Eezira 1:1-11
1 Eyaakha yoopacerya ya mwene Kiiru a oPersia, wiira yiiraneye moolumo Yehova aalavunle awe omurumeelaka Yeremiya, Yehova aahiiriha murima wa Kiiru mwene a oPersia olaleya moomweneni mwawe mootheene, moolumo yaawo-tho aarumme awe olempwa, oriki:
2 “Enihimya awe Kiiru mwene a oPersia tiila: ‘Yehova Muluku a wiirimu, ookivaha omwene wootheene wa mulaponi, nave ookithanla wiira kimutekele empa oYerusalemu, ori oYuda.
3 Ole oniirela mpantta atthu awe, Muluku awe okhale nuuwo. Nto owo oroweke oYerusalemu, onikhala oYuda, atthikele oteka empa enikhala oYerusalemu,* empa ya Yehova, Muluku a Isarayeli, Muluku eekeekhai.
4 Atthu ootheene anikhala ntoko anamurwa, khula opuro anikhala aya, avahiweke ni anamwaattamanani aya* eparatha, eweero, mireerelo ni inama, vamosa ni soovaha siniroihiwa empa ya Muluku eekeekhai, oYerusalemu’”.
5 Moottharelana, ahooleli a imusi sa atthu a oYuda ni a oBeniyamini, vamosa ni anamukuttho ni alevi, eyo piiyo, ootheene ale Muluku eekeekhai aawiirinhe awe ophavela ovara muteko, yaahiilokiherya wiira arowe yatthikele oteka empa ya Yehova, oYerusalemu.
6 Atthu ootheene yaarukurenrye yaanaakhaliherya yaavahaka* itthu sa eparatha ni sa eweero, mireerelo, inama ni itthu saarina efaita, ohikontari itthu sootheene saavahiwa voohikhanyereriwa para empa ya Muluku.
7 Nave mwene Kiiru aahiruma oroweliwa mireerelo sa empa ya Yehova, seiyo Nabukodonosori akunxe awe oYerusalemu, opweha mpaani mwa muluku awe.
8 Kiiru mwene a oPersia aahimuruma Mitiridati, yoowo aakhapelela mihakhu, okumiha mireerelo iyo sootheene. Nto owo aahilepa mireerelo iyo sootheene onvahererya Xexibasari,* mukhulupale a oYuda.
9 Itthu saalempwale tiiya: mireerelo 30 sa eweero saalikana ni ettanka,* mireerelo 1.000 sa eparatha saalikana ni ettanka ni iparatho sikina 29,
10 vamosa ni itixela saamukhaani 30 sa eweero, itixela saamukhaani 410 sa eparatha ni mireerelo sikina 1.000.
11 Mireerelo sootheene sa eweero ni sa eparatha saari 5.400. Xexibasari aahikuxa mireerelo iyo sootheene okathi ale yaaroihiwe weepotthani yaakhuma aya oBabilonia arowaka oYerusalemu.
Inoota
^ Aahiiso, “atthikele oteka empa ya Yehova, yeeyo enikhala oYerusalemu”.
^ Eheeperi, “alopwana anikhala opuro aya”.
^ Eheeperi, “yaalipihaka matata ni”.
^ Woonasa wene onihimmwa Zorobabeli, yoowo oniromoliwa Eezira 2:2; 3:8.
^ Aahiiso, “esestu”.
