aKolosi 4:1-18
4 Nyuwo munivareliwa muteko, muthokoreryeke saana ni mwa xariya ipottha sanyu, musuwelaka wira nyuwo-tho mookhalana Pwiya wiirimu.
2 Mukhaleleke nthiti ovekela, nto, okathi munipaka anyu eyo, mukhaleke oowehaweha ni ooxukhurela.
3 Munivekeleleke wira Muluku onivahe eparakha yoolaleya masu ni olavula esiiri ya Muluku enimuhimya Kristu, yeeyo ekiirihale otthukweliwa mukhatteya-mu,
4 nave wira kiwerye olaleya oratteene ntoko vanreerela aya.
5 Mweetteke ni ankhili ohoolo wa ale ahinaamini, ni murumeeleke saana okathi anyu.*
6 Okathi wotheene, moolumo anyu ekhaleke ooreera, ooweeleeliwa* ni maakha, wira musuweleke moota woomwaakhula khula mutthu.
7 Tiikhiko, munnaka oophentiwa, murumeyi oororomeleya ni namuteko mukhwiihu mwa Apwiya, onimooleelani ihaali saka sotheene.
8 Miyo koomuruma orwa iwo wira ooleeleni ihaali sahu, ni wira olipihe mirima sanyu.
9 Owo onirwa ni Oneesimo, munnaka oophentiwa ni oororomeleya, yoowo aakhala ni nyuwo. Awo animooleelani itthu sotheene siniiraneya nno.
10 Aristarko, yoowo otthukwelaniwa aka, onnookhomasani, vamosa ni Marko, mmusi awe Baarnaba (Marko owo tuule oleeliwa anyu wira arwa wooxukuryani, mmwaakhele saana);
11 nave, Yesu yoowo oniihaniwa Naxariya, onnookhomasani. Axinna ala araru anivarana aka muteko wa Omwene wa Muluku, toowinnuwihiwa. Awo annikilipiha vanceene.
12 Epaafara, murumeyi a Kristu Yesu, yoowo aakhala ni nyuwo, onnookhomasani. Okathi wotheene, onnoovekelelani ni nthiti, wira wanikisa waya, mulipe moomalela ni mukhale oolikana ene weettela sotheene Muluku oniphavela awe.
13 Kinnimukhalela onamoona Epaafara owo, wira onnoovarelani muteko ni nthiti nyuwo, ni ale ari oLawodiseya ni oHiyeraapoli.
14 Luka, munnihu oophentiwa, yoowo ori meetiku, onnookhomasani. Nave-tho, Dema onnookhomasani.
15 Mwaakhomase axinna a oLawodiseya, ni mmukhomase Ninfa vamosa ni muloko ori vate vawe.
16 Mwamaliha osoma epaphelo ela, muroihe muloko wa oLawodiseya wira yasommwe-tho, nave nyuwo musome epaphelo enikhuma oLawodiseya.
17 Mmuleele Arikipo wira: “Muthokoreryeke muteko ovahiwa anyu ni Apwiya, wira nvareke oratteene”.
18 Ti miyo Paulo kinookhomasani. Kinlepa ni ntata naka. Muhiliyaleke wira kirootthukiwa. Oreera murima wuulupale wa Muluku okhaleke ni nyuwo.
