aRoma 7:1-25
7 Axinnaka, kinlavula ni nyuwo munisuwela Nlamulo. Kiireke khamunsuwela wira Nlamulo nookhalana owerya wa omuruma mutthu, okathi wotheene ori awe mukumi?
2 Mwa ntakiheryo, Nlamulo nnihimya wira muthiyana ootheliwa ori vamosa ni iyawe, nlelo iyawe ori ene mukumi. Masi iyawe akhwa vale, nlamulo ninnimutaphula.
3 Tivo, iyawe akhala mukumi, nto muthiyana owo onatheliwa ni mulopwana mukina, muthiyana owo onooraruwa. Masi, akhala wira iyawe ohookhwa, muthiyana owo ootaphuwa. Siiso, atheliwa ni mulopwana mukina, owo khoniraruwa.
4 Axinnaka, vamosa-ru, erutthu ya Kristu yoowoopolani weettela Nlamulo na Moise. Eyo ehiiraneya wira mukhale a mutthu mukina, yoowo ohihimuxiwe mookhwaani. Vano ninniwerya omurumeela Muluku.
5 Okathi naakhala ahu nittharaka soophavela sa erutthu, Nlamulo naahooniherya oratteene wira soophavela iyo sootakhala, saaniiriha erutthu ahu opaka etampi. Nto etampi eyo, yaaniniroiha wookhwaani.
6 Masi vano nootaphuliwa otthara Nlamulo, okhala wira nlo khanniwerya-tho onikhoottiherya etthu. Siiso, hiyo nnoowerya okhala ipottha sa Muluku mwa enamuna esya, neettihiwaka ni munepa, ohiya ni nlamulo, ntoko khalai.
7 Nto nihimye exeeni? Niireke wira Nlamulo etampi? Nnaari! Mweekeekhai, nahaakhanle Nlamulo, miyo nkaarowa osuwela etampi. Mwa ntakiheryo, miyo nkaarowa osuwela nrima, Nlamulo nahaahimmye wira: “Muhikhaleleke nrima itthu sa aneene”.
8 Vano etampi, yoottottela mureerelo yooruma eyo wira ekiirihe okhalela nrima itthu sotheene soohiloka. Nahaakhanle nlamulo, etampi khiyaarina owerya.*
9 Tthiri, miyo kaakhala nihinatthi okhumelela nlamulo. Masi nuumala okhumelela yooruma, etampi yaahitthikela okhala ekumi, nto miyo kaahikhwa.
10 Yooruma kuupuwela aka wira yaarowa okiphwanyiha okumi, yaahikiroiha wookhwaani.
11 Vano etampi yaahirumeela yooruma eyo, wira ekiwoke ni ekiive.
12 Hata vari siiso, Nlamulo ti noowaarya, nave yooruma ti yoowaarya, ya xariya ni yooreera.
13 Niireke eyo enitaphulela wira etthu yooloka tekiivale? Nnaari! Etampi tekiivale. Nlamulo ti nooreera, masi nihooniherya saana wira etampi ti yaakiiva. Tivonto, yooruma ennooniherya oratteene wira etampi ti yootakhala tthiri.
14 Hiyo noosuwela wira Nlamulo ti na Muluku. Miyo ka mutthu paahi, otumiheriwe etampi.
15 Miyo nkinsuwela etthu kinipaka aka. Nkinivara ele eniphavela aka, masi kinivara ele eninyokha aka.
16 Nto kaapakaka ele kihiniphavela aka, kinnikupali wira Nlamulo ti nooreera.
17 Vano, khahiyo-tho miyo kinipaka etthu eyo, masi etampi tenipaka, yeeyo enikhala mwa miyo.
18 Koosuwela wira mwa miyo, eyo piiyo, mweerutthuni mwaka, khenikhala etthu yooreera, maana miyo kinniphavela opaka etthu yooreera, masi nkiniwerya.
19 Miyo nkiniwerya opaka itthu sooreera kiniphavela aka, masi kinimakela opaka itthu soonanara kihiniphavela aka.
20 Tivo, akhala wira kinnipaka etthu ehiniphavela aka, weeso khahiyo-tho miyo kinipaka etthu eyo. Masi etampi tenipaka, yeeyo enikhala mwa miyo.
21 Siiso, nookhala nlamulo nla nnikeettiha: Kaaphavelaka opaka etthu yooloka, kinnoona wira kiniphavela opaka etthu yootakhala eri mwa miyo.
22 Vamurimani vaka, kinnisiveliwa nlamulo na Muluku.
23 Masi kinnoona nlamulo nikina mweerutthuni mwaka, nenlo ninvirikanya nlamulo na muupuwelo aka. Nlamulo nlo ti etampi eri mweerutthuni mwaka, nave tenikeettiha.
24 Miyo nkireere otakhaliwa! Ti pani onrowa okoopola erutthu ela enikiroiha mookhwaani?
25 Kinnimuxukhuru Muluku, okhala wira owo onookoopola omurumeelaka Yesu Kristu, Pwiya ahu! Tivo, itthu kinuupuwela aka, sineettihiwa ni Nlamulo na Muluku, masi erutthu aka eneettihiwa ni nlamulo na etampi.
Inoota
^ Ekereku, “etampi yaahikhwa”.
