Wahala a Nenli 9:1-31
9 Pwiyamwene a oXeeba, aahiiwa ovuwa Salomoni aarina awe, tivo aahirowa oYerusalemu omweehererya Salomoni, ompakelaka makoho oovila. Owo aahooliwe ni ekurupu yuulupale ya arumeyi awe ni ikamelo saakunxe makhura a baalsamu ni eweero yoowaatta ni maluku oowaarya. Aahirowa wa Salomoni, omuleela itthu sootheene saari vamurimani vawe.
2 Salomoni aahaakhula makoho ootheene a pwiyamwene owo. Khiivo etthu yaari yootepa ovila, Salomoni aahaawerya awe omutthokiherya.
3 Okathi pwiyamwene a oXeeba aawenhe awe osuwela wa Salomoni, empa aatenke awe,
4 eyoolya yaakhala vameesa vawe, moota yaakilathi aya arumeyi awe, ni oweha muteko yaavara aya ale yaarumeela vameesa ni ikuwo yaawara aya, alipa-oolawiha soowurya ni ikuwo yaawara aya, ni mikuttho aavaha awe khula nihiku mpaani mwa Yehova, khaarina etthu yoohimya.
5 Pwiyamwene owo aahimuhimeerya mwene wiira: “Itthu sootheene kiiwale aka kiri ene elapo aka sa itthu mpanke anyu ni ankhili anyu saari seekeekhai.
6 Masi miyo nkaakupanli itthu iyo saahimmwa, mpakha orwa ni oweha ni maitho aka ala. Mweekeekhai, nkaaleeliwe itthu sootheene. Ankhili anyu taalupale ovikana itthu kaiwale aka.
7 Oohakalala atthu anyu, ni arumeyi anyu, yaawo aneemela ohoolo wanyu okathi wootheene, yaawiriyanaka ankhili anyu!
8 Ottottopeliwe Yehova Muluku anyu, yoowo osiveliwe ni nyuwo, ni owiirinheni okilaathi veehiceni vawe ntoko mwene a Yehova Muluku anyu. Mwaha woowi Muluku anyu onnaaphenta atthu a Isarayeli ni oniphavela wiira akhaleke mahiku ootheene, ohookhalihani mwene aya wiira mulamuleleke ni exariya ni ekeekhai”.
9 Moottharelana, pwiyamwene owo aahinvaha mwene italento* 120 sa eweero, makhura manceene a baalsamu, ni maluku oowaarya. Khatonko oruuhiwa makhura a baalsamu ntoko ale pwiyamwene a oXeeba anvanhe awe mwene Salomoni.
10 Nave-tho arumeyi a Hirami ni arumeyi a Salomoni, yaawo yaaruuhale eweero ya wOfiri, yaahiruuha matera a sandalu ni maluku oowaarya.
11 Mwene aahirumeela matera a sandalu, wiira olipihane empa ya Yehova, ni empa ya mwene, nave aahaapaka aviola, ni ikaruma sikina sa masipo aavaha alipa-oowiipa. Elapo ya oYuda khiyaatonko owehiwa matera yaalikana naawo.
12 Mwene Salomoni aahinvaha pwiyamwene a oXeeba, itthu sootheene aaphavela awe ni aavekenle awe, ovikana itthu pwiyamwene aamuruuhenle awe mwene. Nuumala-vo, owo aahikhuma ni arumeyi awe onatthikela elapo awe.
13 Olemela wa eweero Salomoni aakhela awe khula eyaakha, waakhala wa italento 666.
14 Nave-tho, aanaakhela mpoosito wa alipa a nakoso, alipa a nakoso ooweetteetta, ni wa mamwene ootheene a wArabia ni makuvernatoro a mulaponi, yaawo yaamuruuhela Salomoni eweero ni eparatha.
15 Mwene Salomoni aahipaka iskuutu suulupale 200 sa eweero yaatakaaheriwe eyuuma (khula eskuutu yaalemela ixeekele* 600 sa eweero).
16 Nave-tho aahipaka iskuutu saamukhaani 300 sa eweero saatakaaheriwe eyuuma (khula eskuutu yaamukhaani yaalemela ikarama 570 sa eweero). Moottharelana, mwene aahipweha mpaani mwawe, yiitthaniwa Empa ya Etakhwa ya oLiibano.
17 Nave-tho, mwene aahipaka ehice yuulupale ya maino a etthepo, osirika ni eweero yooreerexa.
18 Wiira mutthu ophiye veehiceni-vo, aahaana owela eskatta mavalo 6, nave yaahikhala etthu yaapweheriwa inawu yeeyo yaalupanyiwe ni ehice eyo. Ehice eyo yaahikhalana miyoono miili, khula mpantta wa moono, yaahikhala elatarato ya kharamu.
19 Mavalo awo 6 a eskatta, saahikhala ilatarato 12 sa akharamu, khula mpantta wa mavalo awo 6 yaahikhala elatarato emosa. Khuuvo omwene mukina waarina ehice yaalikana ni ele.
20 Ikoopho sootheene sa mwene Salomoni, saari sa eweero, ni mireerelo sootheene sa empa eniihaniwa Etakhwa ya oLiibano, saari sa eweero yooreera. Khiyaakhanle etthu yaapakiwe ni eparatha, okhala wiira mahiku a Salomoni, eparatha khiyooneliwa vatthu.
21 Apakiti a mwene yaanirowa oTaarisi ni arumeyi a Hirami. Ekwaha emosa wa khula iyaakha tthaaru, apakiti awo a oTaarisi yaanirwa akunxe ene eweero, eparatha, maino a etthepo, akhole ni axipalame aalupale.
22 Mwene Salomoni aari oothaaciri vanceene, ni aahikhalana ankhili anceene, waavikana mamwene ootheene a valaponi.
23 Vano, mamwene ootheene a valaponi, yaanirwa wiira yaawiriyaneke ankhili a Salomoni, yaawo Muluku eekeekhai anvahale awe.
24 Mamwene awo ootheene yaanimuruuhela itthu ntoko: mireerelo sa eparatha, sa eweero, ikuwo, ikaruma sa ekhotto, makhura a baalsamu, ikhavalo ni axinama aniihaniwa muula.* Eyo yiiraneya khula eyaakha.
25 Salomoni aahikhalana mapuro 4.000 saapwehiwa ikhavalo saapurula ikaaro sawe, nave aahikhalana ikhavalo* 12.000. Nave aanipweha ikaaro iyo sa ekhotto ni ikhavalo mpooma ni oYerusalemu waattamela wa mwene.
26 Nave owo anaalamulela mamwene ootheene okhuma muro Eufrate, mpakha muttetthe wa afilisti omalela mukano wa wExiitu.
27 Mwene aahisariha eparatha oYerusalemu, ntoko maluku, nave aahisariha matera a eseeturu, ntoko miri sa ifiiku sa oXefela.
28 Awo yaanimuruuhela Salomoni ikhavalo sa wExiitu ni ikhavalo sa ilapo sootheene.
29 Itthu sikina siiraneyale ni Salomoni, okhuma woopaceryani mpakha wookiseryani, soolempwa eriyari ya moolumo a profeta Natani, eprofesia ya Ahiya a oSilo ni itthu ooniheriwe awe Ido, mulipa onisuwela otaphulela itthu ooniheriwe awe ni Muluku, seiyo saamuhimya Yerobowamu mwaana a Nebathi.
30 Salomoni aahaalamulela iyaakha 40 atthu ootheene a Isarayeli, oYerusalemu.
31 Moottharelana, Salomoni aahirowa omumula ni amuhavinre awe. Nto, aahivithiwa epooma ya Davidi, paapa awe. Vano mwanawe, Robowamu, aahikhala mwene nipuro nawe.
Inoota
^ Etalento emosa yaalemela ikiilu 34.2. Munwehe Apendise B14.
^ Exeekele emosa yaalemela ikarama 11.4. Munwehe Apendise B14.
^ Mwaamunama onlikana ni puuru, yoowo onitotholiwa okathi onikumanela aya ekhavalo ni puuru oothiyana.
^ Aahiiso, “anakhavalo”.
