aKolosi 1:1-29
1 Miyo Paulo, kithanliwe ni Muluku okhala murummwa a Kristu Yesu, ni Timootheyo munnihu,
2 kinnaalepela ale oororomeleya* ni axinna oororomeleya mwa Kristu, anikhala oKolosi:
Oreera murima wuulupale wa Muluku Tiithi ihu ni murettele okhale ni nyuwo.
3 Okathi wotheene ninnimuxukhuru Muluku, Tiithi awe Pwiya ahu Yesu Kristu, noovekelelakani.
4 Hiyo nihiiwa ohimmwaka omwaamini wanyu Kristu Yesu ni waaphenta wanyu otheene ale oororomeleya,*
5 mwaha wa itthu sooreera sinlipelela anyu, musukeriwe anyu wiirimu. Moosuwelihiwa khalai ene nlipelelo nla ni moolumo eekeekhai a ihapari sooreera
6 mulaleeriwe anyu. Ntoko ihapari sooreera sinikumiherya aya mihokorokho ni wuncerereya olumwenku wotheene, siiso-tho, vanniireya eriyari anyu, okhuma nihiku mpacenrye anyu wiiwa ni osuwela saana oreera murima wuulupale weekeekhai wa Muluku.
7 Itthu iya mwiixuttihiwe ni Epaafara, namuteko mukhwiihu oophentiwa, yoowo ori murumeyi oororomeleya a Kristu nipuro nahu.
8 Yoowo-tho tonisuwelihale ophenta wanyu, onikumiheriwa ni munepa wa Muluku.
9 Tivonto, okhuma nihiku niiwale ahu ophenta wanyu iwo, khanihiyale woovekelelani. Nave ninninvekela Muluku wira oovaheeni voomalela osuwela oratteene ele oniphavela awe, ni wira oovaheeni miruku ni wiiwexexa itthu, mukhaliheriwaka ni munepa wa Muluku,
10 wira nweryeke weetta ntoko simphwanela aya atthu a Yehova, mmusivelihaka mwa itthu sotheene ni nweryeke okumiherya mihokorokho, nvaraka miteko sooreera sa khula enamuna, ni wuncererya omusuwela wanyu saana Muluku.
11 Mulipihiweke voomalela ni owerya wawe woovuwa, wira nweryeke ovilela, mpixaka murima ni otteeliwa murima,
12 mmuxukhurelaka Tiithi, yoowo owiirihaleni ophwanela okaweliwa itthu sooreera sivahiwe aya ale oororomeleya,* ari ntoko muthuko.
13 Owo oonaakiherya owerya wa epiphi, khunithaamiherya moomweneni mwa Mwanawe onimphentexa awe.
14 Mwaha wa onoopola,* nooleveleliwa itampi sahu.
15 Mwaana owo, ti eruku ya Muluku ohinooneya, ni topacenrye opattuxiwa mwa itthu sotheene;
16 mwa yoowo, soopattuxiwa itthu sotheene wiirimu ni vathi: itthu sinooneya ni iye sihinooneya, omwene ni owerya ni olamulelo ni okhulupale. Itthu sotheene sikina soopattuxiwa mwa yoowo, ni sipattuxeriwe yoowo.
17 Owo ookhala itthu sotheene sikina sihinatthi opattuxiwa, ni sotheene sikina sipattuxiwe mwa yoowo,
18 nave owo ti muru wa erutthu, ori muloko. Yoowo ti ephattuwelo ya okumi ni mwaana oopacerya. Topacenrye ohihimuwa mwa alipa-ookhwa, tivo vakhanle awe oopacerya mwa itthu sotheene;
19 okhala wira Muluku vaahimusivela wira itthu sotheene sikhale mwa Yesu,
20 siiso-tho, mwa yoowo, Muluku aahisiveliwa waataana-tho ni itthu sotheene sikina sa vathi ni sa wiirimu, okhalihaka murettele ni ephome ya Yesu, emwarexiwe vamwirini wa nihaaxeryo.*
21 Khalai, nyuwo-tho mwaahirakamelana ni Muluku ni mwaari awanani awe, mwaha woowi muupuwela itthu sootakhala.
22 Nto vano, owo ohaataana-tho ni nyuwo mwaha wa okhwa wa mwanawe, wira mukhale oowaarya, oohittheka ni muhirina mulattu vamaithoni vawe.
23 Masi, muhaana olipiherya waamini, mweemenle ene voolipa, muhaanyiheryaka etthu, muhaakhiwaka nlipelelo nvahiwe anyu okathi mwaiwale anyu ihapari sooreera, seiyo yaalaleeriwe aya atthu otheene vathi-va. Nto, miyo Paulo, kookhala namalaleya a ihapari iyo sooreera.
24 Vano kinnitteeliwa murima hata kihaawaka mwaha wa nyuwo. Kinoona wira ohaawa waka ntoko mpantta wa erutthu ya Kristu, ohaana ovikaniha. Ohaawa nno, onookhaliherya erutthu ya Kristu, eyo piiyo, muloko.
25 Miyo kookhala murumeyi a muloko ola, moovarihana ni muteko ovahiwe aka ni Muluku, wa waalaleerya atthu voomalela masu a Muluku, wira mphwanye mureerelo.
26 Eyo, esiiri ya Muluku, yeeyo yahaasuweliwe khalai,* hata ni atthu yaakhala okathi ole. Masi vano, esiiri eyo yoosuwelihiwa ale oororomeleya.*
27 Nto, Muluku oosiveliwa waasuweliha ale oororomeleya* eriyari ya maloko, mihakhu suulupale sa esiiri awe. Esiiri eyo tiila: waataana wanyu ni Kristu, ni nlipelelo na wiirela mpantta ovuwa wawe.
28 Owo tuule nimmulaleya ahu, nimulakiheryaka khula mutthu, nimwiixuttihaka khula mutthu ni miruku sotheene, wira khula mutthu nimukhalihe oomalela moowiiraana ni Kristu.
29 Tivonto kinvaraka muteko mwa nthiti, kiilipihaka ni owerya onikivaha awe, weiwo onikeettiha.
Inoota
^ Ekereku, “ale oowaarya”.
^ Ekereku, “ale oowaarya”.
^ Ekereku, “ale oowaarya”.
^ Nwehe Moolumo Ootthokiheriwa ani: “Yoowoopola”.
^ Nwehe Moolumo Ootthokiheriwa.
^ Aahiiso, “yahaasuweliwe ni makhalelo a itthu a khalai”. Nwehe Moolumo Ootthokiheriwa ani: “Olumwenku”.
^ Ekereku, “ale oowaarya”.
^ Ekereku, “ale oowaarya”.
