2 Yohani 1:1-13
1 Kinoolepelani ti miyo, mutokweene anyu,* koolepelakani nyuwo, muthiyana othanliwe ni Muluku, vamosa ni aniinyu. Kinnoophentani ni murima wotheene, ohiya miyo paahi, masi atthu otheene ansuwela ekeekhai, annoophentani-tho.
2 Hiyo ninnoophentani mwaha wa ekeekhai eri vamurimani vahu, ni enrowa okhalaka ni hiyo mahiku otheene.
3 Muluku, Tiithi ihu a wiirimu, vamosa ni Yesu Kristu, Mwanawe, anoonivaha ophenta ni soowiixuttiha iyo sa ekeekhai. Awosa anrowa onooniherya oreera murima wuulupale, onimorela ikharari ni onivaha murettele.
4 Kootteeliwa murima waaphwanya aniinyu akina yeettelaka ekeekhai, ntoko nirummwale ahu ni Tiithi.
5 Vano, kinoolepelani nyuwo, muthiyana, koovekelakani wira mphentaneke mukina ni mukhwaawe. Yooruma ela khahiyo esya, masi ti yeele naakhenle ahu okhuma woopaceryani.
6 Nave ophenta onitaphulela ohihiya weettela sooruma sa Tiithi. Yooruma ene, yeeyo munisuwela anyu okhuma woopaceryani, tiila: mweetteke moophentani.
7 Tthiri aakhumelela mulaponi anawoothe anceene, yaawo ahinkupali wira Yesu Kristu aahirwa ntoko mutthu. Nto ole onipaka eyo, nawoothe ni nwanani a Kristu.
8 Tivo, mwiipasoopeke wira muhipwetexe miteko sahu, seiyo nivanre ahu ni wiilipiha. Ohiya-vo, mphwanye otthuveliwa woomalela.
9 Ole ohinitthara soowiixuttiha sa Kristu, onaixuttiha itthu sikina, khoneemereriwa ni Muluku. Ole ohinihiya otthara soowiixuttiha sa Kristu, onneemereriwa ni Tiithi ni Mwaana.
10 Akhala mutthu onrwa okumana ni nyuwo, ohinaixuttiha itthu sinivarihana ni ele Kristu iixuttihale awe, muhimwaakhele vatthokoni vanyu, nnakhala omukoha ihaali.
11 Okhala wira ole onimukoha ihaali, onnikhaliherya miteko sawe sootakhala.
12 Kaahikhalana itthu sinceene soowoolepelani, masi nkiniphavela woolepelani mpapheloni-mu ni etinta. Kinnilipelela orwa weiwo, kilavule ni nyuwo niitho-nniitho, wira otteeliwa wanyu murima okhale woomalela.
13 Anamwane a munninyu oothanliwa, annookhomasani.
Inoota
^ Aahiiso, “oowuuluvala”.
