Wahala a Nenli 25:1-28
25 Amaziya aarina iyaakha 25 okathi aakhanle awe mwene, nave aahilamulela iyaakha 29 oYerusalemu. Maama awe aihaniwa Yehowadini, a oYerusalemu.
2 Owo aanipaka itthu sooloka vamaithoni va Yehova, masi khaapaka ni murima awe wootheene.
3 Omalaka-ru olipiha omwene awe, aahiwiiva arumeyi awe yaamwiivale paapa awe, yoowo aari mwene.
4 Masi owo khaawiivale anaaya, okhala wiira aahitthara ele yaalempwale Munlamuloni, eliivuru ya Moise, memmo Yehova aarumme awe wiira: “Axipaapa ahiiviwe mwaha wa anaaya, nave anamwane ahiiviwe mwaha wa axipapaya. Masi khula mutthu ohaana wiiviwa mwaha wa etampi awe”.
5 Amaziya aahaathukumanya alopwana ootheene a oYuda, aatthokiha moovarihana ni ahooleli a imusi saya, ni moovarihana ni maxeefi a anakhotto 1.000 ni maxeefi a anakhotto 100, wiira akhaleke oYuda wootheene ni oBeniyamini. Aahaalepa ale yaarina iyaakha 20 orowa ohoolo, nto aahaaphwanya anakhotto 300.000 oosuwela owana ekhotto* wiira akhale atoropa, yaawo yaawerya ovarihela muteko nttheere ni eskuutu yuulupale.
6 Nave-tho aahaaliva italento* 100 sa eparatha anakhotto ootupa 100.000 a wIsarayeli wiira amukhaliherye.
7 Masi mulopwana a Muluku eekeekhai aahirowa okumana nuuwo, omuleela wiira: “Khoo mwene, muhaahiye anakhotto a wIsarayeli arowaka ni nyuwo, okhala wiira Yehova khokhanle ni atthu a wIsarayeli, nnakhala ni atthu a wEfrayimi.
8 Masi murowe mekhinyu ni mulipihe murima wiira nwane ekhotto. Muluku eekeekhai ookhalana owerya woowookhaliheryani. Mwaahiire siiso, owo onimoohiyani wiira muxinttiwe ni nwanani anyu”.
9 Vano Amaziya aahimukoha mulopwana a Muluku eekeekhai oriki: “Ankhi italento iye 100 kaavanhe aka atoropa a wIsarayeli, kiireke sai?” Mulopwana a Muluku eekeekhai aahaakhula wiira: “Yehova onoowerya woovahani itthu sinceene ovikana iyo”.
10 Siiso Amaziya aahaamwarya atoropa aaruuhale awe wEfrayimi, aattikiherya elapo aya. Masi atoropa awo yaahinanariwa vanceene ni atthu a oYuda, nto yaahitthikela elapo aya enanariwe ene.
11 Moottharelana, Amaziya aahilipiha murima, nave aahirowa ni atoropa awe Okhatoni wa Maakha, nto aahiwiiva alopwana 10.000 a oSeyiri.
12 Nave alopwana a oYuda yaahaavara alopwana 10.000 akumi. Nto awo yaahaaroiha vasulu vamwaako, yaarihela vathi. Vano awo yaahinyaanyeya.
13 Masi atoropa yaale Amaziya aamwanrye awe wiira ahirowe okhottoni ni yena, yaahituphela ipooma sa oYuda, okhuma oSamariya mpakha oBethi-Horoni, awiiva atthu 3.000 ni akuxa mireerelo sinceene.
14 Okathi Amaziya aatthinke awe, aaronwe awe owiiva atthu a wEdomi, aahaaruuha amuluku a atthu a oSeyiri, aakhaliha amuluku awe, onapacerya waarumeela ni waavaha mwiixi wa mukuttho woopahiwa.
15 Nto Yehova aahinanariwa vanceene ni Amaziya, omuruma profeta omukoha wiira: “Xeeni munaatthara anyu amuluku a atthu yaawo ahiwenrye owoopola atthu aya mmatatani mwanyu?”
16 Nlelo olavulaka, mwene aahihimya wiira: “Niireke nihoothanlani wiira munvaheke miruku mwene? Mmaalele vaavo! Muniphavela okhwa?” Nto profeta owo aahimaala, masi ahincererya oriki: “Koosuwela wiira Muluku onrowa woopwetexani mwaha woopaka etthu ela ni mwaha woohiwiriyana miruku saka”.
17 Nuumala waakoha ale yanvaha miruku, mwene Amaziya a oYuda aahaaruma alopwana orowa wa Yowasi, mwaana a Yowakhazi, mwaana a Yehu, mwene a wIsarayeli, omuleela wiira: “Murwe, niwane ekhotto”.*
18 Mwene Yowasi a wIsarayeli, aahiruma oleeliwa mwene Amaziya a oYuda wiira: “Mwiiwa wa oLiibano waahiruma oleeliwa mwiri wa eseeturu wa oLiibano wiira: ‘Mukivahe mwaninyu mwaamuthiyana wiira otheliwe ni mwanaka mwaamulopwana’. Masi mwaamunama mmosa a mutakhwani wa oLiibano aahivira opuro ole waari awe mwiiwa, onyakela.
19 Nyuwo munihimya wiira: ‘Miyo* koowiiva atthu a wEdomi’. Tivo murima anyu oniixinnuwiha aya, mulipelelaka ovuwihiwa. Masi vano muhaleke owannyinyu.* Xeeni muniphavela anyu wiikumiherya ehasara ni opwetexiwa, mwaapwetexaka-tho atthu a oYuda?”
20 Masi Amaziya khaawiriyanne, okhala wiira Muluku eekeekhai aaphavela onvahererya mmatatani mwa nwanani awe, mwaha woowaatthara amuluku a wEdomi.
21 Siiso, mwene Yowasi a wIsarayeli aahirowa. Owo ni mwene Amaziya a oYuda, yaahiwana ekhotto oBethi-Xemexi, muttetthe wa oYuda.
22 Atthu a oYuda yaahiweriwa ni atthu a wIsarayeli, nto khula mmosa aahitthyawela owannyawe.*
23 Mwene Yowasi a wIsarayeli aahinvara mwene Amaziya a oYuda, mwaana a Yowasi, mwaana a Yowakhazi,* oBethi-Xemexi. Nuumala-vo aahimuroiha oYerusalemu, nave aahipwexa ixiri sa oYerusalemu ikoovatu 400,* okhuma Mukhora wa wEfrayimi mpakha Mukhora wa Vakantu.
24 Owo aahikuxa eweero yootheene, eparatha, ni mireerelo sootheene saari mpaani mwa Muluku eekeekhai saakhapeleliwa ni Obedi-Edomi, ni opuro waasukiwa muhakhu wa empa ya mwene,* vamosa ni atthu akina wiira akhale neemexeryo. Nuumala-vo aahitthikela oSamariya.
25 Amaziya, mwaana a Yowasi, mwene a oYuda, nlelo aahikhala iyaakha 15 nuumala Yowasi, mwaana a Yowakhazi, mwene a wIsarayeli, okhwa.
26 Itthu sikina siiraneyale ni Amaziya, okhuma woopaceryani mpakha wookiseryani, soolempwa Muliivuruni ya Mamwene a oYuda ni a wIsarayeli.
27 Okhuma okathi Amaziya aahiyale awe omutthara Yehova aahirukunuweliwa oYerusalemu, otthyawela oLakixi. Masi yaahirummwa alopwana omutthimakela oLakixi, amwiiva weiwo.
28 Nto awo yaahiteexa murutthu awe vakhavaloni attikiherya oYuda, anvitha ni amuhavinre awe epooma ya oYuda.
Inoota
^ Eheeberi, “oothanliwa”.
^ Etalento emosa yaalemela ikiilu 34.2. Munwehe Apendise B14.
^ Aahiiso, “noonane niitho nniitho”.
^ Eheeberi, “Nyuwo”.
^ Aahiiso, “opalaasio wanyu”.
^ Eheeberi, “mutentani mwawe”.
^ Nave-tho onniihaniwa Akhaziya.
^ Etthu yoowiiraka imeeturu 178. Munwehe Apendise B14.
^ Aahiiso, “epalaasio”.
