Eezira 6:1-22
6 Vano mwene Dario aahiruma wiira siiso. Nave saahitokosiwa itthu saalempwale saari oBabilonia, weiwo saapwehiwa aya mihakhu.
2 Nto yaahiphwanyiwa eroolu opuro woolipihiwa wEkibaatana, eprovinsia ya oMedia, yeeyo yaalempwale moolumo ala anittharelana:
3 “Eyaakha yoopacerya ya mwene Kiiru, mwene Kiiru aahiruma moolumo ala yaahimya empa ya Muluku, oYerusalemu: ‘Etthikele otekiwa empa, wiira okhale opuro onrowa aya ovahiwaka mikuttho, nave alisenso aya alipihiwe. Orakamela waya osulu onrowa okhala wa ikoovatu 60,* okhuveya waya onrowa okhala wa ikoovatu 60,
4 nave enrowa okhalana ipantte tthaaru sa maluku maalupale ni epantte emosa ya matera. Empa ya mwene, tenrowa oliverya itthu iyo.
5 Nave-tho, sittikihiwe mireerelo sa eparatha ni sa eweero sa mpaani mwa Muluku, seiyo Nabukodonosori aakunxe awe mutemplo mwa oYerusalemu, oroiha oBabilonia. Sipwehiwe opuro aya, mutemplo mwa oYerusalemu ni sisukiwe mpaani mwa Muluku’.
6 “Vano Tatenayi, kuvernatoro a mpantta onikela nsuwa wa muro Eufrate, Xetari-Bozinayi ni akhwaaya, ni makuvernatoro makina a mpantta onikela nsuwa wa muro Eufrate, ahiikelihe opuro owo.
7 Ahiikelihe muteko owo wootekiwa empa eyo ya Muluku. Kuvernatoro a ayuda ni makhulupale a ayuda, tanrowa otthikela oteka empa eyo opuro yaari aya khalai.
8 Etthu kinoorumaakani wiira makhulupale a ayuda awerye otthikela oteka empa ya Muluku tiila: Itthu sinrowa ovareliwaka muteko ni alopwana awo sinrowa oliveriwa ni mihakhu sa mwene, eyo piiyo, ni mipoosito sinikuxiwa mpantta onikela nsuwa wa muro Eufrate, wiira muteko owo oheemele.
9 Khula etthu aniphavela aya ntoko ipooyi, ipwittipwitthi saamukhaani ni ipwittipwitthi suulupale, wiira anvahe mukuttho woopahiwa Muluku a wiirimu, vamosa ni etiriku, maakha, eviinyu ni makhura, ntoko anihimya aya anamukuttho ari oYerusalemu, mwaavaheke khula nihiku,
10 wiira khula okathi aweryeke ovaha mikuttho sinimusivela Muluku a wirimu ni avekeleke wiira mwene ni anaawe akhalaneke okumi munceene.
11 Nave kinniruma wiira akhala mutthu ohiniiwelela nlamulo nla, ekumihiwe eviika ya matera ya empa awe, okhomeliwe vaavo. Empa awe epakiwe elatrina ya atthu ootheene* mwaha wa etthu yootakhala opanke awe.
12 Muluku yoowo othanlale opuro ole, wiira nikhaleke nsina nawe, ommala-malihe khula mwene aahiiso mutthu onrowa ohiiwelela yooruma ela, mwaha wa ovirikanya wawe, ni ohonona empa ya Muluku, oYerusalemu. Oniruma ti miyo Dario. Yooruma ela etthariweke oratteene”.
13 Vano, Tatenayi kuvernatoro a mpantta onikela nsuwa wa muro Eufrate, Xetari-Bozinayi ni akhwaaya, yaahipaka itthu sootheene mwene Dario aarumale awe.
14 Makhulupale a ayuda, yaahilipihiwa ni moolumo a eprofesia ya Hagayo ni ya Zakariya, musulwaawe Ido. Nto awo khiyaahiyale oteka ni muteko waanirowa ohoolo. Awo yaahimaliha muteko owo wooteka ntoko Muluku a atthu a Isarayeli aarumale awe, ni ntoko yaarummwale aya ni Kiiru, Dario ni Artaxerxe mwene a oPersia.
15 Awo yaahimaliha empa eyo nihiku na neeraru wa mweeri wadari,* eyaakha ya neethanu namosa wa olamulelo wa mwene Dario.
16 Vano aisarayeli, anamukuttho, alevi ni atthu akina yaatthinke weepotthani, yaahitthapela ni otteeliwa murima ovahereriwa* wa empa ya Muluku.
17 Awo yaahivaha ipooyi 100, ipwittipwitthi saamukhaani 200 ni ipwittipwitthi 400, wiira evahereriwe* empa eyo ya Muluku. Nave yaahivaha ipuri 12 soolopwana, ntoko yoovaha ya oleveleliwa itampi sa atthu ootheene a Isarayeli, moovarihana ni nummuru na mahimo a atthu a Isarayeli.
18 Nave, yaahaathanlela anamukuttho ikurupu saya ni alevi ikurupu saya, wiira anvarele muteko Muluku oYerusalemu, attharaka ele yaalempwale muliivuruni ya Moise.
19 Ale yaatthinke weepotthani, yaahimpaka paasikha nihiku na namuloko ni xexe, na mweeri woopacerya.
20 Anamukuttho ni alevi yaahiireeriha, nto atthu ootheene khiyaarina mwiikho vamaithoni va Muluku. Awo yaahihita inama sa mukuttho wa paasikha para atthu ootheene yaatthinke weepotthani, anamukuttho akhwaaya ni awo mmansaya.
21 Nto aisarayeli yaatthinke weepotthani, yaahilya mukuttho ni atthu ootheene yaathukumanne naawo, ni atthu ale yaari ni mwiikho yaakhala mulaponi-mme, wiira amukokhorele* Yehova, Muluku a atthu a Isarayeli.
22 Nave-tho, awo yaahitthapela ni otteeliwa murima Efesta ya Iphaawu Soohiheliwa Eferemento, okhala wiira Yehova aahiwiiriha otteeliwa murima ni aahimwiiriha mwene a wAsiiria waareerela murima, mpakha owo waakhaliherya* muteko wooteka empa ya Muluku eekeekhai, Muluku a atthu a Isarayeli.
Inoota
^ Etthu yoowiiraka imeeturu 26.7. Munwehe Apendise B14.
^ Aahiiso, woonasa wene “opuro onuukeliwa ikokhola”.
^ Munwehe Apendise B15.
^ Aahiiso, “wiinakurariwa”.
^ Aahiiso, “yiinakurariwe”.
^ Eheeperi, “amphavele”.
^ Eheeperi, “olipiha matata aya”.
