aRoma 14:1-23
14 Mmwaakheleke ole ohilimpe waamini wawe, masi muhaaphukeleke ale arina muupuwelo onivirikana ni wawinyu.
2 Mutthu orina waamini woolipa onnoolya itthu sotheene, masi ole orina waamini woohilipa, onilya makukhu paahi.
3 Ole onilya itthu sotheene, ohimuthanyeke ole ohinilya itthu sotheene. Nave ole ohinilya itthu sotheene ohimphukeleke ole onilya itthu sotheene, okhala wira Muluku oomwaakhela mutthu owo.
4 Nyuwo mwa pani wira mumphukeleke murumeyi a mutthu mukina? Pwiya awe tonithanla akhala wira etthu enipaka awe murumeyi owo ti yooreera aahiiso ti yootakhala. Okhaliheriwaka ni Yehova, owo onookhalana mukhalelo wooloka vamaithoni va Muluku.
5 Mutthu mmosa onnithokorerya nihiku nimosa okhala noottittimiheya ovikana mahiku makina, masi mutthu mukina onnithokorerya mahiku otheene voolikana. Khula mutthu aikupaliheke vanceene mmuupuweloni mwawe.
6 Ole onithokorerya nihiku nimosa okhala nootepa ottittimiheya, onipaka eyo wira omuttittimihe Yehova. Ole onilya itthu sotheene, onipaka eyo wira omuttittimihe Yehova. Nave, ole ohinilya itthu sotheene, onninvuwiha-tho Yehova, ni onnimuxukhuru Muluku.
7 Khuuvo mutthu onikhala, aikhalelaka mwaneene, nave khuuvo mutthu onikhwa, aikhwelaka mwaneene.
8 Mweekeekhai, naakhalaka akumi, nimmukhalela Yehova. Nave, naakhwaaka, nimmukhwela Yehova. Tivo, hata nikhalaka akumi wala nikhwaaka, hiyo na atthu a Yehova.
9 Tthiri, ti nthowa naya Kristu aakhwiiye awe ni aahihimuxiwe awe, wira okhale Pwiya a alipa-ookhwa ni Pwiya a atthu akumi.
10 Masi xeeni munimphukela anyu munninyu? Aahiiso, xeeni-tho munimuthanya anyu munninyu? Otheene ahu ninrowa ophukeliwa ni Muluku.
11 Soolempwa sinihimya so: “Yehova onihimya wira: ‘Siisaale kinikhala aka, mweekeekhai atthu otheene anookokhora ohoolo waka, nave apinaatamu otheene anookittittimiha ahimyaka wira miyo ka Muluku’”.
12 Tivo, khula mmosa a hiyo onrowa waakhula ohoolo wa Muluku.
13 Siiso, muhiye ophukelana. Ohiya-vo, mulakele ohipaka etthu yaarowa ovukula waamini wa munna aahiiso ommoroxa.*
14 Ntoko mwiixutti a Pwiya Yesu, kinnisuwela wira khiivo etthu mutthu onilya awe eri yoohiloka mekhaya-ru. Masi akhala wira mutthu onnithokorerya yoolya eyo okhala yoohiloka, onnoona wira khivanireerela olya.
15 Vakhala wira munninyu onniriipiwa murima mwaha wa yoolya munilya anyu, nyuwo khamunooniherya-tho ophenta. Mwaha wa yoolya, muhimpwetexe munninyu, yoowo Kristu omukhwenle awe.
16 Tivo, muhipakeke itthu munikupali anyu wira ti sooloka, masi saarowa owiiriha atthu woolavulani voohiloka.
17 Omwene wa Muluku khontaphulela olya ni owurya, masi ontaphulela okhalana exariya, murettele ni otteeliwa murima, weiwo onikumiheriwa ni munepa woowaarya.
18 Ole ori murumeyi a Kristu ni orina mikhalelo iya, onnimusiveliha Muluku ni onnittittimihiwa ni atthu.
19 Tivo, niphaveleke itthu sinikumiherya murettele ni itthu sinikhaliherya olipihana mukina ni mukhwaawe.
20 Muhiye ohonona muteko wa Muluku mwaha wa yoolya paahi. Mweekeekhai, soolya sotheene sinneemereriwa olya, masi khivanireerela olya etthu enrowa ovukula waamini wa mutthu mukina.
21 Fataari ohikhuura enama aahiiso ohiwurya eviinyu, nnakhala opaka etthu enrowa ovukula waamini wa munninyu.
22 Etthu enikupali anyu mwaha wa itthu iya, ti yawinyu nyuwo mmansinyu ni Muluku. Nyuwo munoohakalala, mwaahiivaheke nthowa mwaha wa itthu munikupali anyu okhala sooreera.
23 Masi, akhala wira mutthu onnihoverya, hata vari siiso onalya, owo oolamuliwa, maana khonilya aaminiki. Mweekeekhai, khula etthu nimpaka ahu nihaaminiki, etthu eyo etampi.
Inoota
^ Ekereku, “ohihela nluku ninkwattuliha, aahiiso etthu akina enimuttiyelela munna”.
