aHeeberi 13:1-25
13 Muhihiye ophentana wanyu ntoko axinna.
2 Muhiliyale owaakhela aletto,* okhala wira mwaha wa yeeyo, akina yaahaakhela malaikha ehisuwelaka.
3 Nwuupuweleke ale atthukweliwe mukhatteya,* mukhalaka ntoko mutthukweliwe hoothe. Nave, nwuupuweleke ale anihaaxiwa, okhala wira nyuwo-tho mwa apinaatamu.*
4 Ekasamento ettittimihiweke ni atthu otheene, nave ekasamento eyo ehinanarihiweke, okhala wira Muluku onimwaaphukela ale anirupihana voohiloka* ni anamararuwa.
5 Muhiphenteke musurukhu, masi muhakalaleke ni itthu murina anyu, maana Muluku onihimya wira: “Miyo nkinikhala-khala koohiyakani, nave nkinikhala-khala koonyanyalakani”.
6 Tivo, nihimyeke ni nroromelo wira: “Yehova tonikikhaliherya. Miyo nkinrowa woova etthu. Exeeni mutthu oniwerya awe okiiriha?”
7 Nwuupuweleke ale anoohoolelani, yaawo anoohimeeryani nuulumo na Muluku. Nto mwaweha itthu sinikhumelela mwaha wa mweettelo aya, mutakiheke waamini waya.
8 Yesu Kristu ti yoole a nsana, a olelo, ni a mahiku otheene.
9 Muhihapuxiwe ni soowiixuttiha soovirikana ni sihinisuweliwa. Muroromeleke oreera murima wuulupale wa Muluku, ohiya ororomela yoolya.* Ale antepa ovaha efaita yoolya, khanittottela mureerelo yoolya eyo.
10 Ale anivara muteko wa Muluku muheemani, khaneemereriwa* olya itthu siri valtaari orina ahu.
11 Mirutthu sa inama saavahiwa ni atthu awo, saapahiwa ota wa muttetthe waakhala atthu, masi ephome aya yaaniroihiwa nipuro noowaarya ni namukuttho muulupale, wira sileveleliwe itampi sa atthu.
12 Siiso-tho, Yesu aahihaawa ota wa epooma wira aareerihe atthu ni ephome awe.
13 Vano, nrowe opuro ori awe, ota wa muttetthe, wira ni hiyo-tho navilele wuuliwa muru, ntoko owo ovilenle awe,
14 okhala wira hiyo khanrina epooma enikhala mahiku otheene, masi ninniphavela ni murima wotheene epooma enrowa otekiwa muhoolo.
15 Mwaha wa omwaamini Yesu, nihaana omuttottopela Muluku okathi wotheene. Eyo enlikana ni onvaha mukuttho Muluku. Nirumeeleke iyano sahu wira nilaleyeke nsina nawe eriyari ya atthu anceene.
16 Nave-tho, muhiliyale owiirela sooreera atthu akina, ni okawana naawo itthu sirina anyu. Itthu iyo siri ntoko mikuttho, ni sinnimuhakalaliha vanceene Muluku.
17 Nwiiweleleke ale anoohoolelani ni mwiireke siiso muhinlaseyaka, okhala wira awo annookhapelelani, nave animwaakhula ohoolo wa Muluku. Siiso, awo anoovara muteko aya atteeliwe ene murima, ohiya ariipiwe ene murima, wira eyo ehookumiheryeni mixankiho.
18 Muhihiye onivekelela, maana ninniroromela wira nookhalana murima* wooloka, nave ninniphavela okhala oororomeleya mwa itthu sotheene.
19 Masi kinnitepa wootumereryani wira nvekeleke wira kihokoloxeriwe wa nyuwo voohipisa.
20 Muluku a murettele, oomuhihimuxa Pwiya Yesu mookhwaani. Nave, ephome ya nivarihano na mahiku otheene eri ni Yesu. Owo ti makampusi muulupale a ipwittipwitthi. Vano, Muluku a murettele,
21 oovaheeni itthu sotheene sooreera wira mpakeke etthu eniphavela awe. Omurumeelaka Yesu Kristu, owo onniniiriha opaka itthu sinimusivela. Ovuwihiwe Muluku mahiku otheene ni voohimala. Amen.
22 Kinnootumereryani, axinnaka, wira nvahe ephoole moolumo ala oolipiha, okhala wira epaphelo koolepenlyaakani ti yookhuveya.
23 Kiniphavela woosuwelihani wira munnihu Timootheyo ootaphuliwa. Aphiya niinaano, nnimoorwa hoothe nooxukuryeni.
24 Mwaavahe makhomaso aka ale anoohoolelani ni arumeyi otheene oororomeleya.* Axinna ari wItaalia nno, annookhomasani.
25 Oreera murima wuulupale wa Muluku okhale ni nyuwo otheene.
Inoota
^ Aahiiso, “waareerela murima ale muhinaasuwela anyu”.
^ Ekereku, “otthukiwa”.
^ Aahiiso, woonasa wene: “okhalaka ntoko munihaawa naawo”.
^ Nwehe Moolumo Ootthokiheriwa ani: “Orupihana woohiloka”.
^ Eyo piiyo, malamulo a yoolya.
^ Ekereku, “kharina owerya wa”.
^ Nwehe Moolumo Ootthokiheriwa.
^ Ekereku, “oowaarya”.
