aRoma 11:1-36
11 Nto kinnikoha-tho wira: Niireke Muluku ohaakhootta atthu awe? Nnaari, khahiyo siiso, okhala wira miyo-tho ka mwisarayeli, osuulu* wa Abrahamu, a nihimo na Beniyamini.
2 Muluku khaakhontte atthu awe, yaawo aapacenrye awe waathanla. Niireke khamunisuwela ele yoolepa enihimya aya emuhimyaka Eliya, yoowo anlaseya ohoolo wa Muluku, mwaha wa aisarayeli?
3 Eliya aahihimya wira: “Yehova, awo aawiiva maprofeta anyu, ahaapwexakasa altaari anyu, nave kihanle mekhaka. Vano, awo aniphavela okiiva”.
4 Nto Muluku aamwaakhunle sai? Aamwaakhunle so: “Nlelo kookhalana atthu 7.000 akumi, yaawo nlelo ahuuramme wira amukokhorele Bayaali”.
5 Eyo enniiraneya-tho okathi ola. Yookhala ekrupu yaamukhaani ya atthu athanliwe* mwaha wa oreera murima wuulupale wa Muluku.
6 Eyo enitaphulela wira owo ohaathanla mwaha wa oreera wawe murima wuulupale, ohiya mwaha wa miteko saya. Vaakhanle wira aapaka etthu wira athanliwe, weeso khiwaarowa okhala mwaha wa oreera murima wuulupale wa Muluku.
7 Nto nihimye exeeni? Atthu a Isarayeli khiyaaphwannye etthu yaaphavela aya. Atthu vakhaani yaathanliwe ti yaaphwannye etthu eyo. Masi akina yaahikhootta.*
8 Ti siiso Soolempwa sinihimya aya wira: “Muluku oowiiriha orupa vanceene, wira ahooneke ni ahiiweke, mpakha olelo-va”.
9 Nave Davidi oohimya wira: “Ifesta saya* sikhale muraakho ni ntthavi wira saamoroxe ni ahukhummwe.
10 Maitho aya eriipihiwe wira ehooneke, nave muthana aya okhurupuwe mahiku otheene”.
11 Vano, kinikoha wira: Niireke okathi ayuda yaakwattuliwe aya, yaahimora ahivenya-tho? Nnaari! Masi, mwaha wa omora waya, ale ahikhanle ayuda taphwannye aya woopowa, wira ayuda yaakhalele nrima.
12 Vano, vakhala wira ohiiwelela waya nlamulo onnikumiherya mureerelo moolumwenkuni, nave ovukuwa mwaattelo aya onnaakumiherya mureerelo ale ahikhanle ayuda, nto vanootepa okumiherya mireerelo vakhala wira anoomalela!
13 Nto kinilavula ni nyuwo atthu ahikhanle ayuda. Okhala wira ka murummwa a atthu ahikhanle ayuda, kinnivaha efaita yuulupale* muteko kininvarela aka Muluku.
14 Nave, kinnilipelela wira vaweryaneya, kinoowiiriha atthu a nloko naka okhalela nrima ele mwaakhenle anyu, ni kinnilipelela owoopola akina a yaawo.
15 Okhoottiwa waya ohaakhaliherya atthu akina a moolumwenkuni okhalana waataana ni Muluku. Akhala wira Muluku onniwaakhela-tho awo,* onrowa okhalaka ntoko onaattikiherya okumi, aakumihaka mookhwaani.
16 Akhala wira epantte yoopacerya ya ephaawu enivahiwa ntoko milipu ti yoowaarya, weeso ephaawu yotheene ti yoowaarya. Nave-tho, akhala wira mutathaari wa mwiri ti woowaarya, weeso iritta saya ti soowaarya.
17 Vano, iritta sikina saahiikitthiwa vamwirini. Nuumala-vo, mwaahilupanyiwa ni iritta sikina sa mwiri wa olivera wa vate, nnaamwi nyuwo mwaari eritta ya mwiri wa olivera wa mutakhwani. Siiso, nyuwo munnittottela mureerelo mitathaari saya.
18 Tivo, muhithanyeke iritta iye Muluku iikintthe awe, okhala wira nyuwo khamunlipiha mitathaari sa mwiri, masi mitathaari ti sinoolipihani.
19 Akina a nyuwo anrowa ohimyaka wira: “Iritta sikina sihiikitthiwa wira miyo kilupanyiwe nipuro naya”.
20 Eyo ekeekhai! Awo ahiikitthiwa mwaha woowi khiyaarina waamini, masi nyuwo mookhalihiwa nipuro naya, mwaha wa waamini wanyu. Tivo, muhiittottopeke, masi mooveke.
21 Vakhala wira Muluku ohiikittha iritta sa mwiri wa olivera wa vate, nave-tho nyuwo munimwiikitthiwa.
22 Nyuwo munnoona wira Muluku tooreera murima ni onninanariwa. Owo onninanariwa naale amonre mwaha wa ohaamini. Masi mwaapakaka itthu siniphwanela oreereliwa murima ni Muluku, owo onimooreerelani murima. Mwaahiire siiso, nyuwo-tho munimwiikitthiwa.
23 Nto ayuda yapacerya waamini, anoolupanyeriwa-tho vamwirini, okhala wira Muluku onniwerya otthikela waalupanyerya.
24 Nyuwo muhiikitthiwa vamwirini wa olivera a mutakhwani, mulupanyeriwa mwiri wa vate. Eyo khahiyo etthu ya ephattu. Nto vanrowa otepa okhweya olupanyerya iritta sa mwiri wa olivera wa vate, nipuro saikitthiwe aya!
25 Axinnaka, kiniphavela wira musuwele esiiri Muluku ovinthe awe, wira muhiixooneke okhala atthu ootepa osuwela. Esiiri ene Muluku ovinthe awe tiila: atthu akina a Isarayeli ahuumiha mirima saya. Eyo enimwiiraneya mpakha orwa otheene athanliwe, yaawo ahikhanle ayuda.
26 Nto, ti siiso aisarayeli otheene anrowa aya woopowa. Soolempwa sinihimya wira: “Moopoli onrowa okhuma oSiyoni, wira omalihe otakhala wotheene wa osuulu wa Yakobe.*
27 Nla ti nivarihano kinrowa aka opaka naawo, okathi kinrowa aka okumiha itampi saya”.
28 Ekeekhai wira ayuda akina, anniwanana ihapari sooreera, nto eyo ennoophwanyihani mureerelo. Masi awo athanliwe ni Muluku, nave owo onnaaphenta mwaha wa amuhavinre aya.
29 Muluku khonrowa othanana mwaha wa itthu ovanhe awe, nave khonrowa othanana mwaha wa ale owiihanne awe.
30 Khalai, nyuwo khimwaamwiiwelela Muluku, masi vano owo onnoomorelani ikharari mwaha wa ohiiwelela wa ayuda.
31 Vano, ayuda awo khaniiwelela, nto Muluku onnoomorelani ikharari. Masi ayuda anoomoreliwa ikharari, ntoko nyuwo mmoreliwe anyu ikharari.
32 Tthiri, Muluku onniwoona ntoko alipa-ootthukiwa mwaha wa ohiiwelela waya. Siiso, owo onimwaamorela ikharari otheene aya.
33 Tthiri, mareeliho, ni ankhili, ni osuwela wa Muluku, ti sootepa waatta. Khuuvo oniwerya osuwelexa ophukela wawe, nave khuuvo oniwerya osuwela iphiro sawe!
34 “Ti pani osuwenle muupuwelo wa Yehova, aahiiso ti pani oninvaha miruku?”
35 Aahiiso, “niireke ookhala mutthu opacenrye onvaha etthu Muluku, wira Muluku owo omuttikiherye?”
36 Nnaari, okhala wira owo oopaka itthu sotheene, ni onnikhaliha itthu sotheene, ni itthu sotheene sinimukhalela yoowo. Owo onnireerela ovuwihiwa mahiku otheene. Amen.
Inoota
^ Ekereku, “mmiso”.
^ Aahiiso, “atthu athanliwe eriyari ya ayuda”.
^ Aahiiso, “khiyaaphavenle wiiwa”.
^ Ekereku, “meesa aya”.
^ Aahiiso, “kinnivuwiha”.
^ Aahiiso, “ayuda akina”.
^ Eyo piiyo, “Isarayeli”.
