aHeeberi 7:1-28
7 Melikhisedeki aari mwene a oSalemi, ni namukuttho a Muluku Muulupalexa. Owo aahikumana ni Abrahamu, okathi Abrahamu owo aatthika awe mukwaha aaronwe awe owiivakasa mamwene. Nto Melikhisedeki aahimureeliha Abrahamu,
2 nave Abrahamu aahinvaha* epantta ya namuloko ya itthu sotheene. Opacerya wene, nsina nawe nintaphulela “mwene a xariya”, nave-tho mwene a oSalemi, nintaphulela “mwene a murettele”.
3 Owo khorina paapa awe, hata maama awe, nnakhala khalempwale masina aamuhavinre awe, nave khosuweliwe okathi oyariwe awe nnakhala okhwiiye awe. Owo oolikanyihiwa ni Mwaana a Muluku, tivonto ori awe namukuttho mahiku otheene.
4 Tthiri, mulopwana owo aari mukhulupale! Tivonto, muhavinre ahu Abrahamu anvanhe awe epantta ya namuloko ya itthu soolokexa aakunxe awe okhottoni.
5 Mweekeekhai, nitthariwaka Nlamulo, anamwane a Levi, yaawo anirumeela ntoko anamukuttho, aarummwa waakhela epantta ya namuloko ya itthu anivahiwa aya ni atthu, eyo piiyo, axinnaya, nnaamwi ari ene osuulu wa Abrahamu.
6 Mulopwana ola ahaakhanle a nloko na Levi, aahaakhela epantta ya namuloko ya itthu sa Abrahamu, nave aahimureeliha ole aamaneliwe natiri.
7 Atthu otheene anneemererya wira mutthu ohirina okhulupale, onnireelihiwa ni ole orina okhulupale.
8 Nto alevi yaahaakhela epantta ya namuloko, nave annookhwa. Masi Soolempwa sinooniherya wira mulopwana owo mukina onaakhela epantta ya namuloko, onnikhala mukumi.
9 Nave pooti ohimmwa wira, hata Levi, yoowo onaakhela epantta ya namuloko, ooliva epantta ya namuloko, okathi Abrahamu aalinve awe,
10 okhala wira Levi iira nlelo ohikhanle osuulu wa Abrahamu, okathi Melikhisedeki aakumanne awe ni Abrahamu owo.
11 Onamukuttho wa nloko na Levi wiirela mpantta Nlamulo na Moise, nenno naavahiwe aisarayeli. Nto, akhala wira anamukuttho a nloko na Levi yanwerya owiiriha atthu okhala oomalela, niireke nlelo ninnimphavela namukuttho ntoko Melikhisedeki? Niireke khivaniphiyerya okhalana namukuttho ntoko Aroni?
12 Nto, waaturukiwaka muteko wa namukuttho, vannireerela-tho oturuka Nlamulo.
13 Tthiri, mulopwana onihimmwa mwaha wa itthu iya, ta nihimo nikina, nenlo nihitonko orumeela valtaari.
14 Mweekeekhai, vannooneya saana wira Pwiya ahu ta nihimo na Yuda, masi Moise khotonko ohimya wira anamukuttho yaarowa okhuma nihimo nenlo.
15 Eyo ennooneya oratteene okathi onikhumelela awe namukuttho mukina ori ntoko Melikhisedeki.
16 Owo onnirumeela ntoko namukuttho, ohiya mwaha wa nihimo onikhuma awe ntoko Nlamulo naahimya aya, masi mwaha wa owerya oninvaha okumi ohinihononeya.
17 Tivonto, yoolepa emosa enihimya wira: “Nyuwo mwa namukuttho a mahiku otheene, ntoko Melikhisedeki”.
18 Tivo, Muluku oomaliha yooruma ya khalai, okhala wira khelimpe ni khenwerya onikhaliherya.
19 Khiivo etthu Nlamulo nikhalinhe aya yoomalela, masi etthu Muluku okumihenrye awe ti yoolokexa ni tenlipelela ahu, yeeyo eniiriha itthu sotheene okhala soomalela. Nave, mwaha wa yeeyo, hiyo ninnimwaattamela Muluku.
20 Okhala wira Muluku aahilapha okathi aamukhalinhe awe Yesu namukuttho
21 (tthiri aakhala atthu ari anamukuttho nnaamwi ohikhanle mutthu olamphe, masi ola ookhalihiwa namukuttho nuumala olapheliwa ni Muluku, yoowo aahimmye wira: “Miyo Yehova koolapha, nave nkinrowa oturuka muupuwelo aka,* ‘Nyuwo mwa namukuttho a mahiku otheene’”).
22 Tivonto, Yesu ookhala nlipiheryo* na nivarihano nooreerexa.
23 Nave mwaha wa okhwa, anamukuttho anceene annihiya ovara muteko aya, tivo atthu akina anaaranttela aya.
24 Masi okhala wira Yesu onnikhala mukumi mahiku otheene, khuuvo onimuranttela.
25 Owo onniwerya owoopola voomalela otheene ale aninvekela Muluku mwa nsina nawe, mwaha woowi onnikhala mukumi mahiku otheene, wira onvekeleke Muluku wira aakhaliherye.
26 Tthiri vannikhalela hiyo okhalana namukuttho muulupale ntoko owo, yoowo ori oororomeleya, oohittheka, ohirina etthu yoonanara, ovalaanyiwe ni anatampi, khuvuwihiwa osulu ovikana erimu.
27 Owo khonlikana ni anamukuttho aalupale akina, maana khonvekeliwa ovaha mikuttho khula nihiku, opacerya wene mwaha wa itampi sawe, nuumala-vo mwaha wa itampi sa atthu akina. Owo oovaha mukuttho ekwaha emosa paahi, okathi aivaherenrye awe mmansawe.
28 Atthu anithanliwa ni Nlamulo wira akhale anamukuttho aalupale aakhalana etampi, masi natiri aamaniwe nuumala Nlamulo, aahimuthanla Mwaana, yoowo okhalihiwe oomalela mahiku otheene.
