Eezira 4:1-24
4 Okathi awanani a atthu a oYuda ni a oBeniyamini yaasuwenle aya wiira ale yaatthinke weepotthani yaateka etemplo ya Yehova, Muluku a Isarayeli,
2 yaahirowa moowaakuveya wa Zorobabeli ni wa ahooleli a imusi saya, anaahimeerya wiira: “Munihiye wiira nitekeke vamosa ni nyuwo, okhala wiira hiyo nimmukokhorela* Muluku anyu, nave ninninvaha mikuttho ntoko nyuwo, okhuma nihiku Esari-Hadoni mwene a wAsiiria oniruuhale awe opuro ola”.
3 Nto, Zorobabeli ni Yexuwa ni ahooleli akina a imusi sa atthu a Isarayeli, yaahaahimeerya wiira: “Khamunrowa oteka ni hiyo empa ya Muluku ahu, okhala wiira hiyo mmansihu nnoomutekela empa Yehova, Muluku a atthu a Isarayeli, ntoko nirummwale ahu ni Kiiru mwene a oPersia”.
4 Vano, atthu a elapo ele yaahithipelela waakhulumula* atthu a oYuda wiira yaahiihe oteka.
5 Mahiku ootheene a mwene Kiiru a oPersia, awo yaanaaliva anamiruku wiira amuhoonone palano aya, mpakha okathi aalamulela awe Dario mwene a oPersia.
6 Okathi Asuwero aapacenrye awe olamulela, yaahilepa ekarta ewootheryaka atthu a oYuda ni a oYerusalemu.
7 Mahiku a Artaxerxe mwene a oPersia, Bixilami, Mitiridati, Tabeyeli ni akhwaawe akina, yaahilepa ekarta amuroihela mwene Artaxerxe. Awo yaahitaphulela ekarta eyo para nttaava na aramaiko, arumeelaka ileetera sa aramaiko.*
8 * Rehumi, mukhulupale a kuvernatoro ni mulipa-oolepa Ximixayi, yaahimulepela ekarta mwene Artaxerxe yaahimya oYerusalemu, eriki:
9 (Rehumi, mukhulupale a kuvernatoro, ni mulipa-oolepa Ximixayi, ni akhwaawe akina, alipa-oophuka ni makuvernatoro makina, masekretaario, atthu a wEreki, a oBabilonia, atthu a oSusa, eyo piiyo, a wElami,
10 ni atthu a maloko makina aalupale ni oottittimiheya yaawo Asinapari aaroihale awe weepotthani, aapweha ipooma sa oSamariya, ni atthu akina a mpantta onikela nsuwa wa muro Eufrate,
11 ti yaalempe ekarta ela amuroihela mwene.)
“Mwene Artaxerxe, arumeyi anyu tanoolepelani, yaawo anikhala mpantta onikela nsuwa wa muro Eufrate:
12 Ninnimusuweliha mwene wiira ayuda akhumme iwo, aaphiya muttetthe wa oYerusalemu. Awo aatthikela oteka epooma yoohiiwelela ni yootakhala, omaliha ixiri ni waalokiherya alisenso.
13 Vano, ninnimusuweliha mwene* wiira epooma ela yatthikela otekiwa nave ixiri saya samalihiwa, awo khanrowa olivaka mpoosito ni itthu sikina mwene onivekela awe, nto eyo enimwiiriha wiira mwene* ohiruuheliweke musurukhu munceene.
14 Hiyo ninlya maakha a opalaasio, nto khivanreerela weemela niwehaka sihononiwaka soophavela sa mwene, ninnimulepela mwene ihapari iya,
15 wiira mutokose muliivuruni silempwale aya itthu saahimya amuhavinre anyu. Apwiya anoosuwela wiira muliivuruni silempwale aya itthu sa khalai, wiira epooma ela, epooma yoohiiwelela, yeeyo enaakumiherya mixankiho mamwene ni iprovinsia, ni wiira okhuma khalai, epooma ela annikhala atthu oohiiwelela. Tivo epooma ela yaapwetexiwe aya.
16 Ninnimusuweliha mwene, wiira epooma ela yatthikela otekiwa ni ixiri saya samalihiwa, nyuwo khamunrowa-tho owerya oweettiha atthu anikhala mpantta onikela nsuwa wa muro Eufrate”.
17 Mwene aahimwaakhula Rehumi, mukhulupale a kuvernatoro, ni mulipa-oolepa Ximixayi, ni akhwaaya yaakhala oSamariya ni mittetthe sikina sa mpantta onikela nsuwa wa muro Eufrate, oriki:
“Makhomaso!
18 Etukumento muniruuhenle anyu, yoosommwa* voowiiwanyeya ohoolo waka.
19 Kooruma otokosiwa iliivuru ni vahooniwa wiira okhuma khalai, epooma ela kheniwiiwelela mamwene, ni annikhala atthu oohiiwelela ni oovirikanya.
20 Yaahikhala mamwene oowerya oYerusalemu, yaawo yaalamulela muttetthe wootheene wa mpantta onikela nsuwa wa muro Eufrate, yaawo yaaliviwa mpoosito ni itthu sikina yaavekela aya.
21 Vano mwaaleele alopwana awo wiira ahiye muteko owo, wiira ahitthikele-tho oteka epooma eyo, mpakha miyo oruma.
22 Muhinyoonyeriwe okhapelela mwaha ola, wiira mwene ohikumiheriwe mixankiho sinceene ovikana iye”.
23 Nto nuumala osommwa etukumento ele ya mwene Artaxerxe ohoolo wa Rehumi ni mulipa-oolepa Ximixayi, ni akhwaaya, moowaakuveya awo yaahirowa wa ayuda, oYerusalemu ni yaahaakhanyererya ohiya muteko ole.
24 Tivo muteko wooteka empa ya Muluku, oYerusalemu, waaheemela. Khiwaatthikeliwe-tho mpakha eyaakha ya nenli aalamulela awe Dario, mwene a oPersia.
Inoota
^ Eheeperi, “nnimphavela”.
^ Eheeperi, “woolowiha matata a”.
^ Aahiiso, woonasa wene: “ekarta eyo yaalempwale ni aramaiko, etaphuleliwa”.
^ Eezira 4:8 mpakha 6:18 opacerya wene olempwale ni aramaiko.
^ Eheeperi, “ mamwene”.
^ Eheeperi, “mamwene”.
^ Aahiiso, woonasa wene: “yootaphuleliwa ni yoosommwa”.
