aHeeberi 8:1-13
8 Vano, etthu yuulupale ya mwaha ninlavula ahu, tiila: Hiyo nookhalana namukuttho muulupale ntoko owo, nave ookilaathi moono woolopwana wa Muluku wiirimu.
2 Owo murumeyi a nipuro noowaarya ni a eheema yeekeekhai, yeeyo yeemexiwe ni Yehova, ohiya ni mutthu.
3 Khula namukuttho muulupale, onithanliwa wira ovaheke itthu ni ovaheke mikuttho. Tivonto, vaanireerela namukuttho owo muulupale okhalana etthu yoovaha.
4 Vaakhanle wira owo aari mulaponi, khaarowa okhala namukuttho, okhala wira aakhala alopwana anivaha itthu attharaka Nlamulo.
5 Muteko alopwana ala anivara aya, onithoonyerya ni onooniherya itthu sa wiirimu paahi. Eyo yaahooniheriwa okathi Muluku aamuhimenrye awe Moise moota aarowa awe oteka eheema. Muluku aahimmye so: “Mukhalane ephoole wira mpake itthu sotheene muttharaka ntakiheryo kiwoonihenryaakani okathi mwaari anyu omwaako”.
6 Masi Yesu ohaakhela muteko wootepa oreera, okhala wira owo-tho mulipa oowaataaniha a nivarihano nooreerexa. Nivarihano nlo, ninnitthara nlamulo ni noolipihiwa ni anatiri ootepa oreera.
7 Vaakhanle wira nivarihano noopacerya naari noomalela,* khinaarantteliwa ni nivarihano na nenli.
8 Tthiri owo onnoona wira atthu khamalenle, tivo onihimya awe wira: “Yehova onihimya so: ‘Moone! Anoophiya mahiku kinrowa aka opaka nivarihano na niinaano ni atthu a Isarayeli ni atthu a Yuda’.
9 Yehova onnihimya-tho wira: ‘Nivarihano nlo khaninrowa olikana ni nivarihano kaapanke aka ni amuhavinre aya, nihiku kaakuminhe aka ni ntata elapo ya wExiitu, okhala wira awo yaahihiya nivarihano naka. Siiso, miyo kaahihiya waakhapelela’.
10 “Yehova onihimya wira: ‘Nla ti nivarihano kinrowa aka opaka ni atthu a Isarayeli yavira mahiku awo. Kinoohela malamulo aka mmuupuweloni mwaya, ni kinoolepa vamurimani vaya. Miyo kinookhala Muluku aya, nave awo anrowa okhala atthu aka.
11 “‘Khuuvo a yaawo onrowa omwiixuttiha-tho mutthu a elapo awe ni munnawe, oriki: “Mmusuweleke Yehova!”, okhala wira otheene aya anookisuwela, okhuma mwaamukhaani mpakha muulupale.
12 Kinimwaamorela ikharari mwaha wa miteko saya sootakhala, nave nkinrowa-tho wuupuwela itampi saya’”.
13 Mwaha woohimya wira “nivarihano na niinaano”, owo oomaliha nivarihano na khalai. Vano, etthu emalihiwe ni yuuluvanle, ehanle vakhaani orimeela.
Inoota
^ Ekereku, “nooloka”.
