aEefeso 4:1-32
4 Miyo, Paulo, kitthukweliwe mwaha wa Apwiya, kinnootumereryani wira mukhaleke moovarihana ni ele mwiihaneliwe anyu.
2 Okathi wotheene, mukhaleke oowiiyeviha, oomaala ni oopixa murima. Nvilelaneke mukina ni mukhwaawe, mphentanaka.
3 Mmananiheke okhalana wiiwanana omosa-ru onikumiheriwa ni munepa woowaarya, ni murettele onikhaliherya wiiraana.
4 Erutthu eri emosa-ru, munepa woowaarya ori mmosa-ru, ntoko sikhanle aya nlipelelo nimosa-ru, nenno mwiihaneliwe anyu.
5 Pwiya ori mmosa-ru, waamini ori omosa-ru, opatiso ori omosa-ru;
6 Muluku ori mmosa-ru, yoowo tori Tiithi a atthu otheene. Owo ti muulupalexa waavikana atthu otheene, ni onnivara muteko onirumeelaka otheene ahu, nave owerya wawe onnivara muteko mwa inamuna sotheene.
7 Khula mmosa a hiyo ohaakhela oreera murima wuulupale wa Muluku. Nto Kristu tonvahale khula mmosa a hiyo oreera murima iwo.
8 Soolempwa sinihimya wira: “Okathi aawenle awe osulu, aahaakuxa alipa-ootthukweliwa; aahaaruma alopwana awo wira akhale soovaha”.
9 Vano, antaphulela exeeni masu oowi “aawenle awe osulu”? Antaphulela wira aapacenrye okhuruwela elapo ela ya vathi.
10 Ole aakhuruwenle vathi-va, ti yoole aawenle osulu, ovikana erimu, wira omalelihe itthu sotheene.
11 Nave aahaavahererya akina mmulokoni wira arumeeleke ntoko arummwa, akina ntoko maprofeta, akina ntoko anamalaleya,* akina ntoko amakampusi ni alipa-oowiixuttiha.
12 Owo aahiira siiso, wira owiirihe* ale oororomeleya* weetta vookhalela, avaraka muteko wookhaliherya ni olipiha erutthu ya Kristu,
13 wira otheene ahu nikhalane waamini omosa-ru, ni omusuwela saana Mwaana a Muluku, wira nikhale mutthu muulupale, ni atthu ookhoomala ntoko siri awe Kristu.
14 Tivonto, nihikhale ntoko anamwane, okhala wira ole onitthara soowiixuttiha sowoothiwa sa atthu anaawoka akhwaaya, onrowa olikanaka ni ekalawa eri mphareya, enipuruliwa ni epheyo vamosa ni mawimpi, eroihiwaka ninno-ninno.
15 Masi, nilavuleke ekeekhai ni wooniherya ophenta, siiso nnoowerya okhala atthu ookhoomala mwa inamuna sotheene, wira neetteke moovarihana ni Kristu, ori muru.
16 Mwa yoowo, erutthu yotheene yoolupanyiwa* oratteene, nto khula mpantta wa erutthu onnikhaliherya ipantta sikina ovaha ele erutthu eniphavela aya. Okathi khula mpantta onivara aya saana, onniiriha erutthu wunnuwa wira yotheene elipe moophentani.
17 Tivo, kinnooleelani kootumereryakani ohoolo wa Apwiya, wira muheetteke-tho ntoko sineetta aya atthu oohaamini; awo antthara miyuupuwelo saya soohiloka.*
18 Muupuwelo aya oneettihiwa ni epiphi, nave aarakamela okumi Muluku onivaha awe, okhala wira khaniphavela omusuwela Muluku mwaha wa wuumiha waya murima.*
19 Awo aarimeeliwa mukhalelo wotheene wooreera, khanuuliwa muru;* nave ahiivahererya mweettelo woohiloka onooniherya ohuuliwa muru,* ni anniira itthu sotheene soonanara ahiphiyeriwaka.
20 Masi nyuwo muhiixutta wira Kristu khahiyo siiso.
21 Yesu ohiixuttiha ekeekhai, nto vakhala wira muhiiwa ni muhiixuttihiwa ni yena, weeso munnisuwela oratteene itthu iyo.
22 Nyuwo muhiixuttihiwa wira murule omutthu anyu wa khalai, yoowo onivarihana ni mweettelo anyu wa khalai ni onihononiwa ni soophavela saya sowoototha.
23 Ni wira muhihiyeke okhalihiwa musya ni ikuru sineettiha muupuwelo anyu.
24 Masi nwareke omutthu musya, opattuxiwe moovarihana ni ele Muluku oniphavela awe, oneettihiwa ni exariya yeekeekhai ni ororomeleya weekeekhai.
25 Vano muhiyale anyu wootha, khula mmosa a nyuwo olavuleke ekeekhai ni mukhwaawe, okhala wira otheene ahu nniirela mpantta erutthu emosa-ru.
26 Munanariweke, masi muhittheke; muhihiye nsuwa nikelaka nlelo munanariwe ene.
27 Muhinvahe opuro Diabo.
28 Ole ori nawiiye,* ottharuwe wiiya; ohiya-vo, iimananiheke ovara muteko wooloka ni matata awe, wira okhalaneke etthu yowaavaha ale ahirina.
29 Mwaano mwanyu, ahikhume moolumo ootakhala, masi mulavuleke itthu soolipiha, vanreerela aya, wira mwaaphwanyihe mureerelo ale anoowiriyanani.
30 Nave, muhimuriipiheke* murima Muluku, mukhoottaka munepa woowaarya, yoowo muheliwe anyu ekanyeryo ya nihiku ninrowa anyu woopoliwa.*
31 Murihele ottaiwene makhalelo otheene a oruttu, onanariwa, oviruwa, owali, oruwana, vamosa ni sootakhala sa khula enamuna.
32 Masi mureerelaneke murima, moonelaneke othunku, mulevelelaneke ni murima wotheene, ntoko Muluku oolevelenlyaaweni ni murima wotheene, mwa Kristu.
Inoota
^ Aahiiso, “anamalaleya a ihapari sooreera”.
^ Aahiiso, “owiixuttihe”.
^ Ekereku, “ale oowaarya”.
^ Aahiiso, “yookhomanyiwa”.
^ Aahiiso, “soohikhala etthu; seethiru”.
^ Ekereku, “ohiphavela waya wiiwa”.
^ Aahiiso, “khanoona ehaaya”.
^ Ekereku, aselgéia. Nwehe Moolumo Ootthokiheriwa ani: “Mweettelo Woohiloka Onooniherya Ohuuliwa Muru”.
^ Aahiiso, “natarau”.
^ Aahiiso, “muhiwereiheke”.
^ Nwehe Moolumo Ootthokiheriwa ani: “Yoowoopola”.
