Wahala a Nenli 8:1-18
8 Nuumala iyaakha 20 Salomoni aavirinhe awe otekaka empa ya Yehova ni empa awe,
2 Salomoni aahiteka-tho ipooma aavahiwe awe ni Hirami, aahiya aisarayeli* akhalaka memmo.
3 Muhoolo mwaya, Salomoni aahirowa oHamati-Soba, okuxa epooma eyo.
4 Nuumala-vo, owo aahilipiha epooma ya oTadimori yeeyo yaari moothakoni, ni ipooma sootheene saari arumasiya seiyo aatenke awe oHamati.
5 Owo aahiteka-tho oBethi-Horoni Woottukhuwa ni oBethi-Horoni Wookhuruwa, ipooma soolipihiwa saarina ixiri, mikhora ni itaranka.
6 Nave aahiteka-tho oBaalathi vamosa ni ipooma sootheene saari arumasiya a Salomoni, ipooma sa ikaaro saapuruliwa ni inama, ipooma sa anakhavalo ni khula etthu Salomoni aaphavela awe oteka oYerusalemu, oLiibano ni ilapo sootheene aalamulela awe.
7 Vano, atthu ootheene yaahanle a ahiti, amori, aperizi, ahivi ni ayebusi, yaawo yahiirela mpantta atthu a Isarayeli,
8 yaari a osuulu wa atthu yaakhala elapo ele, yaawo aisarayeli yahaapwetenxe aya, mwene Salomoni aahaakuxa wiira avareke muteko wookhanyereriwa mpakha olelo-va.
9 Masi Salomoni khaakhalinhe aisarayeli ipottha wiira avareke muteko awe, okhala wiira awo yaari anakhotto awe, maxeefi a anamakhaliherya awe, maxeefi awe a ikaaro saapuruliwa ni inama ni anakhavalo.
10 Yaahikhala maxeefi 250 a ahooleli, yaawo yaaweherya muteko a mwene Salomoni. Awo yaari makapataaxi a anamuteko.
11 Nave-tho, Salomoni aahimukuxa mwaana mwaamuthiyana a Farawo epooma ya Davidi, omuroiha empa aamutekenle awe, maana aahihimya wiira: “Nnaamwi ori ene mwaaraka, khonrowa okhalaka empa ya Davidi, mwene a wIsarayeli, okhala wiira mapuro naari aya nivuku na nivarihano na Yehova toowaarya”.
12 Moottharelana, Salomoni aahinvaha Yehova mikuttho soopahiwa, valtaari a Yehova, yoowo aamutenke awe ohoolo wa mukhora.
13 Owo aanitthara eprograma ya khula nihiku ni aanivaha mikuttho ottharaka yooruma ya Moise ya isaabadu, khula mweeri musya, ni ifesta saathanliwe opakiwa ikwaha tthaaru vamwaakhani, eyo piiyo, Efesta ya Iphaawu Soohiheliwa Eferemento, Efesta ya Isumana, ni Efesta ya Maxaxa.
14 Nave-tho, ottharaka yooruma ya paapa awe, Davidi, aahithanla ekurupu ya anamukuttho wiira evareke muteko aya, alevi wiira akhaleke opuro aya, amuttottopelaka Muluku ni arumeelaka ohoolo wa anamukuttho ettharaka eprograma ya khula nihiku. Nave aahithanla ikurupu sa makwarta wiira siweheryeke khula mukhora, okhala wiira eyo ti etthu aarumme awe Davidi, mulopwana a Muluku eekeekhai.
15 Awo khiyaahiyale otthara yooruma mwene aavanhe awe anamukuttho ni alevi, yaavarihana ni myaha sootheene, aahiiso yaavarihana ni arumasiya.*
16 Vano muteko wootheene wa Salomoni waahitthokiheya oratteene, okhuma nihiku yaapaceriwe aya otekiwa alisenso a empa ya Yehova mpakha omalihiwa. Siiso empa ya Yehova yaahimalihiwa.
17 Okathi ene yoowo Salomoni aahirowa wEsiyoni-Geberi ni wElothi mukerekhere mwa ephareya, elapo ya wEdomi.
18 Hirami aahaaruma arumeyi awe wiira amuroihele apakiti ni atthu yaasuwela oweettiha oratteene apakiti awo. Awo yaahirowa vamosa ni arumeyi a Salomoni wOfiri, ni yaahikuxa weiwo italento 450 sa eweero, amuroihela mwene Salomoni.
