aHeeberi 12:1-29
12 Tivonto, okhala wira noorukureriwa ni anamoona oowaatta ntoko meeku, nirihe itthu sotheene sinnilemela ni etampi enaakuva onihopha. Nave nitthimakeke nivilelaka mukwaha nithanleliwe ahu ni Muluku,
2 ninwehexexaka oratteene Murumeyi Muulupale ni Mulipa-onimaleliha waamini wahu, Yesu. Mwaha wa etthu yootteeliha murima aalipelela awe waakhela, aahivilela okhwa vamwirini wa nihaaxeryo,* nnakhala khuuliwe muru. Vano, owo ookilaathi moono woolopwana wa ehice ya Muluku.
3 Mweekeekhai, mmuupuweleke saana ole aavilenle moolumo ootakhala yaalavuliwa ni anatampi, yiirelaka wiikumiherya maxakha. Mwiira siiso, nyuwo khamunrowa wooceya, nnakhala otthikela ottuli.
4 Ekhotto eniwana anyu ni etampi eyo, nyuwo nlelo khanvilenle mpakha vaniphiyerya anyu okhwa.
5 Nave nyuwo mooliyala voomalela etthu Muluku ootumerenryaaweni ntoko anaawe, oriki: “Mwanaka, muhooneke wira ottaruxiwa ni Yehova khorina efaita, nnakhala muhooceyeke mwaattaruxiwaka nuuwo,
6 okhala wira Yehova onnimuttaruxa ole onimphenta awe. Tthiri, owo onninwaxula* ole onimwaakhela awe ntoko mwanawe”.
7 Nvileleke ohaawa, ni muthokoreryeke ntoko enamuna emosa enittaruxiwa* anyu. Muluku onnoothokoreryani ntoko anaawe. Mweekeekhai, mwaana xeeni ohinttaruxiwa ni paapa awe?
8 Masi akhala wira Muluku khonoottaruxani ntoko onaattaruxa awe akina, weeso nyuwo khamuhiyo anaawe, masi mwa anamwane a mutthu mukina.
9 Axipapihu aniyanre* yaaninttaruxa, nave hiyo naanaattittimiha. Nto, niireke khivanireerela otepa omwiiwelela Tiithi ihu, yoowo oneettiha okumi ahu ni munepa awe woowaarya, wira nikhale akumi?
10 Axipapihu yaaninttaruxa okathi vakhaani, attharaka ele yoona aya okhala etthu yooreerela. Masi Tiithi ihu a wiirimu, onninttaruxa okathi wotheene wira niphwanyeke mureerelo. Siiso, nnookhala atthu oowaarya ntoko owo.
11 Mweekeekhai, khuuvo onihakalala okathi onittaruxiwa awe, masi onnoona owereya.* Vano ale aniphavela wiixutta etthu, anniphwanya mureerelo. Nuumala-vo, awo anniwerya ovara miteko sa xariya ni okhala ni murettele.
12 Tivonto, mulipihe matata ahilimpe ni makutha atteettheiye,
13 nave mookololeke iphiro sinvira anyu, wira ole onituthunya ohitepe, masi okhale saana.
14 Mphaveleke okhalana murettele ni atthu otheene, ni okhalihiwa oowaarya, maana mutthu aahikhalihiwe oowaarya, khonrowa waaweha Apwiya.
15 Mwiikasoope wira mwaakhele oreera murima wuulupale wa Muluku, wira ohikhumelele mutathaari orina eveneno, oniwerya waakumiherya maxakha atthu. Mutathaari owo, onnaahapala* atthu anceene.
16 Nave mwiikasoope wira eriyari anyu ohikhale mutthu onirupihana voohiloka,* nnakhala ohinivaha efaita itthu sa Muluku, ntoko iirale awe Esawu, yoowo aalenve ehakhi aarina awe ya okhala mwaana oopacerya oyariwa, oturuka ni eparatho emosa ya yoolya.
17 Nyuwo moosuwela wira muhoolo mwaya, okathi aaphavenle awe oreelihiwa, owo aahikhoottiwa. Nnaamwi eerenrye vanceene, inlaka, omwiiriha paapa awe oturuka muupuwelo, owo eerenrye mahala ene.
18 Nave, nyuwo khimwaattamenle mwaako mwaawerya anyu ovara, yoowo waapatta mooro, ni waarina meeku ooriipa, ni epiphi yuulupale, ni epheyo yuulupale,
19 ni oruma wa nlope, ni moolumo yaawiriyaniwa akhumaka wiirimu. Nuumala wiiwa moolumo awo, atthu yaahimuxonttela Moise wira ehitthikele-tho wiiwa.
20 Tthiri, atthu ale yaanoova vanceene yooruma yaahimya wira: “Hata mwaamunama akwannya mwaako ola, ohaana ovonyiwa maluku”.
21 Nave-tho, etthu ele yoonale aya yaahitepa woopiha, mpakha Moise ohimya wira: “Kinnoova ni kinnittettemela”.
22 Masi nyuwo muhaattamela mwaako Siyoni ni epooma ya Muluku mukumi, eyo piiyo, Yerusalemu a wiirimu, ni malaikha ahinkontareya
23 athukumanne ene, ni muloko wa ale oopacerya oyariwa a Muluku, yaawo masina aya alempwale wiirimu. Nave moomwaattamela Muluku, yoowo ori Mphuki a atthu otheene, ni moowaattamela anaxariya, yaawo aneettihiwa ni munepa woowaarya ni akhalihiwe oomalela,
24 ni moomwaattamela Yesu, mulipa-oowaataaniha a nivarihano na niinaano. Nave-tho, nyuwo muhaattamela ephome Yesu onitathenle awe, yeeyo erina efaita yuulupale ovikana ephome ya Abeli.
25 Mwiikasoope wira muhikhootte onwiriyana ole onilavula. Vakhala wira atthu yaale yaakhontte onwiriyana ole aalopola vathi-va ni moolumo a Muluku khiyooponwe, nave-tho hiyo khaninrowa woopowa, nakhootta onwiriyana ole onilavula ori ene wiirimu!
26 Okathi ole, nsu na Muluku naahixekexa elapo ya vathi, masi vano owo ooleiherya wira: “Nave-tho, nkinrowa ottikinya elapo ya vathi paahi, masi kinoottikinya-tho erimu”.
27 Nuulumo noowi “nave-tho”, nnooniherya wira Muluku onrowa okumiha itthu sixekexiwe, seiyo sihipakiwe ni Muluku, wira sihale iye sihixekexiwe.
28 Tivonto, niimananiheke wira nihihiye ottottela mureerelo oreera murima wuulupale wa Muluku, weiwo onnikhaliherya omurumeela Muluku ntoko oniphavela awe, nimoovaka ni omuttittimiha.
29 Tthiri, Muluku ahu onlikana ni mooro onipwetexa voomalela.
Inoota
^ Nwehe Moolumo Ootthokiheriwa.
^ Aahiiso, “onnimuhukhumu”.
^ Aahiiso, “eniixuttihiwa”.
^ Ekereku, “axipaapa a erutthu ahu”.
^ Aahiiso, “ninnoona owereya”.
^ Aahiiso, “onnaananariha”.
^ Nwehe Moolumo Ootthokiheriwa ani: “Orupihana woohiloka”.
