aRoma 3:1-31
3 Mureerelo xeeni mutthu onikhalana awe mwaha wookhala muyuda? Wala, winnuwihiwa onikumiherya mureerelo xeeni?
2 Sookhala mireerelo sinceene. Woopacerya, Muluku aahaavahererya ayuda moolumo awe oowaarya.
3 Vano, ankhi akina a yaawo yaahiyale waamini? Niireke ohaamini waya onitaphulela wira Muluku khoniroromeleya?
4 Nnaari! Hata atthu otheene akhalaka anawoothe, Muluku onrowa okhalaka eekeekhai, siisaale silempwale aya wira: “Munoohimmwa okhala naxariya mwaha wa moolumo anyu, nave okathi munrowa anyu ohimyaniwa etthu, nyuwo munimooniherya wira atthu awo animootha”.
5 Okathi nimpaka ahu itthu sootakhala, eyo ennitepa wooniherya wira Muluku naxariya. Nto niireke Muluku onnittheka, aananariwaka ni hiyo? (Eyo ti etthu anuupuwela aya atthu akina.)
6 Khahiyo siiso! Vakhala wira ti siiso, Muluku onrowa ophukela sai olumwenku?
7 Vano, akhala wira miyo kinnootha, nto wootha waka iwo onooniherya wira ele Muluku onihimya awe ekeekhai, ni onawiiriha atthu omuttottopela yoowo, xeeni Muluku onikihimya awe okhala natampi?
8 Niireke hiyo pooti ohimya wira: “Nipake itthu soohiloka, okhala wira itthu sooloka sinnoorwa”? Atthu akina anninootherya okhalaka ntoko hiyo ninlavula siiso. Tthiri, atthu awo ahaana ophukeliwa.
9 Nto niireke hiyo ti nitempe okhala atthu, waavikana akina? Nnaari! Ntoko kihimmye aka, ayuda ni akereku, otheene aya anniweriwa ni etampi.
10 Siisaale sinihimya aya Soolempwa wira: “Khuuvo naxariya, nnakhala mmosa.
11 Khuuvo orina ankhili, khuuvo onimwaavya Muluku.
12 Atthu otheene aamuhiya Muluku, nto otheene aya kharina efaita. Khuuvo onipaka itthu sooreera, nnakhala mmosa”.
13 “Mmilo aya onlikana ni mahiye oohittiyeliwa. Nlumi naya noosareya wootha”. “Moolumo anikhuma mwaano mwaya, anlikana ni eveneno ya inowa”.
14 “Mwaano mwaya moosareya moolumo ootakhaliha ni oowali”.
15 “Inawu saya sinnaakuvela wiiva”.*
16 “Awo animakela waakumiherya maxakha ni waahaaxa atthu,
17 nave khanisuwela okhala ni murettele ni atthu akina”.
18 “Awo khanimuttittimiha Muluku”.*
19 Vano hiyo noosuwela wira itthu sotheene Nlamulo ninhimya aya, sinaahimeerya ale aneettela Nlamulo, wira atthu otheene ahoothereryeke etthu, ni asuweleke wira aakhalana mulattu vamaithoni va Muluku. Tivo, anniphwanela waakhela ehukhumu.
20 Siiso, khuuvo mutthu onrowa othokoreriwa okhala naxariya vamaithoni va Muluku mwaha wa weettela Nlamulo, maana Nlamulo ninninikhaliherya osuwela saana etampi.
21 Vano, noosuwelihiwa wira vanniweryaneya okhala naxariya ohoolo wa Muluku, hata niheettelaka Nlamulo. Eyo yoohimmwa-tho ni Nlamulo ni soolempwa sa Maprofeta.
22 Exariya ya Muluku ennooniheriwa mwaha wa omwaamini Yesu Kristu, yooniheriwaka otheene yaale arina waamini iwo. Tthiri Muluku khonaathanya atthu.
23 Atthu otheene aattheka ni khaniwerya wooniherya ovuwa wa Muluku.
24 Kristu Yesu oowoopola* oliveryaka itampi saya, tivo, awo aakhalihiwa anaxariya ohoolo wa Muluku. Nave Muluku ohaavaha mahala ene, mwaha wa oreera wawe murima wuulupale.
25 Muluku onvaha Yesu ntoko mukuttho wira nitthikele waataana ni Muluku, mwaha wa waamini ephome ya Yesu. Muluku oopaka eyo wira ooniherye exariya awe. Nave khoonihenrye paahi opixa wawe murima,* olevelelaka itampi saapakiwe khalai,
26 masi-tho onninooniherya exariya awe hiyo ninkhala okathi ola, omuhimyaka okhala naxariya mutthu yoole onimwaamini Yesu.
27 Tivonto, niireke wira nookhalana mathowa anniiriha wiittottopa? Nnaari. Niireke nihaana wiittottopa mwaha wa wiiwelela Nlamulo? Nnaari, niittottopeke paahi mwaha wa weettela nlamulo na waamini.
28 Ninnisuwela wira mutthu onnihimmwa okhala naxariya mwaha wa waamini, ohiya mwaha wa weettela ele Nlamulo nnihimya aya.
29 Aahiiso niireke owo Muluku a ayuda paahi? Kiira-tho Muluku a atthu ale ahikhanle ayuda? Aayo, nave-tho owo Muluku a atthu ahikhanle ayuda.
30 Okhala wira Muluku ori mmosa, owo onimwaahimya okhala anaxariya ale oowinnuwihiwa mwaha wa waamini. Nave-tho, onimwaahimya okhala anaxariya ale oohinnuwihiwa mwaha wa waamini waya.
31 Niireke hiyo ninnimaliha Nlamulo mwaha wa waamini wahu? Nnaari! Masi, hiyo ninnilipiha Nlamulo.
Inoota
^ Ekereku, “omwarexa ephome”.
^ Ekereku, “khanimoova Muluku vamaithoni vaya”.
^ Nwehe Moolumo Ootthokiheriwa ani: “Yoowoopola”.
^ Aahiiso, “ovilela wawe”.
