aGalasia 1:1-24
1 Miyo murummwa Paulo, kinnoolepelani nyuwo. Khuuvo mutthu okithanlale wira kikhale murummwa, masi kithanliwe ni Yesu Kristu vamosa ni Muluku, Tiithi ihu, yoowo omuhihimunxe Yesu owo mookhwaani.
2 Tthiri, miyo Paulo vamosa ni axinna akina oowaamini ari ni miyo, ninnoolepelani nyuwo, a miloko sa oGalasia:
3 Oreera murima wuulupale ni murettele wa Muluku Tiithi ihu, ni wa Yesu Kristu Pwiya ahu, okhale ni nyuwo.
4 Kristu ohiivahererya mwaha wa itampi sahu, wira onaakiherye olumwenku ola* wootakhala, ntoko oniphavela awe Muluku, Tiithi ihu.
5 Muluku owo ovuwihiwe mahiku otheene ni voohimala. Amen.
6 Kinnitikinihiwa okhala wira niinaano-ru moomuhiya Muluku, yoowo owiihanneni orumeelaka oreera murima wuulupale wa Kristu, wira mweemererye enamuna ekina ya ihapari sooreera.
7 Khahiyo wira sirookhala ihapari sikina sooreera. Masi aakhala atthu akina aniphavela woohapuxani ehononaka ihapari sooreera sinimuhimya Kristu.
8 Nto, hata hiyo aahiiso nlaikha na wiirimu, noolaleeryakani ihapari sooreera sinivirikana ni ihapari sooreera noolalenryaahuni, mutthu owo otakhaliwe.
9 Ntoko naahimmye ahu khalai, kinnihimya-tho vano wira: Ole onoolaleeryani ihapari sooreera sinivirikana ni iye mwaakhenle anyu, mutthu owo otakhaliwe.
10 Miyo nkiniphavela weemereriwa ni atthu, masi kiniphavela weemereriwa ni Muluku. Tivo, nkineererya waasiveliha atthu. Vaakhanle wira nlelo kinaasiveliha atthu, nkaarowa okhala murumeyi a Kristu.
11 Axinnaka, kiniphavela woosuwelihani wira ihapari sooreera koolalenryaakani khasinikhuma wa apinaatamu,
12 okhala wira khahiyo apinaatamu akivanhe ihapari iyo, nave nkiixuttihiwe ni apinaatamu, masi Yesu Kristu, tokisuwelinhe.
13 Ntoko munisuwela anyu, okathi keettela aka etiini ya ayuda, miyo kaanilupattha vanceene* muloko wa Muluku, nave kaanipaka itthu sinceene sootakhala wira kimala-malihe muloko owo.
14 Miyo kaanitepa orowa ohoolo etiini ya ayuda, waavikana atthu akina a elapo aka naalikana ahu iyaakha, ni kaanitepa okhalela nthiti otthara soolema sa amuhavinre aka.
15 Vano, Muluku, yoowo okithanlale kihinatthi oyariwa ni okiihanne orumeelaka oreera wawe murima wuulupale, aahoona oreerela
16 okisuweliha Mwanawe, wira kaalaleerye ale ahikhanle ayuda ihapari sooreera sinimuhimya mwaana owo. Miyo nkaaronwe onvekela miruku mutthu* mukina,
17 nnakhala nkaaronwe oYerusalemu waakoha ale yaapacenrye okhala arummwa kihinatthi miyo, masi kaaronwe wArabia, nuumala-vo, kaahitthikela oDamaasiko.
18 Nuuvira iyaakha tthaaru, kaahirowa oYerusalemu omuxukurya Keefa,* ni kaahikhala nuuwo mahiku 15.
19 Murummwa mukina kanwenhe aka aari Yakobo paahi, munnaya Apwiya.
20 Kinnihimya ohoolo wa Muluku, wira itthu iya kinoolepelaakani ti seekeekhai.
21 Nuumala-vo, miyo kaahirowa muttetthe wa oSiiria ni oSilisia.
22 Masi awiixutti a Kristu a miloko sa oYudeya, khiyaakisuwela.
23 Awo yaamakela wiiwa vahimmwaka wira: “Mulopwana yoole aaphavela omaliha etiini ahu ni aanilupattha, vano onilaleya ihapari sooreera”.
24 Siiso, awo yaahipacerya onvuwiha Muluku mwaha wa miyo.
Inoota
^ Aahiiso, “okathi ola”. Nwehe Moolumo Ootthokiheriwa.
^ Ekereku, “kaanitepana olupattha”.
^ Ekereku, “erutthu ni ephome”.
^ Yoowo-tho oniihaniwa Pedru.
