Eezira 5:1-17
5 Nuuvira okathi, profeta Hagayo ni profeta Zakariya musulwaawe Ido, yaahilavula eprofesia yaahimyaka ayuda, yaari oYuda ni oYerusalemu, mwa nsina na Muluku a Isarayeli yoowo aari eriyari aya.
2 Tivonto, Zorobabeli, mwaana a Salathiyeli ni Yexuwa, mwaana a Yehosadaki, yaahitthikela oteka empa ya Muluku oYerusalemu; nave maprofeta a Muluku yaari naawo yaanaakhaliherya.
3 Okathi ole, Tatenayi kuvernatoro a mpantta onikela nsuwa wa muro Eufrate, Xetari-Bozinayi ni akhwaaya, yaahirwa anaakoha ariki: “Tani yoorummeni oteka empa ela ni omaliha iviika iya?”
4 Nave yaahaakoha ariki: “Ari vai masina a alopwana anivara muteko ola?”
5 Muluku aanaaweha-weha* axitokweene a oYuda, nto khuuvo aakhoottihale mpakha Dario waakhela erelatoorio, ni ottikiha etukumento yaalavula mwaha owo.
6 Ela ekoopiya ya ekarta yeeyo Tatenayi, kuvernatoro a mpantta onikela nsuwa wa muro Eufrate, ni Xetari-Bozinayi ni akhwaawe, makuvernatoro a mpantta onikela nsuwa wa muro Eufrate, yaamuroihenle aya mwene Dario.
7 Awo yaahimuroihela erelatoorio ahimyaka wiira:
“Mwene Dario:
“Murettele wootheene okhale ni nyuwo!
8 Ninnimusuweliha mwene wiira naahirowa eprovinsia ya oYuda, empa ya Muluku muulupale, yeeyo enitekiwa ni maluku maalupale ni matera, yaawo aniheliwa muxirini. Nave atthu anivara muteko owo anivara ahakalanle ene, nave muteko owo onnirowa vahoolo mwaha woowiimananiha waya.
9 Nto nihaakoha axitokweene aya wiira: ‘Tani yoorummeni oteka empa ela ni omaliha iviika iya?’
10 Nave nihaakoha masina aya wiira nooleeleni, wiira niwerye olepa masina a alopwana anihoolela.
11 “Awo anaakhunle so: ‘Hiyo na arumeyi a Muluku a wiirimu ni a valaponi, nave nitthikenle oteka empa yeeyo yaatekiwe iyaakha sinceene, yaatekiwe ni yaamalihiwe ni mwene muulupale a wIsarayeli.
12 Masi, okhala wiira axipaapa ahu yaahimwiiriha Muluku a wiirimu onanariwa, owo aahaavahererya mmatatani mwa Nabukodonosori mwene a oBabilonia, atthu a oKhaldeya yaawo yaapwexakanse empa ela ni yaakuxa atthu ntoko ipottha yaaroiha oBabilonia.
13 Vano, eyaakha yoopacerya ya Kiiru, mwene a oBabilonia, mwene Kiiru aahiruma otthikeliwa otekiwa empa ela ya Muluku.
14 Ohiya-vo, mwene Kiiru aahikumiha mutemplo mwa oBabilonia mireerelo sa eweero ni sa eparatha saari empa ya Muluku, seiyo Nabukodonosori aakuminhe awe mutemplo ya oYerusalemu, oroiha mutemplo ya oBabilonia. Mireerelo iyo aahivahereriwa mulopwana oniihaniwa Xexibasari,* yoowo Kiiru aamukhalinhe awe kuvernatoro.
15 Kiiru aahimuhimeerya wiira: “Mukuxe mireerelo iya. Murowe, mwapwehe mutemplo eri oYerusalemu, nave etthikele otekiwa empa ya Muluku opuro aya wa khalai”.
16 Vano, Xexibasari aahirwa onapacerya waateka alisenso a empa ya Muluku oYerusalemu, yeeyo enitekiwa okhuma okathi ole mpakha vano, masi nlelo khenatthi omalihiwa’.
17 “Vano, mwene oona oreerela, sitokosiwe itthu silempwale oBabilonia weiwo wiira vasuweliwe vakhala wiira mwene Kiiru aahiruma wiira etthikeliwe otekiwa empa ya Muluku oYerusalemu. Nuumala-vo, mwene oniruuhele ele ethanlale awe ni mwaha ola”.
Inoota
^ Eheeperi, “niitho na Muluku aya naari ni”.
^ Woonasa wene onihimmwa Zorobabeli yoowo oniromoliwa Eezira 2:2; 3:8.
