Eezira 3:1-13
3 Waaphiyale aya mweeri wa neethanu nenli, aisarayeli* ari ene ipooma saya, awo yaahiiwanana othukumana oYerusalemu.
2 Yexuwa mwaana a Yehosadaki ni anamukuttho akhwaawe, vamosa ni Zorobabeli mwaana a Salathiyeli ni axinnaya, yaahipacerya omuteka altaari a Muluku a wIsarayeli wiira avahe mikuttho soopahiwa, attharaka ele yaalempwale Nlamulo na Moise, mulopwana a Muluku eekeekhai.
3 Nnaamwi yaawoova atthu a ilapo saarukurenrye, yaahimuteka altaari opuro aari awe khalai, apacerya onvaha mikuttho soopahiwa Yehova, mikuttho soopahiwa sa voosiisu ni sa makaaripi.
4 Awo yaahitthapela Efesta ya Maxaxa,* attharaka ele yaalempwale, nave khula nihiku yaanivaha nummuru na mikuttho soopahiwa, saavekeliwa khula nihiku.
5 Nuumala-vo, yaanivaha mikuttho soopahiwa voohihiyererya ni mikuttho sa khula mweeri musya, ni sa ifesta sootheene soowaarya sa Yehova, vamosa ni iye saaruuhiwa ni atthu ootheene yanvaha Yehova voohikhanyereriwa.
6 Okhuma nihiku noopacerya na mweeri wa neethanu nenli, awo yaahipacerya onvaha Yehova mikuttho soopahiwa, nnaamwi alisenso a etemplo ya Yehova yahaapaceriwe.
7 Awo yaahaavaha musurukhu ale yaapwexa ni olokiherya maluku, ni ale yaavara muteko ni matera. Nave-tho yaahaavaha yoolya, yoowurya ni makhura atthu a oSiidoni ni a oTiiro, mwaha wooruuha matera a eseeturu avirihaka mphareya, okhuma oLiibano mpakha oYope, ntoko yaarummwale aya ni Kiiru, mwene a oPersia.
8 Eyaakha ya nenli nuumala ophiya empa ya Muluku eekeekhai oYerusalemu, mweeri wa nenli, Zorobabeli mwaana a Salathiyeli ni Yexuwa mwaana a Yehosadaki, vamosa ni axinnawe akina, anamukuttho ni alevi, yaahipacerya muteko wooteka, vamosa ni atthu ootheene yaatthinke weepotthani arowaka oYerusalemu. Awo yaahaathanla alevi yaarina iyaakha 20 orowa ohoolo wiira aweheryeke muteko owo wooteka empa ya Yehova.
9 Nto, Yexuwa, anaawe ni axinnawe, vamosa ni Kadimiyeli ni anaawe, yaawo yaari anamwane a Yuda, yaahitakaahana wiira yaaweheryeke ale yaavara muteko wooteka empa ya Muluku eekeekhai, ni anamwane a Henadadi vamosa ni anaaya ni axinnaya, yaawo-tho yaari alevi.
10 Okathi alipa-ooteka yaapacenrye aya alisenso a etemplo ya Yehova, anamukuttho yaawanre ikuwo sa onamukuttho ni yaakunxe malope, vamosa ni alevi, anamwane a Asafi, yaawo yaakunxe isimbalo, yaaheemela enapacerya omuttottopela Yehova attharaka malakiheryo a mwene Davidi a wIsarayeli.
11 Vano awo yaahipacerya wiipa yaakhulelihanaka, amuttottopelaka ni amuxukhurelaka Yehova, “okhala wiira owo tooreera murima; nave ophenta wawe woororomeleya oniwooniherya awe atthu a Isarayeli, onikhala mahiku ootheene”. Nto atthu ootheene yaahikhuwela vanceene amuttottopelaka Yehova, okhala wiira alisenso a empa ya Yehova yaahipaceriwa.
12 Anamukuttho anceene, alevi ni ahooleli a imusi saya, eyo piiyo, atthu oowuuluvala yaawenhe empa ya khalai, yaahinla vanceene okathi yaawenhe aya wiira alisenso a empa eyo yaahipaceriwa. Vano atthu akina yaanikhuwela vanceene atteeliwe ene murima.
13 Nto atthu khiyaawerya ovirikanyiha okhuwela wa otteeliwa murima ni okhuwela wa wunla, okhala wiira atthu yaanikhuwela vanceene vaaweryaneya aya wiiwa ottaiwene.
