aGalasia 4:1-31
4 Kiniphavela ohimya wira, akhala wira ole onrowa ohiyeriwa muhakhu nlelo mwaana, hata itthu sotheene siri ene sawawe, owo khonivirikana ni epottha ya vatthokoni,
2 maana aakhala atthu animukhapelela ni anikhapelela empa awe, mpakha nihiku paapa awe othanlale awe khalai ene.
3 Siiso, okathi naari ahu anamwane, nave-tho hiyo naari ipottha sa miyuupuwelo sa olumwenku ola ni mweettelo aya.
4 Masi waamalenle aya okathi waathanleliwe, Muluku aahimuruma Mwanawe, yoowo aayariwe ni muthiyana, ni eettela nlamulo,
5 wira olive esisapo yaarowa owoopola ale yeettela nlamulo. Siiso, Muluku anwerya onikhaliha anaawe.
6 Vano, okhala wira mwa anamwane, Muluku ooruma munepa woowaarya onvanhe awe Mwanawe, wira okhale vamurimani vahu. Nto munepa owo woowaarya onnikhuwela oriki: “Abba,* Tiithi!”
7 Tivo, nyuwo khamuhiyo-tho epottha, masi mwa mwaana a Muluku. Akhala wira mwa mwaana a Muluku, nave munimwaakhela etthu Muluku onrowa awe woohiyeryani.
8 Masi, okathi muhaamusuwela anyu Muluku, nyuwo mwaari ipottha sa amuluku eethiru.
9 Vano mmusuwenle anyu Muluku, niire so, munisuweliwa anyu ni Muluku, vanikhala sai otthikelaka-tho miruku seethiru ni sihinivareleya muteko, ni ophavelaka okhala ipottha sa itthu iyo?
10 Nyuwo munuupuwela wira aakhala mahiku, miyeeri, okathi ni iyaakha sirina efaita yuulupale ni munnitthapela seiyo.
11 Kinnoova wira kiimananinhe mahala ene wookhaliheryani.
12 Axinnaka, kinnooxonttelani wira mukhale ntoko miyo, okhala wira miyo kaari ntoko nyuwo. Khiivo etthu yootakhala mukiirenle anyu.
13 Musuweleke wira ekwaha yoopacerya koolalenryaakani ihapari sooreera, waari mwaha woowi kanwereiwa.
14 Nnaamwi eretta aka yooxankihaleni, nyuwo khimwaakithannye nnakhala okikhootta,* masi mwaahikaakhela ntoko nlaikha na Muluku, aahiiso ntoko Kristu Yesu.
15 Vano, otteeliwa murima waarina anyu ori vai? Miyo kinnikhalela onamoona wira khalai, mwanwerya osyoola maitho anyu wira mukivahe, vakhala wira eyo yaamukikhaliherya.
16 Niireke vano ka nwanani inyu, mwaha woowi kinooleelani ekeekhai?
17 Atthu awo anniimananiha vanceene wira akuxe mirima sanyu, masi khaniphavela mureerelo anyu. Awo aniphavela woovalaanyani ni miyo, wira mwaatthareke yaawo.
18 Masi, okathi wotheene, ti vooloka atthu ophavela okuxa murima anyu, aphavelaka mureerelo anyu, ohiya paahi kiri ene ni nyuwo.
19 Anaaka oophentiwa, kootthikela-tho woona owereya mwaha wa nyuwo. Owereya iwo, onlikana ni owereya onimphwanya muthiyana ohanle oyara. Nlelo kinimoonaka owereya mpakha nyuwo wooniherya omutthu wa Kristu.
20 Kaaniphavela kiri ene ni nyuwo niinaano-va, wira kilavule ni nyuwo moota mukina, okhala wira kooxanka mwaha wa nyuwo.
21 Mukileele! Niireke nyuwo muniphavela weettela Nlamulo, khamuniwiriyana ele Nlamulo nnihimya aya?
22 Mwa ntakiheryo, vaalempwa wira Abrahamu aahikhalana anamwane anli axilopwana. Mmosa aayareliwe ni muthiyana aari epottha, nave mukina aayareliwe ni muthiyana ootaphuwa.
23 Mwaana aayariwe ni muthiyana epottha, aayariwe ntoko aniyariwa aya anamwane akina, masi mwaana a muthiyana ootaphuwa, aayariwe mwaha wa natiri.
24 Itthu iya sinnitaphulela etthu ekina: Athiyana ala, anitaphulela mavarihano manli, nimosa naapakiwe omwaako Sinayi, nenno nnaakumiherya anamwane wira akhale ipottha. Nivarihano nlo ninlikana ni Agari.
25 Vano, Agari onithoonyerya mwaako Sinayi, yoowo ori wArabia, nave olelo-va, onimuthoonyerya Yerusalemu, maana owo nlelo epottha, vamosa ni anaawe.
26 Masi, Yerusalemu a wiirimu tootaphuwa, nave owo tori maama ahu.
27 Veekeekhai, vaalempwa wira: “Nyuwo muthiyana ohiniyara ni ohitonko omuyara mwaana, mutteeliweke murima! Nyuwo muthiyana ohinoone owereya wa oyara, mukhuweleke mutthapaka, okhala wira anamwane a muthiyana ohiniyara khareere, waavikana anamwane a muthiyana ootheliwa”.
28 Vano axinnaka, nyuwo mwa anamwane a natiri, ntoko aari awe Isaakhi.
29 Okathi ole, mwaana aayariwe ntoko aniyariwa aya anamwane akina, aanimulupattha ole aayariwe ni owerya wa munepa woowaarya. Siiso-tho, onniiraneya olelo-va.
30 Masi, soolempwa sinihimya exeeni? Sinihimya wira: “Mmoomole muthiyana epottha ni mwanawe mwaamulopwana, okhala wira mwaana mwaamulopwana a epottha khonikhala-khala okawanaka etthu ohiyeriwe awe mwaana mwaamulopwana a muthiyana ootaphuwa”.
31 Tivonto, axinnaka, hiyo khanihiyo anamwane a muthiyana epottha, masi na anamwane a muthiyana ootaphuwa.
Inoota
^ Nuulumo na eheeberi aahiiso aramaiko, nenlo nintaphulela “Khoo, Tiithi!”
^ Aahiiso, “okisenela”.
