Wahala a Nenli 26:1-23
26 Moottharelana, atthu ootheene a oYuda yaahimukuxa Oziya, yoowo aarina iyaakha 16, amukhaliha mwene nipuro na paapa awe, Amaziya.
2 Owo aahiteka-tho epooma ya wElothi, aattikiherya atthu a oYuda, nuumala mwene* orowa omumula ni amuhavinre awe.
3 Oziya aarina iyaakha 16 okathi aakhanle awe mwene, nave aahilamulela iyaakha 52 oYerusalemu. Maama awe aihaniwa Yekoliya a oYerusalemu.
4 Owo aanipaka itthu sooloka vamaithoni va Yehova, ntoko paapa awe, Amaziya, aapanke awe.
5 Nave aanimphavela Muluku mahiku a Zakariya, yoowo aamwiixuttinhe omoova Muluku eekeekhai. Okathi amphavela awe Yehova, Muluku eekeekhai aanimureeliha.
6 Owo aahirowa owana ni afilisti ni aahipwexa exiri ya oGathi, exiri ya oYabine ni exiri ya wAxidodi. Nuumala-vo, aahiteka ipooma muttetthe wa wAxidodi ni eriyari ya afilisti.
7 Muluku eekeekhai khaahiyale omukhaliherya ikhotto aawana awe ni afilisti, atthu a wArabia, yaawo yaakhala oGuribayali, ni atthu a oMewoni.
8 Atthu a wAmoni yaahipacerya omuliva mpoosito Oziya. Ovuwa wawe waahimwareela mpakha wExiitu, okhala wiira aahikhalana owerya wuulupale.
9 Nave-tho, Oziya aahiteka ipa soorakamela osulu oYerusalemu, waattamela Mukhora wa Vakantu, Mukhora wa Omukotini ni Vanlipiheryo, nave aahilipiha ipa iyo.
10 Nave-tho, aahiteka ipa soorakamela osulu woothakoni, othipa* ihime sinceene (okhala wiira khaareerane inama), nave aahipaka etthu emosa-ru oXefela ni opuro woowaataleya. Omiyaakoni ni oKarmelo, aahikhalana alimi ni alopwana yaavara muteko imatta sa ewuuva, okhala wiira aanisiveliwa ni miteko sa mmatta.
11 Nave-tho Oziya aahikhalana anakhotto yaari oolikana ene owana ekhotto. Awo yaanikhuma arowaka okhottoni, akawanyiweene ikurupu. Yaahikontariwa ni yaahilempwa ni sekretaario Yeyeli, vamosa ni mukhulupale Maaseya, yaawo yaahooleliwa ni Hananiya, mmosa a makhulupale a mwene.
12 Nummuru nootheene na ahooleli a imusi saya, yaawo yaahoolela anakhotto awo ootupa, naari 2.600.
13 Nummuru na anakhotto yaahoolela aya naari 307.500 alopwana oolikana ene owana ekhotto, anakhotto oowerya wiira amukhaliheryeke mwene owana ni awanani awe.
14 Oziya aahaavahererya anakhotto awo iskuutu, mavaka, ikapaseeti, ikuleti sa eyuuma, miyuura ni afiska wiira avonyeke maluku.
15 Ohiya-vo, oYerusalemu aahipaka maakina yaawo yaadesenyariwe ni manxinyero. Maakina awo yaahipwehiwa ipa soorakamela osulu ni ikantu sa ixiri, nave yaanivonyaniwa mattheere ni maluku maalupale. Siiso, ovuwa wawe waahimwareela mapuro ootheene, okhala wiira aahikhaliheriwa vanceene ni anikhala oolipa.
16 Masi, nuumala yena okhala oolipa, murima awe waahisareya wiisoona iirelaka opwetexiwa, nave aahipaka etthu ohooniheryaka ororomeleya ohoolo wa Yehova Muluku awe, okelaka mutemplo mwa Yehova wiira opahe nsenso* valtaari a nsenso.
17 Moowaakuveya, namukuttho Azariya ni anamukuttho akina 80 oolipa murima a Yehova, yaahimutthimakela.
18 Awo yaahimurowela mwene Oziya, anamuhimeerya wiira: “Khivanooreerelani nyuwo mwene Oziya, ompaherya nsenso Yehova! Anamukuttho paahi takhanle oopaha nsenso, okhala wiira osuulu wa Aroni, yaawo areerihiwe. Mukhume opuro ola woowaarya, okhala wiira moopaka etthu mooniheryaka ohiroromeleya, nave khamunrowa ovuwihiwa ni Yehova Muluku mwaha wa etthu ela”.
19 Masi Oziya, yoowo aakunxe mmatatani etthu yaapahiwa-mo nsenso wiira opahe nsenso, aahinanariwa vanceene. Onanariwe ene siiso ni anamukuttho, yaahimukhumelela makokho* vayuuci ohoolo wa anamukuttho, mpaani mwa Yehova waattamela valtaari a nsenso.
20 Okathi namukuttho muulupale Azariya ni anamukuttho ootheene yanwehale aya, yaahoona wiira yaahimukhumelela makokho vayuuci vawe! Nto moowaakuveya yaahimukumiherya ota, nave owo aahaakuva okhuma, okhala wiira Yehova aahimuhukhumu.
21 Mwene Oziya aahikhalana makokho mpakha nihiku aakhwiiye awe. Nave owo aakhala empa awe mekhawe ovalaanyiwe ene ni atthu akina, mwaha wa makokho awe, maana aahoomoliwa empa ya Yehova. Mwanawe, Yotami, taakhapelela empa* ya mwene, aaphukelaka atthu a elapo ele.
22 Itthu sikina siiraneyale ni Oziya, okhuma woopaceryani mpakha wookiseryani, soolempwa ni profeta Yesaya, mwaana a Amozi.
23 Vano, Oziya aahirowa omumula ni amuhavinre awe, ovithiwa ni amuhavinre awe ematta ya mamwene, okhala wiira yaahihimya wiira: “Ola namakokho”. Vano mwanawe, Yotami, aahikhala mwene nipuro nawe.
Inoota
^ Eyo piiyo, paapa awe, Amaziya.
^ Woonasa wene vamwala.
^ Aahiiso, “erupani”.
^ Aahiiso, “makuttula; maretta”.
^ Aahiiso, “epalaasio”.
