mwaana a Zakariya, mwaana a Benaya, mwaana a Yeyeli, mwaana a Mataniyahi, mulevi a osuulu wa Asafi.
15 Yahaziyeli aahihimya wiira: “Nyuwo atthu ootheene a oYuda, ni nyuwo munikhala oYerusalemu, ni mwene Yosafati, nwiriyane oratteene! Enoohimeeryaaweni Yehova tiila: ‘Muhoove, nnakhala muhithukumele mwaha wa muttitthi ola muulupale, okhala wiira ekhotto eyo khahiyo yawinyu, masi ti ya Muluku.
16 Meelo murowe mwakumane naawo. Awo anrowa ovira ephiro ya oSisi, nto nyuwo murowe mwakumane naawo ommalela aya ekhato,* ohoolo wa woothakoni wa oYeruweli.
17 Nyuwo khamunrowa opirisari owana ekhotto eyo. Mwiilokiherye, mweemele paahi, nweheke moota Yehova onrowa awe owoopolani. Khoo nyuwo atthu a oYuda ni a oYerusalemu, muhoove, nnakhala muhithukumele. Meelo munrowa okumana naawo, nto Yehova onrowa okhala ni nyuwo’”.
18 Moowaakuveya, Yosafati aahikokhora uurama mpakha vathi, nave atthu ootheene a oYuda ni anikhala oYerusalemu, yaahuurama ohoolo wa Yehova wiira amukokhorele Yehova.
19 Vano, alevi yaawo yaari a osuulu wa akehathi ni akorathi, yaahivenya wiira amuttottopele Yehova, Muluku a Isarayeli, ni nsu noowiiwanyeya.
20 Mmeeloni mwaya voosiisu, awo yaahivenya anarowa woothakoni wa oTekowa. Okathi yaavenya aya, Yosafati aaheemela onahimya wiira: “Mukiwiriyane, khoo nyuwo atthu a oYuda ni nyuwo munikhala oYerusalemu! Mmwaamini Yehova, Muluku anyu, wiira mukhale oolipa. Mwaakupali maprofeta awe, nto itthu sinooweettelani saana”.
21 Nuumala waakohererya atthu, owo aahaathanla alopwana wiira amwiipeleke Yehova, ni amuttottopeleke awanre ene ikuwo soowaarya, arowaka ohoolo wa alopwana yaakunxe ikaruma sa ekhotto, ariki: “Mmuxukhureleke Yehova, okhala wiira ophenta wawe woororomeleya onikhala mahiku ootheene”.
22 Okathi yaapacenrye aya wiipa isipo mootteeliwa murima, Yehova aahikumiherya ohiiwanana eriyari ya alopwana a wAmoni, a oMowabi, ni a muttetthe wa omiyaakoni wa oSeyiri, yaawo yaatuphenle ayuda. Nuumala-vo, awo yaahiivanana yaawo-ru.
23 Atthu a wAmoni ni a oMowabi yaahaarukunuwela atthu yaakhala muttetthe wa omiyaakoni wa oSeyiri wiira awiive ni waamala-maliha. Okathi yaamalinhe aya atthu yaakhala oSeyiri, yaahiivanana yaawo-ru.
24 Okathi atthu a oYuda yaaphiyale aya empa yoorakamela osulu ya woothakoni, awo yaahiweha muttitthi ole, aweha mirutthu simorenle ene vathi, ohikhanle nnakhala mutthu mmosa mukumi.
25 Vano Yosafati ni atthu awe, yaahirowa okuxa mireerelo sa awanani aya. Awo yaahiphwanya itthu sinceene sooreera, ikuwo ni itthu sooreerexa yaawaakhale aya atthu ookhwa, ahinawerya okuxa etthu ekina. Yaahimaliha mahiku mararu akuxaka itthu iye, okhala wiira khisaareere waatta.
26 Nihiku na neexexe, awo yaahithukumana okhatoni* wa oBeraka, okhala wiira yaahimuttottopela* Yehova weiwo. Tivo opuro ole yaahivaha nsina noowi okhatoni wa oBeraka,* ntoko sinisuweliwa aya mpakha olelo-va.
27 Vano, alopwana ootheene a oYuda ni a oYerusalemu, ahooleliwaka ni Yosafati yaahitthikela oYerusalemu atteeliwe ene murima, okhala wiira Yehova aahiwiiriha otteeliwa murima, mwaha woowaaxintta awanani aya.
28 Nto yaahiphiya oYerusalemu yaakunxe ene atthakare, aviola ni malope, arowa empa ya Yehova.
29 Nave mamwene a ilapo sootheene, yaahimoova Muluku okathi yaiwale aya wiira Yehova aahiwana ni awanani a atthu a Isarayeli.
30 Siiso, omwene wa Yosafati waahikhala ni murettele, nave Muluku awe khaahiyale onvaha murettele ni awanani awe ootheene yaamurukurenrye.
31 Yosafati khaahiyale waalamulela atthu a oYuda. Owo aarina iyaakha 35 okathi aakhanle awe mwene, nave aahilamulela iyaakha 25 oYerusalemu. Maama awe aihaniwa Azuba, mwaana a Xilihi.
32 Yosafati aanitthara ephiro ya paapa awe, Asa. Owo khaahiyale opaka eyo, nave aanipaka itthu sooloka vamaithoni va Yehova.
33 Masi mapuro oorakamela osulu yaakokhoreliwa amuluku eethiru khiyaamala-malihiwe, nave atthu nlelo khiyaalokihenrye mirima saya wiira amphavele Muluku a amuhavinre aya.
34 Itthu sikina siiraneyale ni Yosafati, okhuma woopaceryani mpakha wookiseryani, soolempwa eriyari ya soolepa sa Yehu, mwaana a Hanani, seiyo sitakaaheriwe muliivuruni ya mamwene a wIsarayeli.
35 Nuumala-vo, Yosafati mwene a oYuda, aahaataana ni Akhaziya, mwene a wIsarayeli, yoowo aapaka itthu sootakhala.
36 Siiso, awo yaahiiwanana waapaka apakiti wiira aroweke oTaarisi, nto yaahaapaka apakiti wEsiyoni-Geberi.
37 Masi, Eliyeezeri mwaana a Dodavahu, a oMarexa, aahilavula eprofesia omuhimyaka Yosafati, oriki: “Mwaha woowaataana ni Akhaziya, Yehova onoohonona miteko sanyu”. Vano, apakiti yaahisama, ni khiyaawenrye ophiya oTaarisi.
Inoota
^ Aahiiso, woonasa wene: “Amewoni”.
^ Woonasa wene enihimmwa Ephareya Yookhwa.
^ Aahiiso, “xoowa”.
^ Aahiiso, “nipuro noowaataleya”.
^ Aahiiso, “nipuro noowaataleya”.
^ Eheeberi, “yaahimureeliha”.
^ Nsina nintaphulela, “Mareeliho”.
